Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w98 12/15 matl. 10-15
  • Ku Ponisa I Ka Yehovha

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ku Ponisa I Ka Yehovha
  • Xihondzo xo Rindza Xi Huwelela Mfumo Wa Yehovha—1998
  • Swihloko
  • Tinhlokomhaka Tin'wana Leti Yelana Na Yona
  • Yehovha U Ponisa Lavo Lulama
  • Yehovha U Ponisa Vanhu Vakwe Eka Vaxanisi
  • Xikwembu Xi Ponisa Lava Va Xi Tshembaka
  • Yehovha U Ponisa Lava Hlayisaka Vutshembeki
  • Yehovha U Ponisa Vanhu Vakwe Minkarhi Hinkwayo
  • Ku Ponela eVuton’wini Lebyi Nga Heriki
  • Hlayisa ‘Ntshembo Wa Wena Wa Ku Ponisiwa’ Wu Ri Lowu Vangamaka!
    Xihondzo xo Rindza Xi Huwelela Mfumo Wa Yehovha—2000
  • Ku Ponisiwa I Yini?
    Tinhlamulo Ta Swivutiso Swa Bibele
  • “Yimani Mi Tiya Mi Vona Ku Ponisa Ka Yehovha”
    Xihondzo xo Rindza Xi Huwelela Mfumo Wa Yehovha—2007
  • Misava A Yi Nga Va Fanelanga
    Xihondzo xo Rindza Xi Huwelela Mfumo Wa Yehovha—1987
Vona Swo Tala
Xihondzo xo Rindza Xi Huwelela Mfumo Wa Yehovha—1998
w98 12/15 matl. 10-15

Ku Ponisa I Ka Yehovha

“Xikwembu xa ntiyiso i Xikwembu xa swiendlo swa ku ponisa.”—PISALEMA 68:20, NW.

1, 2. (a) Hikwalaho ka yini hi nga vulaka leswaku Yehovha i Xihlovo xa ku ponisa? (b) Xana u nga yi hlamusela njhani Swivuriso 21:31?

YEHOVHA hi yena Muponisi wa vanhu lava va n’wi rhandzaka. (Esaya 43:11) Davhida Hosi leyi dumeke ya Israyele, a a swi tiva leswi hi ku landza ntokoto wa yena n’wini, naswona u yimbelerile hi mbilu hinkwayo a ku: “Ku hlayiseka ku huma ka Yehova.” (Pisalema 3:8) Muprofeta Yonasi u tirhise marito lama fanaka exikhongelweni xakwe lexi humaka embilwini loko a ri ekhwirini ra nhlampfi leyikulu.—Yonasi 2:9.

2 Solomoni n’wana wa Davhida na yena a a swi tiva leswaku Yehovha i Xihlovo xa ku ponisa, hikuva u te: “Hantši yi lungiseriwa siku ra nyimpi, kambe ku pona i ka Yehova.” (Swivuriso 21:31) EMiddle East ya khale, tinkavi a ti koka puluho, timbhongolo a ti rhwala ndzhwalo, vanhu a va gada timeyila naswona tihanci a ti tirhisiwa enyimpini. Kambe, loko Vaisrayele va nga si nghena eTikweni leri Tshembisiweke, Xikwembu xi lerise leswaku hosi ya vona ya nkarhi lowu taka yi “nga ṭhuki [yi] v̌a ni mahantši [yo] tala.” (Deteronoma 17:16) Tihanci ta nyimpi a ti nga laveki hikuva Yehovha a a ta ponisa vanhu vakwe.

3. Hi swihi swivutiso leswi lavaka leswaku hi anakanyisisa ha swona?

3 Yehovha Hosi leyi Lawulaka i “Xikwembu xa swiendlo swa ku ponisa.” (Pisalema 68:20, NW) Mawaku mhaka leyi khutazaka swonghasi! Kambe hi swihi “swiendlo swa ku ponisa” leswi Yehovha a swi endleke? Naswona i vamani lava a va poniseke?

