Misava A Yi Nga Va Fanelanga
“Va khandliwile hi maribye, va pulukanyisiwile, . . . misava a yi nga va fanelanga.”—VAHEVERU 11:37, 38.
1, 2. Timbhoni ta Yehova ta minkarhi ya khale ti hlayise vutshembeki ehansi ka swiyimo swihi, naswona xana mintirho ya vona yi khumba malandza ya Xikwembu namuntlha hi ndlela yihi?
TIMBHONI TA YEHOVA ta minkarhi ya khale ti hlayise vutshembeki eka Xikwembu ku nga khathariseki miringo yo tala leyi tisiwaka ehenhla ka vona hi vandla ra vanhu lavo biha. Hi xikombiso, malandza ya Xikwembu ya khandliwile hi maribye ni ku dlayiwa hi fumu. Ya xanisiwe hi ku yingayingisiwa ni nhlomulo. Hambi swi ri tano a va tsekatsekanga eripfumelweni. Kutani, hakunene hi laha muapostola Pawulo a vuleke ha kona: “Misava a yi nga va fanelanga.”—Vaheveru 11:37, 38.
2 Swiendlo leswi nyikaka ripfumelo swa vanhu va khale lava chavaka Xikwembu, vapatriarka na Muxe swi vangela timbhoni ta Yehova ta manguva lawa leswaku ti tirhela Xikwembu hi ripfumelo. Kambe ku vuriwa yini hi van’wana lava va boxiweke eka Vaheveru tindzima 11 na 12? Xana hi nga pfunekisa ku yini hi ku xiya timhaka ta ripfumelo ra vona ke?
Ripfumelo Ra Vaavanyisi, Tihosi Ni Vaprofeta
3. Xana swiendlakalo leswi katsaka Yeriko na Rahava swi kombisa njhani leswaku ripfumelo ri fanele ku kombisiwa hi mintirho ke?
3 Ripfumelo a hi ku tshembanyana ntsena; ri fanele ku kombisiwa hi mintirho kumbe swiendlo. (Hlaya Vaheveru 11:30, 31.) Endzhaku ka rifu ra Muxe, ripfumelo ri tisele Vaisrayele ku hlula loku landzelanaka eKanana, kambe leswi swi lave matshalatshala eka vona. Hi xikombiso, hi ripfumelo ra Yoxuwa ni van’wana “makhumbi ya rihlampfu ra Yeriko ma mbundzumukile, endzhaku ka loko ya rhendzelekeriwe hi masiku ya 7.” Kambe “hi ku pfumela, Rahava nsati wa vuoswi a nga lovanga ni [vaaki-tiko va Yeriko lava nga riki na ripfumelo] lava va nga ala ku yingisa.” Ha yini? “Hikuva ú amukerile tinhlori [ta Vaisrayele] hi malwandla,” a kombisa ripfumelo ra yena hi ku va fihla eka Vakanana. Ripfumelo ra Rahava a ri ri na xisekelo xo tiya eka swiviko swa leswaku ‘Yehova u omise mati ya Lwandle lero Tshwuka’ emahlweni ka Vaisrayele ivi a va nyika ku hlula ehenhla ka tihosi ta va-Amor ku nga Sihon na Og. Rahava u endle ku cinca lokunene ka mahanyelo ivi a katekisiwa hikwalaho ka ripfumelo ra yena leri gingiritekaka hi ku hlayisiwa ni ndyangu wa yena loko Yeriko yi wa na hi ku va kokwana wa xisati wa Yesu Kriste.—Yoxuwa 2:1-11; 6:20-23; Matewu 1:1, 5; Yakobo 2:24-26.
4. Mintokoto ya Gidiyoni na Baraka yi kandziyisisa yini malunghana ni ku kombisa ripfumelo emahlweni ka khombo?
4 Ripfumelo ri kombisiwa hi ku tshembela loku heleleke eka Yehova loko u langutane ni khombo. (Hlaya Vaheveru 11:32.) Pawulo u pfumerile leswaku nkarhi a wu ta n’wi helela loko o ya emahlweni a vulavula hi “Gidiyoni, na Baraka, na Samsoni, na Yefta, ni ta Davhida na Samiyele, ni ta vaprofeta,” lava matshalatshala ya vona ya nyikeke vumbhoni byo tala bya ripfumelo ni ku tshembela eka swiyimo swa khombo. Xisweswo, hi ripfumelo na hi vuthu ra 300 wa vavanuna ntsena, Muavanyisi Gidiyoni u tiyisiwe hi Xikwembu leswaku a phyandlasa matimba ya nyimpi ya va-Mediya lava tshikilelaka. (Vaavanyisi 7:1-25) Hi ku khutaziwa hi muprofeta wa xisati Debora, Muavanyisi Baraka ni vuthu leri fambaka hi milenge ra vavanuna va 10 000 lava nga hlomangiki kahle va hlule mavuthu lamakulu ya Hosi Yabini ya ri ni magolonyi ya 900 ya nyimpi ya rhangeriwa hi Sisera.—Vaavanyisi 4:1–5:31.
5. Samsoni na Yefta va kombise ripfumelo leri nyikeke vumbhoni bya ku tshemba Yehova hi laha ku heleleke hi tindlela tihi?
5 Xikombiso xin’wana xa ripfumelo ku sukela emasikwini ya vaavanyisi va Israyele a ku ri Samsoni, nala wa matimba wa va-Filista. I ntiyiso, eku heteleleni u ve hlonga ra vona leri nga bofu. Kambe Samsoni u dlele vo tala va vona loko a wise tiphuphu ta yindlu leyi a va nyikela gandzelo lerikulu eka xikwembu xa vona xo hemba Dagon eka yona. Ina, Samsoni, u fe ni va-Filista volavo kambe ku nga ri hi ku tisunga loku nga riki na ntshembo. Hi ripfumelo u tshembele eka Yehova naswona u khongelele matimba lama lavekaka eka yena leswaku a endla ku rihisela ehenhla ka valala volavo va Xikwembu ni vanhu va Xona. (Vaavanyisi 16:18-30) Yefta, loyi Yehova a n’wi nyikeke ku hlula ehenhla ka va-Amon, na yena u kombise ripfumelo leri nyikeke vumbhoni bya ku tshembela ka yena loku heleleke eka Yehova. A ku ri hi ripfumelo ro tano ntsena laha a a ta hetisisa xitshembiso xa yena eka Xikwembu hi ku nyikela n’wana wa yena wa wanhwana entirhweni wa Yehova tanihi ntombhi ya nkarhi hinkwawo.—Vaavanyisi 11:29-40.
6. Xana Davhida u kombise ripfumelo ra yena hi ndlela yihi?
6 Nakambe la xiyekaka hikwalaho ka ripfumelo ra yena a ku ri Davhida. A a ri jaha ntsena loko a lwa ni xihontlovila xa mu-Filista Goliat. Davhida u te: ‘U ta ka mina hi banga, ni tlhari, ni ntlhuvana, kambe mina ndzi ta ka wena hi vito ra Yehova wa mavandla.’ Ina, Davhida a a tshembela eka Xikwembu, u dlaye mu-Filista wa xihontlovila, kutani a ya emahlweni a va hosi ya vurhena ya tinyimpi a lwela timhaka ta vanhu va Xikwembu. Naswona hikwalaho ka ripfumelo ra Davhida, a a ri wanuna loyi a tsakisaka mbilu ya Yehova. (1 Samuel 17:4, 45-51; Mintirho 13:22) Vutomi bya vona hinkwabyo, Samuyele ni vaprofeta van’wana na vona va kombise ripfumelo lerikulu ni ku tshembela loku teleke eka Xikwembu. (1 Samuel 1:19-28; 7:15-17) Mawaku xikombiso lexinene eka malandza ya Yehova ya namuntlha, lavantsongo ni lavakulu!