Yehovha U Ponisa Lavo Lulama

4. Hi swi tivisa ku yini leswaku Yehovha u ponisa vanhu lava nga ni vukwembu?

4 Hinkwavo lava lwelaka ku endla leswi lulameke tanihi malandza ya Xikwembu lama tinyiketeleke va nga kuma nchavelelo emaritweni ya muapostola Petro: “Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu, kambe u vekela vanhu lava nga lulamangiki siku ra vuavanyisi leswaku va ta lovisiwa.” Leswaku a kombisa yinhla leyi, Petro u vule leswaku Xikwembu “[a xi] tshikanga ku xupula misava ya khale, kambe xi hlayisa Nowa, muchumayeri wa leswo lulama, ni van’wana va nkombo loko xi tisa ndhambhi ehenhla ka misava ya vanhu lava nga xiximiki Xikwembu.”—2 Petro 2:5, 9.

5. Xana Nowa u ve “muchumayeri wa leswo lulama” ehansi ka swiyimo swa njhani?

5 Ehleketa wena u ri eswiyin’weni sweswo esikwini ra Nowa. Madimona lama tihundzuleke vanhu ma le misaveni. Vana va tintsumi leti ti nga yingisangiki va khoma vanhu hi tihanyi, naswona ‘misava yi tele madzolonga.’ (Genesa 6:1-12) Hambiswiritano, Nowa a a nga ta chavisiwa leswaku a tshika ntirho wa Yehovha. Ematshan’weni ya sweswo, i “muchumayeri wa leswo lulama.” Yena ni ndyangu wakwe va ake ngalava naswona a va nga kanakani nikatsongo leswaku vuhomboloki byi ta herisiwa enkarhini wa vona. Ripfumelo ra Nowa ri gweve misava yoleyo. (Vaheveru 11:7) Swiyimo leswi nga kona namuntlha swa fana ni swa le sikwini ra Nowa, leswi kombaka leswaku masiku lawa i yo hetelela ya fambiselo leri ro homboloka ra swilo. (Matewu 24:37-39; 2 Timotiya 3:1-5) Kutani, ku fana na Nowa, xana u ta tshama u tshembekile tanihi muchumayeri wa leswo lulama u ri karhi u tirha ni vanhu va Xikwembu loko u rindzele ku ponisa ka Yehovha?

6. Xana 2 Petro 2:7, 8 yi kombisa njhani leswaku Yehovha u ponisa lavo lulama?

6 Petro u nyikele vumbhoni lebyi engetelekeke bya leswaku Yehovha u ponisa lavo lulama. Muapostola u ri: “[Xikwembu xi kutsule] Lota wo lulama, loyi a a karhateka swinene hi vanhu lava delelaka nawu, va tipeta eku tikhomeni loko biha—hikuva munhu loyi wo lulama a a xaniseka eka moya-xiviri wakwe wo lulama hikwalaho ka swiendlo swa vona swo kala nawu leswi a a swi vona ni ku swi twa siku ni siku loko a ha tshama na vona.” (2 Petro 2:7, 8; Genesa 19:1-29) Ku tikhoma ko biha hi tlhelo ra rimbewu ku hundzuke tshamelo-maxelo eka vanhu va timiliyoni emasikwini lawa yo hetelela. Ku fana na Lota, xana wa ‘karhateka swinene hi vanhu lava tipetaka eku tikhomeni ko biha,’ lava teleke swonghasi namuntlha? Loko u karhateka, naswona u hanya hi ku endla leswo lulama, u nga ha va exikarhi ka lava nga ta ponisiwa hi Yehovha loko fambiselo leri ro homboloka ri herisiwa.

Yehovha U Ponisa Vanhu Vakwe Eka Vaxanisi

7. Xana ndlela leyi Yehovha a tirhisaneke ha yona ni Vaisrayele aEgipta yi kombisa njhani leswaku wa va kutsula vanhu va yena eku xanisiweni?