7. (a) I vamani ‘lava hi ripfumelo va hluleke matiko lama kanetaka’? (b) I vamani ‘lava avanyiseke hi ku lulama’ hi ku tirhisa ripfumelo?
7 Hi ripfumelo hi nga langutana ni ndzingo wun’wana ni wun’wana wa vutshembeki hi laha ku humelelaka naswona hi nga endla xin’wana ni xin’wana lexi pfumelelanaka ni ku rhandza ka le tilweni. (Hlaya Vaheveru 11:33, 34.) Loko a tshaha mintirho yin’wana ya ripfumelo, kahle-kahle Pawulo a a tsundzuka vaavanyisi, tihosi ni vaprofeta va Vaheveru, hikuva u vule vavanuna vo tano hi mavito. “Hi ku pfumela” vaavanyisi vo tano tanihi Gidiyoni na Yefta “va hlurile matiko.” Hosi Davhida na yena u endle tano, loyi a hluleke va-Filista, va-Moab, va-Siria, va-Edom ni van’wana. (2 Samuel 8:1-14) Nakambe hi ripfumelo, vaavanyisi lavanene “va avanyisile hi ku lulama,” naswona xitsundzuxo xo lulama xa Samuyele ni vaprofeta van’wana xi susumetele van’wana ku papalata kumbe ku tshika ku endla leswo biha.—1 Samuel 12:20-25; Esaya 1:10-20.
8. I xitshembiso xihi lexi Davhida a xi kumeke, naswona xi yise eka yini?
8 Davhida a a ri un’wana loyi hi ripfumelo ‘a kumeke switshembiso.’ Yehova u n’wi tshembisile a ku: “V̌uhosi bya wena byi ta ṭhama hi laha ku nga heriki.” (2 Samuel 7:11-16) Naswona Xikwembu xi hlayise xitshembiso xexo hi ku simeka Mfumo wa Vumesiya hi 1914.—Esaya 9:6, 7; Daniel 7:13, 14.
9. Hi le hansi ka swiyimo swihi laha ‘milomu ya tinghala yi siviweke hikwalaho ka ripfumelo’?
9 Muprofeta Daniyele u langutane ni ndzingo wa vutshembeki hi laha ku humelelaka loko a hambeta a khongela Xikwembu hi ku ya hi mukhuva wa yena wa siku na siku ku nga khathariseki nsivelo wa le vuhosini. Hi ripfumelo ra muhlayisi wa vutshembeki, Daniyele u “sivile milomo ya tinghala” hi mhaka ya leswi Yehova a n’wi hlayiseke a hanya ekheleni ra tinghala leri a a hoxiwe eka rona.—Daniel 6:4-23.
10. I vamani lava ‘timeke mindzilo leyo leva’ hikwalaho ka ripfumelo, naswona ripfumelo leri fanaka ri ta hi endla leswaku hi kota ku endla yini?
10 Vanghana va Daniyele lava hlayisaka vutshembeki va Vaheveru, Xadrak, Mexak na Abednigo va “timile minḍilo leyo lev̌a” hi laha ku humelelaka. Loko va xungetiwe hi rifu etiveni ra ndzilo lowu hisaka ku tlula mpimo, va byele Hosi Nebukadnetsar leswaku, hambi Xikwembu xa vona xa va ponisa kumbe a xi va ponisi, va nga ka va nga tirheli swikwembu swa tihosi ta Babilona kumbe ku gandzela xifaniso lexi a xi yimiseke. Yehova a nga kalanga a tima ndzilo etiveni rolero, kambe u tiyisekile leswaku a wu va vavisanga Vaheveru volavo vanharhu. (Daniel 3:1-30) Ripfumelo leri fanaka ri hi pfuna ku hlayisa vutshembeki eka Xikwembu ku ya fika eka yinhla ya rifu ra xiviri emavokweni ya nala.—Nhlavutelo 2:10.
11. (a) Hi ripfumelo, i vamani lava va nga “pona ku tlhaviwa hi matlhari”? (b) I vamani lava va nga “kuma matimba” hi ku tirhisa ripfumelo? (c) I vamani lava nga ‘hundzuka tinghwazi ta matimba eku lweni’ naswona va “hlongorisa tinyimpi ta v̌alala” ke?
11 Davhida u ‘pone ku tlhaviwa hi fumu’ ra vavanuna va Hosi Sawulo. (1 Samuel 19:9-17) Vaprofeta Eliya na Elixa na vona va pone rifu ra tlhari. (1 Tihosi 19:1-3; 2 Tihosi 6:11-23) Kambe i vamani lava ‘ku suka eka xiyimo xo tsana va endliweke lava nga ni matimba hikwalaho ka ripfumelo ke’? Ina, Gidiyoni u xiye yena ni vavanuna va yena va ri lava tsaneke ngopfu lerova va nga ponisa Vaisrayele eka va-Midian. Kambe u ‘nyikiwe matimba’ hi Xikwembu, lexi n’wi nyikeke ku hlula—naswona hi 300 wa vavanuna ntsena! (Vaavanyisi 6:14-16; 7:2-7, 22) ‘Ku suka eka xiyimo lexi tsaneke’ loko misisi ya yena yi tsemiwile, Samsoni u ‘nyikiwe matimba’ hi Yehova ivi a dlaya va-Filista vo tala. (Vaavanyisi 16:19-21, 28-30; ringanisa Vaavanyisi 15:13-19.) Pawulo a nga ha va a tlhele a tsundzuka Hosi Ezekiyasi tanihi un’wana loyi a ‘nyikiweke matimba’ ku suka eka xiyimo xo tsana hi tinyimpi ni le mirini. (Esaya 37:1-38:22) Exikarhi ka malandza ya Xikwembu lawa ya hundzukeke ‘tinhenha ta matimba eku lweni’ a ku ri na Muavanyisi Yefta na Hosi Davhida. (Vaavanyisi 11:32, 33; 2 Samuel 22:1, 2, 30-38) Naswona lava va nga ‘tsutsumisa tinyimpi ta valala’ va katse Muavanyisi Baraka. (Vaavanyisi 4:14-16) Swiendlakalo leswi hinkwaswo swi fanele ku hi khorwisa leswaku hi ripfumelo hi nga hlangavetana ni ndzingo wun’wana ni wun’wana wa vutshembeki bya hina hi laha ku humelelaka naswona hi nga endla xin’wana ni xin’wana lexi pfumelelanaka ni ku rhandza ka Yehova.
Van’wana Va Xikombiso Xa Ripfumelo
12. (a) I ‘vavasati’ vahi lava tlheleke va kuma vafi va vona lava pfuxiweke eku feni? (b) Ku pfuxiwa ka vanhu van’wana eku feni ku ta va loku ‘antswaka’ hi ndlela yihi?