7 Loko fambiselo leri ra khale ra ha ri kona, malandza ya Yehovha ma ta xanisiwa ni ku tshikileriwa hi nala. Kambe ma nga tiyiseka leswaku Yehovha u ta ma ponisa, hikuva u va ponisile vanhu vakwe lava a va xanisiwa enkarhini lowu hundzeke. A hi nge a wu ri Muisrayele loyi a a xanisiwa hi Vaegipta va le sikwini ra Muxe. (Eksoda 1:1-14; 6:8) Xikwembu xi ba Egipta hi makhombo hi ku landzelelana. (Eksoda 8:5–10:29) Loko khombo leri dlayaka ra vukhume ri hundza ni vutomi bya mativula ya Egipta, Faro u pfumelele tiko ra Israyele leswaku ri famba kambe endzhaku ka sweswo a rhumela mavuthu yakwe ma ri hlongorisa. Hambiswiritano, hi ku hatlisa yena ni vavanuna vakwe va lovisiwa eLwandle ro Tshwuka. (Eksoda 14:23-28) Kutani u hlanganyela na Muxe ni Vaisrayele hinkwavo eka risimu leri: “Yehova i nhenha ya matimba, e v̌ito ra yena i Yehova. O wisile lwandle e makaletši ya Faro, ni nyimpi ya yena; e tinhenha ta yena le’ti hlawuriweke ti dyiwe hi Lwandle le’ro-Tŝhuka. E magandlati ma v̌a funengetile; v̌a mbombomerile šidziv̌eni kukotisa ribye.” (Eksoda 15:3-5) Khombo leri fanaka ri rindze hinkwavo lava xanisaka vanhu va Xikwembu emasikwini lawa ya makumu.

8, 9. Nyika xikombiso lexi kumekaka ebukwini ya Vaavanyisi, lexi kombaka leswaku Yehovha wa va ponisa vanhu vakwe eka lava va va xanisaka?

8 Vaavanyisi va va avanyise hi vululami ku ringana malembe yo tala loko Vaisrayele va nghene eTikweni ra Xitshembiso. Minkarhi yin’wana vanhu a va xanisiwa hi vanhu vambe, kambe Xikwembu xi tirhise vaavanyisi vo tshembeka ku va kutsula. Hambileswi na hina hi nga ha ‘ririsiwaka hi lava va hi xanisaka ni lava va hi karhataka,’ Yehovha u ta hi ponisa na hina tanihi malandza yakwe yo tshembeka. (Vaavanyisi 2:16-18; 3:9, 15) Entiyisweni, buku ya Bibele ya Vaavanyisi yi hi tiyisekisa hi leswi, ni hi ku ponisa lokukulu loku Xikwembu xi nga ta ku endla hi ku tirhisa Muavanyisi wa xona loyi xi n’wi hlawuleke, Yesu Kreste.

9 A hi tlheleleni emasikwini ya Muavanyisi Baraka. Vaisrayele va langutane ni malembe ya 20 ya ku fumiwa ka tihanyi hi Hosi Yabini wa Mukanana hikwalaho ka vugandzeri bya mavunwa ni ku fularheriwa hi Xikwembu. Sisera i ndhuna ya vandla lerikulu ra nyimpi ra Vakanana. Kambe ‘xitlhangu, kumbe tlhari a swi nga kumeki eka Vaisrayele va 40 000’ hambileswi nhlayo ya vanhu va tiko a yi ri kwalomu ka mune wa timiliyoni. (Vaavanyisi 5:6-8) Vaisrayele va huwelele eka Yehovha hi ku tisola. Hilaha Xikwembu xi leriseke hakona hi ku tirhisa muprofeta wa xisati Debora, Baraka u hlengeleta vavanuna va 10 000 eNtshaveni ya Tabora, kutani Yehovha a yengela nala enkoveni lowu nga ehansi ka Tabora leyi tlakukeke. Hiloko mavuthu ya Sisera ni makalichi ya 900 ya nyimpi, lama nga ni huwa leyi kotisaka ya ku dzindza ka tilo, ma tsemakanya rivala rero ni vuandlalo bya nkova wa Kixoni lowu omeke. Kambe mpfula leyikulu yi tata Kixoni hi mati yo tala swinene. Loko Baraka ni vavanuna vakwe va gwirima va rhelela eNtshaveni ya Tabora ku ri karhi ku na mpfula ya matimba, va vone khombo leri chavisaka leri tisiweke hi ku hlundzuka lokukulu ka Yehovha. Vavanuna va Baraka va tlhava Vakanana lava chavaka, lava a va ri karhi va baleka, naswona a nga kona ni un’we la balekeke. Hakunene lexi i xitsundzuxo eka vanhu lava va hi tshikilelaka lava va nga ni ntiya-nhlana wo lwa ni Xikwembu!—Vaavanyisi 4:3-16; 5:19-22.

10. Ha yini hi nga tiyisekaka leswaku Xikwembu xi ta ma ponisa malandza ya xona ya manguva lawa eka hinkwavo lava va ma xanisaka?