12 Ripfumelo ri katsa ku tshemba ku pfuxiwa ka vafi, ntshembo lowu hi pfunaka ku hlayisa vutshembeki eka Xikwembu. (Hlaya Vaheveru 11:35.) Hikwalaho ka ripfumelo, “vavasati va tlhele va kuma vafi va vona lava pfuxiweke eku feni.” Hi ku pfumela ni matimba ya Xikwembu, Eliya u pfuxe n’wana wa noni eku feni eSarepta naswona Elixa u pfuxele n’wana wa nsati wa Sunem evuton’wini. (1 Tihosi 17:17-24; 2 Tihosi 4:17-37) “Van’wana va kombiwile maxangu [hi xiviri, “va biwa hi minkhavi”] kambe va ala ku ntshunxiwa, leswaku va ta pfukela evuton’wini lebyi antswaka.” Kahle-kahle timbhoni leti ta Yehova leti nga kombisiwangiki hi ku ya hi Matsalwa ti biwe ti kondza ti fa, ti ala ku amukela ntshunxeko lowu lavaka leswaku va landzula ripfumelo ra vona. Ku pfuka ka vona ku ta va ‘loku antswaka’ hikuva ku nge vi na xilaveko lexi nga papalatekiki xa ku fa nakambe (ku fana ni lava va pfuxiweke hi Eliya na Elixa) naswona ku ta endleka ehansi ka vulawuri bya Mfumo ha Yesu Kriste, “Tatana l’a nga Riki na ku Hela” loyi nkutsulo wa yena wu lunghiselelaka nkarhi wa vutomi lebyi nga heriki emisaveni.—Esaya 9:6; Yohane 5:28, 29.
13. (a) I vamani lava xanisiweke hi “ku hlekuriwa ni ku biwa?” (b) I vamani lava tokoteke ‘timpecana ni ku hoxiwa ekhotsweni’?
13 Loko hi ri na ripfumelo, hi ta swi kota ku tiyisela nxaniso. (Hlaya Vaheveru 11:36-38.) Loko hi xanisiwa, swa pfuna ku tsundzuka ntshembo wa ku pfuxiwa ka vafi ni ku xiya leswaku Xikwembu xi nga hi tiyisa hi laha xi endleke ha kona eka “van’wana [lava xanisiweke] hi ku hlekuriwa [kumbe, ndzingo wa ripfumelo] ni ku biwa, hambi ku ri ku bohiwa hi timpecana, va hoxiwa ekhotsweni.” Vaisrayele “. . . v̌a hleka v̌aprofeta v̌a šona, v̌ukari bya Yehova byi ko byi pfuka tiko ra yena ŝonghasi.” (2 Tikronika 36:15, 16) Hi ku pfumela, Mikeya, Elixa ni malandza yan’wana ya Xikwembu va tiyisele ku “hlekuriwa.” (1 Tihosi 22:24; 2 Tihosi 2:23, 24; Psalma 42:3) “Ku biwa” a ku tiviwa emasikwini ya tihosi ta Israyele ni vaprofeta, naswona valala va ‘be’ Yeremiya, va nga n’wi bi kantsongo ntsena tanihi ndzhukano. ‘Ku bohiwa ni makhotso’ swi nga ha hi tsundzuxa mintokoto ya yena kun’we ni liya ya vaprofeta Mikeya na Hanani. (Yeremia 20:1, 2; 37:15; 1 Tihosi 12:11; 22:26, 27; 2 Tikronika 16:7, 10) Hikwalaho ka ku va na ripfumelo leri fanaka, Timbhoni ta Yehova ta manguva lawa ti swi kotile ku tiyisela minxaniso leyi fanaka “hikwalaho ka leswo lulama.”—1 Petro 3:14.
14. (a) I vamani lava a va ri exikarhi ka lava ‘khandliweke hi maribye’? (b) I vamani lava nga ha vaka va ‘sahiwe hi le xikarhi’?
14 Pawulo u te: “Va khandliwile hi maribye.” Wanuna un’wana wa ripfumelo ro tano a ku ri Zakariya, n’wana muprista Yehoyada. Loko a funengetiwe hi moya wa Xikwembu, u vulavurile a lwisana ni vagwinehi va Vayuda. Vuyelo-ke? Hi ku lerisa ka Hosi Yowasi, vagwinehi va n’wi khandle hi maribye ku kondza a fa ehubyeni ya yindlu ya Yehova. (2 Tikronika 24:20-22; Matewu 23:33-35) Pawulo u engeterile a ku: “Va pulukanyisiwile hi le xikarhi hi ku sahiwa.” A nga ha va a tsundzuke muprofeta Mikeya tanihi un’wana wa lava ‘pulukanyisiweke,’ naswona mukhuva lowu nga tiyisekangiki wa Vayuda wu vula leswaku Esaya u sahiwe a va swiphemu swimbirhi enkarhini wa ku fuma ka Hosi Manase.—1 Tihosi 22:24-28.