10 Yehovha u ta ponisa malandza yakwe ya namuntlha eka valala va wona hinkwavo lava va ma xanisaka, hilaha a poniseke Vaisrayele lava chavaka Xikwembu hakona loko va ri ekhombyeni. (Esaya 43:3; Yeremiya 14:8) Xikwembu xi ponise Davhida “[e]mav̌okweni ya v̌alala v̌a yena hikwav̌o.” (2 Samuwele 22:1-3) Xisweswo, hambiloko hi tshikileriwa kumbe hi xanisiwa hileswi hi nga vanhu va Yehovha, a hi veni ni xivindzi, hikuva Hosi yakwe leyi nga Mesiya yi ta hi ntshunxa eku tshikileriweni. Ina, “yi ta kuṭula v̌utomi bya ŝisiwana. Yi ta kuṭula mimoya ya v̌ona e ku šanisiweni ni le ku wutleriweni.” (Pisalema 72:13, 14) Ku kutsuriwa koloko ku kwala nyongeni.

Xikwembu Xi Ponisa Lava Va Xi Tshembaka

11. Xana Davhida lontsongo u nyikele xikombiso xihi xa ku tshembela eka Yehovha?

11 Leswaku hi ponisiwa hi Yehovha, hi fanele hi n’wi tshemba hi xivindzi. Davhida u kombise ku tshembela eka Xikwembu hi xivindzi loko a ya hlangana ni nhenha leyi vuriwaka Goliyadi. Ehleketa hi xihontlovila xa Mufilista xi yime emahlweni ka Davhida lontsongo, la huwelelaka a ku: “U tile ka mina hi banga, ni tlhari, ni ntlhuv̌ana, kambe mina nḍi ta ka wena hi v̌ito ra Yehova wa mav̌andla, ni ra Šikwembu ša tinyimpi ta Israel leti u ti sanḍeke. Namuntlha Yehova o ta ku nyiketa mav̌okweni ya mina; nḍi ta ku tlhav̌a, nḍi ku ṭema nhloko; namuntlha nḍi ta nyika tinyanyana ta tilo ni ŝiv̌anḍana ŝa misav̌a e miṭumbu ya nyimpi ya v̌a-Filista: misav̌a hikwayo yi ta tiv̌a leŝaku Šikwembu ša Israel ši kona. Nhlengeletano hikwayo leyi yi ta tiv̌a leŝaku Yehova wa ponisa, kambe ku nga ri hi banga ni matlhari; hikuv̌a ku lwa ni ku hlula, i ka Yehova.” Hi ku copeta ka tihlo Goliyadi a a file, naswona Vafilista va hluriwe hi ku helela. Swi le rivaleni leswaku Yehovha u va ponisile vanhu vakwe.—1 Samuwele 17:45-54.

12. Ha yini swi nga va leswi pfunaka ku tsundzuka wanuna wa matimba, wa Davhida, la vuriwaka Eliyazara?

12 Loko hi langutane ni vaxanisi, swi nga ha lava leswaku hi “va ni xivindzi” kutani hi tshemba Xikwembu hi ku helela. (Esaya 46:8-13, NW; Swivuriso 3:5, 6) Anakanya hi xiendlakalo lexi xi humeleleke endhawini leyi vuriwaka Pasa-damima. Israyele a balekile emahlweni ka mavuthu ya Vafilista. Kambe ku chava a ku endlanga leswaku Eliyazara, un’wana wa vavanuna va matimba va Davhida a baleka. U yime a tiya emasin’wini ya maxalana, a dlayetela Vafilista a ri swakwe hi banga. Xisweswo, ‘Yehovha a ponisa Israyele hi ku ponisa lokukulu.’ (1 Tikronika 11:12-14; 2 Samuwele 23:9, 10) A nga kona munhu la languteleke leswaku hi lwa ni vuthu ra nyimpi hi ri hexe. Kambe, minkarhi yin’wana hi nga ha tikuma hi ri hexe, hi tshikileriwe hi valala. Xana hi xikhongelo hi ta tshembela eka Yehovha, Xikwembu xa swiendlo swa ku ponisa? Xana hi ta lava mpfuno wakwe leswaku hi papalata ku xenga vapfumeri-kulorhi eka vaxanisi?