15. I vamani lava ‘yinga-yingisiweke’ ni ku ‘tsendzeleka emananga’?
15 Van’wana “va dlayiwile hi mabanga,” tanihi xikombiso, vaprofeta-kulobye va Eliya va Xikwembu lava va “dlayiwile hi mabanga” emasikwini ya Akab Hosi leyo biha. (1 Tihosi 19:9, 10) Eliya na Elixa a va ri exikarhi ka lava nga ni ku pfumela lava va nga “famba-famba hinkwako va ambele madzovo ya tinyimpfu ni ya timbuti, va swerile, va ri emaxangwini, va twisiwa ku vaviseka.” (1 Tihosi 19:5-8, 19; 2 Tihosi 1:8; 2:13; ringanisa Yeremia 38:6.) Lava va “[tsendzelekile] emananga ni le tintshaveni, ni le mabakweni ni le makheleni ya laha misaveni.” Tanihi mahlonga yo xanisiwa a hi fanelanga ku katsa Eliya na Elixa ntsena kambe ni 100 wa vaprofeta lava Obadiya a va fihleke hi va-50 ebakweni, a va phamela hi xinkwa ni mati loko Yezabel muoswi wa Hosi ya wansati a sungula ku “herisa v̌aprofeta v̌a Yehova.” (1 Tihosi 18:4, 13; 2 Tihosi 2:13; 6:13, 30, 31) Mawaku vahlayisi va vutshembeki! A swi hlamarisi leswi Pawulo a nga te: “Misava [vandla ra vanhu lavo homboloka] a yi nga va fanelanga.”
16. (a) Ha yini timbhoni ta Yehova ta le mahlweni ka Vukriste ti nga si amukela ‘ku hetiseka ka xitshembiso’? (b) Eka timbhoni ta Yehova ta le minkarhini ya le mahlweni ka Vukriste, ku ‘endliwa la hetisekeke’ ku fanele ku vula yini?
16 Ripfumelo ri hi nyika ku tiyiseka ka leswaku enkarhini wa Xikwembu lowu fanelekeke hinkwavo lava va n’wi rhandzaka va ‘ta kuma ku hetiseka ka leswi tshembisiweke.’ (Hlaya Vaheveru 11:39, 40.) Vahlayisi va vutshembeki va le mahlweni ka Vukriste ‘va veke vumbhoni hi ku pfumela ka vona,’ leyi sweswi ku nga mhaka ya rhekhodo ya Matsalwa. Kambe a va si amukela “leswi a va tshembisiwile swona” hi Xikwembu hi ku pfuxiwa ka vafi ka laha misaveni ni ntshembo wa vutomi lebyi nga heriki ehansi ka vulawuri bya Mfumo. Hikwalaho ka yini? “Leswaku va nga endliwi lava hetisekeke ehandle” ka valandzeri va Yesu lava totiweke, lava “Xikwembu a xi ri ni makungu man’wana lama antswaka” ha vona—vutomi lebyi nga fiki ematilweni ni malunghelo yo va vafumi-kulobye va Kriste Yesu. Hi ku pfuxiwa ka vona eku feni, loku sungulaka endzhaku ka ku simekiwa ka Mfumo hi 1914, Vakriste lava totiweke va “endliwa lava hetisekeke” ematilweni timbhoni ta Yehova ta minkarhi yo sungula ya Vukriste ti nga si pfuxiwa emisaveni. (1 Vakorinto 15:50-57; Nhlavutelo 12:1-5) Eka timbhoni teto to rhanga, ku ‘endliwa leti hetisekeke’ swi fanele swi vula ku pfuxiwa ka vona ka laha misaveni, ku va ka vona lava ‘ntshunxiweke evuhlongeni bya leswo bola’ eku heteleleni, ni ku kuma ka vona ku hetiseka ka vanhu hi mintirho ya Muprista Lonkulu Yesu Kriste ni vaprista va yena lavantsongo va 144 000 va le matilweni enkarhini wa ku Fuma ka yena ka Gidi ra Malembe.—Varhoma 8:20, 21; Vaheveru 7:26; Nhlavutelo 14:1; 20:4-6.
Tsundzuka Muhetisisi Wa Ku Pfumela Ka Hina
17, 18. (a) Leswaku hi humelela emphikizanweni wa hina wa vutomi lebyi nga heriki, hi fanele ku endla yini? (b) Yesu Kriste i “Muhetisisi wa ku pfumela ka hina” hi ndlela yihi?
17 Loko a kanele hi mintirho ya timbhoni ta Yehova ta le mahlweni ka Vukriste, Pawulo u kombetele eka xikombiso-nkulu xa ripfumelo. (Hlaya Vaheveru 12:1-3.) Mawaku xihlovo xa xikhutazo ku ‘rhendzeriwa hi vunyingi lebyikulu lebyi vekaka vumbhoni’! Leswi swi hi vangela ku cukumeta ndzhwalo wun’wana ni wun’wana lowu nga ta sivela nhluvuko wa hina wa moya. Swi hi pfuna ku papalata xidyoho xa ku lahlekeriwa kumbe ku kayivela ripfumelo ni ku tsutsuma eka mphikizano wa Vukriste wa vutomi lebyi nga heriki hi ku tiyisela. Hambi swi ri tano, leswaku hi fikelela pakani ya hina, hi fanele ku endla swin’wana leswi engetelekeke. Kambe i yini sweswo?
18 Loko hi ta humelela emphikizanweni wa hina wa vutomi lebyi nga heriki emafambiselweni lamantshwa ya Xikwembu, hi fanele ku ‘languta eka Yesu, musunguri [kumbe, Murhangeri-Nkulu] ni muhetisisi wa ku pfumela ka hina.’ Ripfumelo ra Abrahama ni vahlayisi van’wana va vutshembeki lava hanyeke emahlweni ka vutirheli bya Yesu Kriste bya laha misaveni a ri nga hetisekanga, ri nga helelanga, hi mhaka ya leswi va nga twisisangiki vuprofeta lebyi a byi nga hetisekanga enkarhini wolowo ehenhleni ka Mesiya. (Ringanisa 1 Petro 1:10-12.) Kambe hi ku velekiwa ka Yesu, vutirheli, rifu ni ku pfuxiwa eka lava feke, vuprofeta byo tala bya Vumesiya byi hetisekile. Xisweswo ripfumelo hi ku twisisa loku hetisekeke ri ‘te’ ha Yesu Kriste. (Vagalatiya 3:24, 25) Ku tlula kwalaho, a ri eka xiyimo xa yena xa le tilweni Yesu u hambetile a va Muhetisisi wa ripfumelo ra valandzeri vakwe, ku fana ni loko a chululela moya lowo kwetsima ehenhla ka vona hi Pentekosta ya 33 C.E. hi ku hlavutela loku kuriseke ripfumelo ra vona ku ya emahlweni. (Mintirho 2:32, 33; Varhoma 10:17; Nhlavutelo 1:1, 2; 22:16) Hi yi tlangela swonghasi ‘Mbhoni [L]eyo Tshembeka,’ ‘Murhangeri-Nkulu’ loyi wa Timbhoni ta Yehova!—Nhlavutelo 1:5; Matewu 23:10.