Yehovha U Ponisa Lava Hlayisaka Vutshembeki

13. Ha yini a swi nonon’hwa eka mfumo wa Israyele wa tinyimba ta khume ku hlayisa vutshembeki eka Xikwembu?

13 Leswaku hi ponisiwa hi Yehovha, hi fanele hi hlayisa vutshembeki eka yena ku nga khathariseki hinkwaswo leswi nga ta hi wela. Vanhu va Xikwembu va le minkarhini ya khale va langutane ni miringo yo hambana-hambana. Ehleketa hi leswi a wu ta va u langutane na swona loko a wu hanye emfun’weni wa tinyimba ta khume ta Israyele. Tihanyi ta Rhobuwamu ti susumetele tinyimba ta khume leswaku ti tshika ku n’wi seketela kutani ti simeka mfumo wa Israyele wa le n’walungwini. (2 Tikronika 10:16, 17; 11:13, 14) Eka tihosi ta wona to tala, Yehu hi yena loyi a a ri hosi leyinene, kambe na yena ‘a nga fambanga hi mbilu yakwe hinkwayo enawini wa Yehovha.’ (2 Tihosi 10:30, 31) Nilokoswiritano, a ku ri ni lava a va hlayisa vutshembeki eka mfumo lowu wa tinyimba ta khume. (1 Tihosi 19:18) Va ve ni ripfumelo eka Xikwembu, naswona xi va seketerile. Ku nga khathariseki ku ringiwa ka ripfumelo ra wena, xana u hlayisa vutshembeki eka Yehovha?

14. Xana hi kwihi ku ponisa loku endliweke hi Yehovha emasikwini ya Hosi Hezekiya, naswona i yini lexi endleke leswaku Babilona wu hlula Yuda?

14 Mfumo wa Israyele wu weriwe hi khombo hikwalaho ka ku nga wu xiximi Nawu wa Xikwembu. Loko Vaasiriya va wu hlula hi 740 B.C.E., handle ko kanakana vanhu van’wana lava a va huma eka tinyimba leti ta khume va balekele eka mfumo wa tinyimba timbirhi ta Yuda, laha a va ta gandzela Yehovha etempeleni yakwe. Tihosi ta mune ta Yuda eka leta 19 leti a ti huma erixakeni ra Davhida—Asa, Yehoxafati, Hezekiya na Yosiya—a ti tinyiketele swinene eka Xikwembu. Emasikwini ya Hezekiya loyi a a hlayisa vutshembeki, Vaasiriya va fikile ku ta hlasela Yuda va ri ni vuthu ra matimba. Loko Xikwembu xi hlamula swirilo swa Hezekiya, xi tirhise ntsumi yin’we ntsena ku dlaya Vaasiriya lava ringanaka 185 000 hi vusiku byin’we, xisweswo, xi ponisa vagandzeri va xona! (Esaya 37:36-38) Hi ku famba ka nkarhi, ku tsandzeka ka vanhu ku hlayisa Nawu ni ku yingisa switsundzuxo swa vaprofeta va Xikwembu, swi endle leswaku Babilona ri hlula Yuda ni leswaku ntsindza wa wona, ku nga Yerusalema ni tempele ya wona, swi lovisiwa hi 607 B.C.E.

15. Ha yini Vayuda lava a va ri evukhumbini eBabilona a va fanele va tiyisela, naswona Yehovha u va kutsule njhani eku heteleleni?

15 Vayuda lava a va ri evukhumbini a va fanele va tiyisela leswaku va swi kota ku hlayisa vutshembeki eka Xikwembu loko va bohiwile eBabilona ku ringana malembe ya 70 ya gome. (Pisalema 137:1-6) Un’wana la xiyekaka swinene la hlayiseke vutshembeki a ku ri muprofeta Daniyele. (Daniyele 1:1-7; 9:1-3) Anakanya ndlela leyi a faneleke a tsake ha yona loko nawu wa Korexe Hosi ya Peresi wu sungule ku tirha hi 537 B.C.E., wu pfumelela Vayuda leswaku va tlhelela eYuda va ya pfuxa tempele! (Ezra 1:1-4) Daniyele ni van’wana va tiyisele malembe yo tala, kambe eku heteleleni va vone Babilona wu hluriwa ni vanhu va Yehovha va kutsuriwa. Leswi swi fanele swi hi pfuna leswaku na hina hi tiyisela loko hi rindzele ku lovisiwa ka “Babilona Lonkulu,” mfumo wa misava hinkwayo wa vukhongeri bya mavunwa.—Nhlavutelo 18:1-5.

Yehovha U Ponisa Vanhu Vakwe Minkarhi Hinkwayo

16. Xana hi kwihi ku ponisa loku Xikwembu xi ku endleke emasikwini ya Hosi ya xisati Estere?

16 Yehovha wa ma ponisa malandza yakwe minkarhi hinkwayo loko ma khomelela evitweni rakwe. (1 Samuwele 12:22; Esaya 43:10-12) Anakanya hi masiku ya Estere lowa Hosi ya xisati—eka lembe-xidzana ra vuntlhanu B.C.E. Hosi Ahasuwerusi (Xerxes wo Sungula) a a hlawule Hamani leswaku a va holobyenkulu. Hi ku va a hlundzukisiwe hileswi Mordekayi lowa Muyuda a aleke ku n’wi nkhinsamela, Hamani u kunguhate ku n’wi lovisa swin’we ni Vayuda hinkwavo eMfun’weni wa Vaperesiya. U va vula vanhu lava tlulaka nawu, a yenga hosi hi mali, naswona u pfumeleriwa ku tirhisa xingwavila xo fungha xa hosi leswaku a tiyisekisa tsalwa leri lerisaka leswaku va herisiwa. Hi xivindzi Estere u paluxa eka hosi leswaku yena u huma eka rixaka ra Vayuda, a paluxa ni kungu ra Hamani ro dlaya. Ku nga ri kungani Hamani a a lenga-lenga emhandzini leyi a yi lunghiselele ku dlayela Mordekayi eka yona. Mordekayi u endliwa holobyenkulu, naswona u nyikiwe matimba yo pfumelela Vayuda ku tilwela. Va hlula valala va vona hi ku hlula lokukulu. (Estere 3:1–9:19) Xiendlakalo lexi xi fanele xi tiyisa ripfumelo ra hina leswaku Yehovha u ta ponisa malandza yakwe ya manguva lawa lama n’wi yingisaka.

17. Xana ku yingisa ku hoxe xandla hi ndlela yihi eku kutsuriweni ka Vakreste va Vayuda va lembe-xidzana ro sungula lava a va tshama eYudiya?

17 Xivangelo xin’wana lexi endlaka leswaku Xikwembu xi ponisa vanhu va xona hi leswi va yingisaka xona ni N’wana wa xona. Tiveke exiyin’weni xa vadyondzisiwa va Yesu va Vayuda va lembe-xidzana ro sungula. Wa va byela: “Loko mi vona Yerusalema wu rhendzeriwa hi mavuthu lama goveke, kutani swi tiveni leswaku ku lovisiwa ka wona ku tshinele. Kutani lava nga eYudiya a va balekele etintshaveni.” (Luka 21:20-22) Malembe ma hundza, kutani swi nga ha endleka u tivutisa nkarhi lowu marito lawa ma nga ta hetiseka ha wona. Hiloko ku va ni ku pfukela ka Vayuda hi 66 C.E. Mavuthu ya Rhoma ehansi ka Cestius Gallus ma rhendzela Yerusalema ku ya fika emakhumbini ya tempele. Hi xitshuketa, Varhoma va suka ku nga ri na xivangelo lexi twalaka. Xana Vakreste lava nga Vayuda a va ta endla yini? Eka Ecclesiastical History yakwe (Buku ya vunharhu, ndzima ntlhanu, 3), Eusebius u vula leswaku va baleke eYerusalema na Yudiya. Va ponile hikuva va yingise xitsundzuxo xa Yesu lexi profetiweke. Xana na wena wa hatlisa ku yingisa nkongomiso wa Matsalwa lowu nyikeriwaka hi ku tirhisa “mulanguteri wo tshembeka” la vekiweke ehenhla ka “swilo” swa Yesu hinkwaswo?—Luka 12:42-44.

Ku Ponela eVuton’wini Lebyi Nga Heriki

18, 19. (a) Xana i ku ponisa kwihi loku rifu ra Yesu ri ku tiseke, naswona eka vamani? (b) Xana muapostola Pawulo a a tiyimisele ku endla yini?