19. Ha yini Yesu a fanele ku ‘xiyiwa swinene’?
19 Leswi swi nga oloviki ku tiyisela swisolo swa lava nga hava ripfumelo, Pawulo u khutazile a ku: “Anakanyani yena [Yesu] loyi a nga tiyisela hi ndlela leyo tano, loko vadyohi va lwa na yena, leswaku mi nga karhali kumbe ku hela mbilu.” Hakunene, loko hi hlayisa mahlo ya hina ya langute eka ‘Mbhoni leyi Tshembekaka,’ Yesu Kriste, hi nga ka hi nga karhali ku endla ku rhandza ka Xikwembu.—Yohane 4:34.
20. Hi swihi swilo leswi u swi dyondzeke ehenhleni ka ripfumelo hi ku xiyisisa Vaheveru 11:1–12:3?
20 Eka ‘vunyingi lebyikulu bya timbhoni’ hi dyondza swo tala ehenhleni ka swikombiso swa ripfumelo. Hi xikombiso, ripfumelo ro fana ni leriya ra Avele ri kurisa ku tlangela ka hina ka gandzelo ra Yesu. Ripfumelo ra xiviri ri hi endla timbhoni ta xivindzi, hambi ku ri hi laha Enok a vulavuleke mahungu ya Yehova hi vurhena. Tanihi Nowa, ripfumelo ra hina ri hi susumetela leswaku hi landzela swiletelo swa Xikwembu swinene kutani hi tirha tanihi vachumayeri va leswo lulama. Ripfumelo ra Abrahama ri hi kombisa xilaveko xo yingisa Xikwembu ni ku tshemba switshembiso swa Yena, hambi loko swin’wana swa swona swi nga si hetiseka. Xikombiso xa Muxe xi kombisa leswaku ripfumelo ri endla leswaku hi swi kota ku tshama hi nga thyakisiwanga hi misava leyi ivi hi yima ni vanhu va Yehova hi ku tshembeka. Mintirho ya vaavanyisi, tihosi ni vaprofeta va Israyele yi kombisa leswaku ku pfumela eka Xikwembu ku nga hi tiyisa exikarhi ka nxaniso ni miringo. Naswona hi nkhensa swonghasi leswi xikombiso lexikulu xa Yesu Kriste xi endleke leswaku ripfumelo ra hina ri tiya naswona ri nga tsekatseki! Hikokwalaho ke, hi ri na Yesu tanihi Murhangeri wa hina na hi matimba ya Xikwembu xa hina, a hi hambeteni hi kombisa ripfumelo leri tiyiselaka tanihi Timbhoni ta Yehova.
Tinhlamulo Ta Wena Hi Tihi?
◻ I mintirho yihi ya timbhoni ta Yehova ta le mahlweni ka Vukriste leyi kombaka leswaku ripfumelo ri kombisiwa hi ku tshemba Xikwembu hi laha ku heleleke ehansi ka khombo?
◻ Ha yini ku nga vuriwaka leswaku hi nga hlangavetana ni ndzingo wun’wana ni wun’wana wa vutshembeki bya hina hi laha ku humelelaka hi ku tirhisa ripfumelo?
◻ I vumbhoni byihi lebyi nga kona bya leswaku hi ripfumelo hi nga tiyisela nxaniso?
◻ Ha yini Yesu a vitaniwa “Muhetisisi wa ku pfumela ka hina”?
◻ Timhaka tin’wana to tala ta ripfumelo hi tihi?
[Xifaniso lexi nga eka tluka 16, 17]
Davhida u kombise ripfumelo hi ku tshemba Yehova hi laha ku heleleke. Xikombiso lexinene eka vanhu va Yehova namuntlha!
[Xifaniso lexi nga eka tluka 18]
‘Vavasati va tlhele va amukela vafi va vona hi ku pfuxiwa eku feni.’ Ripfumelo eku pfuxiweni ka vafi ri hi pfuna ku hlayisa vutshembeki eka Yehova