18 Ku yingisa xitsundzuxo xa Yesu swi ponise vutomi bya Vakreste va Vayuda eYudiya. Kambe rifu ra Yesu ri endle leswaku swi koteka eka “vanhu va mixaka hinkwayo” leswaku va pona va ta kuma vutomi lebyi nga heriki. (1 Timotiya 4:10) Vanhu va lave nkutsulo loko Adamu a dyoha, xisweswo a lahlekeriwa hi vutomi, a tlhela a nghenisa vanhu hinkwavo evuhlongeni bya xidyoho ni rifu. (Varhoma 5:12-19) Magandzelo ya swiharhi lawa a ma nyikeriwa ehansi ka Nawu wa Muxe a ku ri xikombiso ntsena xa ku funengeta xidyoho. (Vaheveru 10:1-4) Tanihi leswi Yesu a a nga ri na tatana wa nyama, naswona entiyisweni moya lowo kwetsima wa Xikwembu wu ‘funengeteke’ Mariya ku sukela enkarhini lowu a tikeke ha wona ku fikela loko Yesu a velekiwa, u velekiwe a nga xi tekelelanga xidyoho kumbe ku nga hetiseki tanihi ndzhaka. (Luka 1:35; Yohane 1:29; 1 Petro 1:18, 19) Loko Yesu a fa tanihi muhlayisi wa vutshembeki la hetisekeke, u nyikele hi vutomi byakwe lebyi hetisekeke leswaku a tlhela a xava ni ku ntshunxa vanhu. (Vaheveru 2:14, 15) Hikwalaho, Kreste u “tinyike[rile] leswaku a va nkutsulo lowu yelanaka eka hinkwavo.” (1 Timotiya 2:5, 6) A hi vanhu hinkwavo lava nga ta tihumelerisa leswaku va kuma lunghiselelo leri ra ku ponisiwa, kambe Xikwembu xi pfumelela leswaku lava va wu amukelaka hi ripfumelo, va pfuneka.

19 Kreste u tlhele a xava vana va Adamu hi ku nyikela hi ntikelo wa gandzelo rakwe ra nkutsulo eka Xikwembu etilweni. (Vaheveru 9:24) Xisweswo Yesu u kume Mutekiwa, la vumbiweke hi valandzeri vakwe lava totiweke va 144 000, lava pfuxeriweke evuton’wini bya le tilweni. (Vaefesa 5:25-27; Nhlavutelo 14:3, 4; 21:9) U tlhela a va “Tatana l’a nga riki na ku hela” eka lava va amukelaka gandzelo rakwe ni ku kuma vutomi lebyi nga heriki bya laha misaveni. (Esaya 9:6, 7; 1 Yohane 2:1, 2) Mawaku lunghiselelo ra rirhandzu swonghasi! Ku ri tlangela ka Pawulo ku vonaka etsalweni rakwe ra vumbirhi leri huhuteriweke leri yaka eka Vakreste va le Korinto, hilaha xihloko lexi landzelaka xi nga ta kombisa hakona. Entiyisweni, Pawulo a a tiyimiserile leswaku a nga pfumeleli nchumu xi n’wi sivela ku pfuna vanhu leswaku va amukela lunghiselelo leri lerinene ra Yehovha leswaku va ponisiwa, va kuma vutomi lebyi nga heriki.

Xana A Wu Ta Hlamurisa Ku Yini?

◻ Xana hi byihi vumbhoni bya Matsalwa lebyi kombisaka leswaku Xikwembu xa va ponisa vanhu va xona lavo lulama?

◻ Hi swi tivisa ku yini leswaku Yehovha wa va ponisa lava va n’wi tshembaka ni ku tshama va tshembekile?

◻ Xana hi rihi lunghiselelo leri Xikwembu xi ri endleke ra ku poniseriwa makumu?

[Xifaniso lexi nga eka tluka 12]

Davhida u tshembe Yehovha, “Xikwembu xa swiendlo swa ku ponisa.” Xana wena wa n’wi tshemba?

[Xifaniso lexi nga eka tluka 15]

Yehovha minkarhi hinkwayo wa va ponisa vanhu vakwe, hi laha a kombiseke ha kona esikwini ra Nkosikazi Estere

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela