Kombisa Ripfumelo Leri Sekeriweke eNtiyisweni

“Kutani ehandle ka ku pfumela a swi endleki ku tsakisa Xikwembu. Un’wana ni un’wana loyi a lavaka ku tshinelela Xikwembu ú fanele ku pfumela leswaku xi kona, ni leswaku xi hakela lava va xi lavaka.”—VAHEVERU 11:6.

1, 2. Xana ripfumelo ra Adamu ri ringiwe njhani, naswona vuyelo byi ve byihi?

RIPFUMELO ri lava swo tlula ku tshemba leswaku Xikwembu xi kona. Adamu, munhu wo sungula a a nga byi kanakani vukona bya Yehova Xikwembu. Xikwembu a a xi vulavule na Adamu, kumbexana ko tala hi ku tirhisa N’wana wa xona, Rito. (Yohane 1:1-3; Vakolosa 1:15-17) Kambe, Adamu u lahlekele hi ntshembo wa vutomi lebyi nga heriki hi ku tsandzeka ku yingisa Yehova ni ku kombisa ripfumelo eka yena.

² Ntsako wa Adamu wa nkarhi lowu taka wu tikombe wu onhakile loko nsati wa yena, Evha, a tlule nawu wa Yehova. Phela, mianakanyo ya ku lahlekeriwa hi nsati wakwe yi veke ripfumelo ra munhu wo sungula endzingweni! Xana Xikwembu a xi ta tlhantlha xiphiqo lexi hi ndlela leyi a yi ta endla leswaku Adamu a hambeta a ri la tsakeke ni la hlayisekeke? Hi ku hlanganyela na Evha eku tluleni ka nawu, Adamu u kombise leswaku a nga anakanyanga tano. U ringete ku tlhantlha xiphiqo hi ndlela ya yena, ematshan’weni yo lava nkongomiso wa Xikwembu. Hi ku tsandzeka ku kombisa ripfumelo eka Yehova, Adamu u tise rifu eka yena n’wini ni le ka vana va yena hinkwavo.—Varhoma 5:12.

Ripfumelo I Yini?

3. Xana nhlamuselo ya Bibele ya ripfumelo yi hambana njhani ni liya yi nyikeriwaka hi dikixinari yin’wana?

³ Dikixinari yin’wana yi hlamusela ripfumelo tanihi “ku pfumela swinene eka nchumu wo karhi lowu nga riki na vumbhoni.” Hambi swi ri tano, ku hambana ni mianakanyo yoleyo, Bibele yi kandziyisa leswi hambaneke. Ripfumelo ri sekeriwe eka mintiyiso, eka swilo swa xiviri, entiyisweni. Matsalwa ma ri: “Ku pfumela i ku tshemba loku tiyeke ehenhla ka swilo leswi languteriwaka, ni ku kholwa swinene hi tlhelo ra swilo leswi nga voniwiki.” (Vaheveru 11:1) Munhu la nga ni ripfumelo wa tiyiseka leswaku hinkwaswo leswi Xikwembu xi swi tshembiseke swi fana ni loko swi endliwile eka xona. Vumbhoni lebyi khorwisaka bya mintiyiso leyi nga vonakiki byi na matimba lerova ripfumelo ri ringana ni vumbhoni byebyo.

4. Xana buku yin’wana yi seketela nhlamuselo ya Bibele ya ripfumelo hi ndlela yihi?

⁴ Eka New World Translation, xivumbeko xa xivangelo xa riendli ra Xiheveru ʼa·manʹ minkarhi yin’wana xi hundzuluxeriwa va ku “kombisa ripfumelo.” Hi ku ya hi Theological Wordbook of the Old Testament, “endzeni ka nhlamuselo ya rimitsu ra rito leri ku na mianakanyo ya ku tiyiseka . . . ku hambana ni nhlamuselo ya manguva lawa ya ripfumelo leyi nge i nchumu lowu nga kotekaka, lowu ku tshembiwaka leswaku wu nga va ntiyiso, kambe lowu nga tiyangiki.” Buku leyi yi ri: “Rhavi ʼāmēn ‘ku tiyiseka’ ri nghene eka Testamente Leyintshwa hi rito amēn leri hi Xinghezi ku nga rito ‘amen.’ Yesu u tirhise rito leri hi ku phindha-phindha (Mat. 5:18, 26, ni kun’wana) leswaku a kandziyisa ku tiya ka mhaka.” Rito leri hundzuluxeriweke va ku “ripfumelo” eMatsalweni ya Vukriste ya Xigriki nakambe ri vula ku pfumela swinene eka nchumu lowu sekeriweke entiyisweni.

5. Xana rito ra Xigriki leri hundzuluxeriweke va ku “ku tshemba loku tiyeke” eka Vaheveru 11:1 a a ri tirhisiwa njhani ematsalweni ya khale ya bindzu, naswona xana leswi swi vula yini eka Vakriste?

⁵ Rito ra Xigriki (hy·poʹsta·sis) leri hundzuluxeriweke va ku “ku tshemba loku tiyeke” eka Vaheveru 11:1 a a ri tala ku tirhisiwa eka maphepha ya khale ya ta mabindzu ya papirasi ku phofula mianakanyo ya nchumu lowu tiyisaka vun’wini bya nkarhi lowu taka. Vadyondzi Moulton na Milligan va ringanyeta nhlamuselo leyi nge: “Ripfumelo i mapapila ya vumbhoni ya minchumu leyi languteriwaka.” (Vocabulary of the Greek Testament) Kavula, loko munhu a ri na mapapila ya vumbhoni ya nhundzu, a nga va ni “ku tshemba loku tiyeke” ka leswaku siku rin’wana ntshembo wa yena wo yi kuma wu ta hetiseka.

6. Hi yihi nhlamuselo ya rito ra Xigriki leri hundzuluxeriweke va ku “ku kholwa swinene” eka Vaheveru 11:1?

⁶ Eka Vaheveru 11:1, rito ra Xigriki leri hundzuluxeriweke va ku “ku kholwa swinene” (eʹleg·khos) ri na mianakanyo ya ku nyikela vumbhoni byo seketela nchumu wo karhi, ngopfu-ngopfu nchumu lowu hambanaka ni leswi vonakaka swi ri swona. Vumbhoni lebyi kongomeke kumbe lebyi tiyeke byi endla leswi a swi nga twisisiwi eku sunguleni swi va erivaleni, xisweswo byi kombisa leswi a swi tikomba swi ri swona, swi ri mavunwa. Xisweswo eka Matsalwa hinkwawo ya Xiheveru ni ya Xigriki, ripfumelo entiyisweni a hi “ku pfumela swinene eka nchumu lowu nga riki na vumbhoni.” Ku hambana ni sweswo, ripfumelo ri sekeriwe entiyisweni.

Ri Sekeriwe eMintiyisweni Ya Xisekelo

7. Xana Pawulo na Davhida va va hlamusela njhani lava alaka vukona bya Xikwembu?

⁷ Muapostola Pawulo u boxe ntiyiso wa xisekelo loko a tsale leswaku “leswi nga vonakiki swa [Muvumbi], ma nga matimba ya [ye]na lama nga heriki ni vukwembu bya [ye]na, swa vonaka swinene loko ku anakanyiwa mintirho ya [ye]na; hikwalaho [vakaneti va ntiyiso] va hava xo tilandzula ha xona.” (Varhoma 1:20) Ina, “matilo ma v̌ula ku kwetsima ka Šikwembu,” naswona “misav̌a yi tele rifuwo ra [xo]na.” (Psalma 19:1; 104:24) Kambe ku vuriwa yini loko munhu a nga swi lavi ku kambisisa vumbhoni? Mupisalema Davhida u te: “Lo’wo biha, e ku tikuriseni ka yena [“hi ku tikukumuxa ka yena,” The New English Bible], a ku: A nga ka a nga v̌utisisi; Šikwembu a ši kona; hi kona ku anakanya ka yena hikwaku.” (Psalma 10:4; 14:1) Hi tlhelo rin’wana, ripfumelo ri sekeriwe entiyisweni wa xisekelo wa leswaku Xikwembu xi kona.

8. Lava nga ni ripfumelo va swi kota ku va ni xitiyisekiso ni ku twisisa kwihi?

⁸ Yehova a ngo va kona ntsena; wa tshembeka naswona switshembiso swa yena hi nga swi tshemba. U te: “Kunene leši nḍi ši ehleketeke ši ta endlakala, ni leši nḍi ši kaneleke ši ta humelela.” (Esaya 14:24; 46:9, 10) Lawa a hi marito lama nga vuliki nchumu. Ku na xitiyisekiso lexi nga erivaleni xa leswaku madzana ya vuprofeta lebyi rhekhodiweke eRitweni ra Xikwembu byi hetisekile. Hi ku voningeriwa loku, lava va nga ni ripfumelo va swi kota ku twisisa ku hetiseka loku yaka emahlweni ka vuprofeta byin’wana bya Bibele. (Vaefesa 1:18) Hi xikombiso, va vona ku hetiseka ka “xikombiso” xa vukona bya Yesu, ku katsa ni ku andza ka ku chumayeriwa ka Mfumo lowu simekiweke, swin’we ni ku andza ka vugandzeri bya ntiyiso loku vhumbiweke. (Matewu 24:3-14; Esaya 2:2-4; 60:8, 22) Va swi tiva leswaku ku nga ri khale matiko ma ta huwelela ma ku “Ku rhulile, ku hava xo karhata” ni leswaku endzhakunyana ka sweswo Xikwembu xi ta “herisa lava herisaka misava.” (1 Vatesalonika 5:3; Nhlavutelo 11:18) Mawaku nkateko wonghasi wo va ni ripfumelo leri sekeriweke emintiyisweni ya vuprofeta!

Muhandzu Wa Moya Wo Kwetsima

9. Hi byihi vuxaka lebyi nga kona exikarhi ka ripfumelo ni moya lowo kwetsima?

⁹ Ntiyiso lowu ripfumelo ri sekeriweke eka wona wu kumeka eBibeleni, muhandzu wa moya wo kwetsima wa Xikwembu. (2 Samuel 23:2; Zakaria 7:12; Marka 12:36) Kutani ke, ripfumelo a ri nge vi kona handle ka ku tirha ka moya wo kwetsima. Hi yona mhaka leyi Pawulo a tsaleke a ku: “Mihandzu ya moya [yi katsa] . . . ripfumelo.” (Vagalatiya 5:22, NW) Kambe vo tala va wu ala ntiyiso wa Xikwembu, va thyakisa vutomi bya vona hi ku navela ka nyama ni mianakanyo leyi hlundzukisaka moya wa Xikwembu. Xisweswo, “a hi hinkwavo lava nga ni ku pfumela,” hikuva va hava xisekelo lexi va nga ri hlakulelaka eka xona.—2 Vatesalonika 3:2; Vagalatiya 5:16-21; Vaefesa 4:30.

10. Malandza man’wana ya khale ya Yehova ma swi kombise njhani leswaku ma na ripfumelo?

¹⁰ Hambi swi ri tano, exikarhi ka vatukulu va Adamu, vanhu van’wana va ri kombisile ripfumelo. Vaheveru ndzima 11 yi boxa Avele, Enoko, Nowa, Abrahama, Sara, Isaka, Yakobo, Yosefa, Muxe, Rahava, Gidiyoni, Baraka, Samsoni, Yafta, Davhida na Samuwele, swin’we ni malandza yo tala ya Yehova lama nga boxiwangiki, lawa ‘ma nkhensiweke hi ripfumelo ra wona.’ Xiya leswi endliweke “hi ripfumelo.” Avele u “humesele Xikwembu magandzelo” naswona Nowa “a aka ngalava” hikwalaho ka ripfumelo. Hi ripfumelo Abrahama “ú yingisile, a rhurha a nga tivi lomu a fanelaka ku ya kona.” Naswona hi ripfumelo, Muxe “ú sukile etikweni ra Egipta.”—Vaheveru 11:4, 7, 8, 27, 29, 39.

11. Xana Mintirho 5:32 yi kombisa yini malunghana ni vanhu lava yingisaka Xikwembu?

¹¹ Kavula, malandza lawa hinkwawo ya Yehova ma endle leswi tlulaka ku pfumela vukona bya Xikwembu ntsena. Hi ku kombisa ripfumelo, ma n’wi tshembile tanihi Loyi a nga “hakela[ka] lava va [n’wi] lavaka.” (Vaheveru 11:6) Va endle leswi moya wa Xikwembu wu va kongomiseke ku swi endla, va endla hi vutivi lebyi kongomeke bya ntiyiso lowu a wu ri kona hi nkarhi wolowo, hambi leswi a wu hikiwile. Vona ndlela leyi va hambaneke na Adamu ha yona! A nga ri kombisangiki ripfumelo leri sekeriweke entiyisweni kumbe ku endla hi ku ya hi nkongomiso wa moya wo kwetsima. Xikwembu xi nyika vanhu lava xi yingisaka ntsena, moya wa xona.—Mintirho 5:32.

12. (a) I yini lexi Avele a a xi pfumela, naswona u swi kombise njhani leswi? (b) Ku nga khathariseki ripfumelo ra vona, i yini lexi timbhoni ta Yehova ta le mahlweni ka Vukriste ti nga xi kumangiki?

¹² Ku hambana na Adamu tata wakwe, Avele loyi a a chava Xikwembu a a ri na ripfumelo. Kumbexana vatswari vakwe va n’wi byerile hi vuprofeta byo sungula lebyi vuriweke lebyi nge: “[Mina Yehova Xikwembu] nḍi ta v̌eka ku v̌engana e šikari ka wena ni wansati, ni šikari ka [mbewu ya wena ni mbewu ya] wansati; [y]i ta ku faya nhloko, wena u [y]i luma širenḍe.” (Genesa 3:15) Xisweswo Xikwembu xi tshembise ku susa vubihi ivi xi kondletela ku lulama. Avele a nga yi tivi ndlela leyi xitshembiso lexi a xi ta hetiseka ha yona. Kambe ripfumelo ra yena ra leswaku Xikwembu i Muhakeri wa lava va xi lavaka hi xiviri, a a ri anerile ku n’wi susumetela ku endla gandzelo. Swi nga ha endleka u anakanyisise swinene hi vuprofeta lebyi naswona a a pfumela leswaku ku halata ngati a ku laveka leswaku xi hetisisa xitshembiso ni ku endla vanhu va hetiseka. Hikwalaho, gandzelo ra Avele ra xiharhi a ri faneleka. Hambi swi ri tano, ku nga khathariseki ripfumelo ra vona, Avele ni timbhoni tin’wana ta Yehova ta le mahlweni ka Vukriste “a va kumanga leswi a va tshembisiwile swona.”—Vaheveru 11:39.

Ku Hetisekisa Ripfumelo

13. (a) I yini leswi Abrahama na Davhida va swi dyondzeke hi ku hetiseka ka xitshembiso? (b) Ha yini ku nga vuriwaka leswaku “ntiyiso [wu] tile ha Yesu Kriste”?

¹³ Hi ku famba ka malembe xidzana, Xikwembu xi paluxe ntiyiso lowu engetelekeke mayelana ni ndlela leyi xitshembiso xa yena xa ‘mbewu ya wansati’ a xi ta hetiseka ha yona. Abrahama u byeriwe leswaku: “Kutani matiko hikwawo ya misav̌a ma ta tinkhensa ha [mbewu ya] wena.” (Genesa 22:18) Endzhakunyana, Hosi Davhida u byeriwe leswaku Mbewu leyi tshembisiweke a yi ta ta hi nxaxamelo wakwe wa vuhosi. Hi 29 C.E., Mbewu yoleyo yi humelerile hi xiviri tanihi Yesu Kriste. (Psalma 89:3, 4; Matewu 1:1; 3:16, 17) Ku hambana na Adamu wo pfumala ripfumelo, “Adamu lowo hetelela,” Yesu Kriste, a a ri xikombiso eku kombiseni ka ripfumelo. (1 Vakorinto 15:45) A a hanya vutomi bya ntirho lowu nyiketeriweke eka Yehova naswona u hetisise vuprofeta byo tala lebyi vhumbaka Mesiya. Xisweswo Yesu u endle leswaku ntiyiso lowu vulavulaka hi Mbewu leyi tshembisiweke wu va erivaleni ivi a endla leswaku swilo leswi a swi fanekiseriwa hi Nawu wa Muxe swi va ntiyiso. (Vakolosa 2:16, 17) Xisweswo a swi fanerile ku vula leswaku “ntiyiso [wu] tile ha Yesu Kriste.”—Yohane 1:17.

14. Xana Pawulo u va kombise njhani Vagalatiya leswaku ripfumelo ri ve na swivumbeko leswintshwa?

¹⁴ Leswi ntiyiso wu teke ha Yesu Kriste, a ku ri na xisekelo lexi anameke xo sekela ripfumelo eka “xitshembiso” lexi. Ripfumelo ri ye ri tiyisiwa, ri va ni swivumbeko leswintshwa, hi ndlela yo fanekisela. Malunghana ni leswi Pawulo u byele Vakriste-kulobye lava totiweke a ku: “Kambe Matsalwa ma vula leswaku hinkwaswo swi fumiwa hi vudyoho, leswaku xitshembiso lexi fambelanaka ni ku pfumela eka Yesu Kriste, xi nyikiwa ntsena lava pfumelaka. Loko ku pfumela ku nga si ta, a hi bohiwile hi Nawu, hi fumiwa hi wona, ku fikela loko ku pfumela loku a ku fanela ku ta, ku hlavuteriwile. Hikokwalaho, Nawu a wu ri murisi wa hina ku fikela loko Kriste a tile, leswaku hi ta endliwa lava lulameke hi mhaka ya ku pfumela. Kambe sweswi, leswi ku pfumela ku fikeke, a ha ha ri ehansi ka murisi wa kona. Hikuva eka Kriste Yesu hinkwenu mi vana va Xikwembu hi mhaka ya ku pfumela.”—Vagalatiya 3:22-26.

15. Xana ripfumelo a a ri ta hetisisiwa hi ndlela yihi ntsena?

¹⁵ Vaisrayele va kombise ripfumelo eku tirhisaneni ka vona ni Xikwembu hi ntwanano wa Nawu. Kambe sweswi ripfumelo leri a ri fanele ri hetisisiwa. Njhani? Hi ku kombisa ripfumelo eka Yesu loyi a totiweke hi moya loyi Nawu a wu kunguhateriwe ku va yisa eka yena. Ripfumelo ra le mahlweni ka Vukriste a ri ta hetisisiwa hi ndlela yoleyo ntsena. Vona ndlela leyi a swi ri swa nkoka ha yona eka Vakriste lava vo sungula ku ‘languta swinene eka Yesu, Murhangeri Lonkulu ni Muhetisisi wa ripfumelo ra vona’! (Vaheveru 12:2) Hakunene, Vakriste hinkwavo va fanele va endla tano.

16. Xana moya lowo kwetsima wu te njhani hi ndlela leyi tiyisiweke naswona ha yini?

¹⁶ Hikwalaho ka vutivi lebyi engetelekeke bya ntiyiso wa Xikwembu ni ku hetisisiwa loku ka ripfumelo, xana moya wo kwetsima na wona a wu ta ta hi ndlela leyi tiyisiweke? Ina. Hi Pentekosta ya 33 C.E., moya wa Xikwembu, mupfuni la tshembisiweke loyi Yesu a vulavuleke ha yena, wu chuluriwile ehenhla ka vadyondzisiwa va yena. (Yohane 14:26; Mintirho 2:1-4) Moya lowo kwetsima hi nkarhi wolowo se a wu tirha eka vona hi ndlela leyintshwa hi ku helela, tanihi vamakwavo va Kriste lava totiweke. Ripfumelo ra vona, muhandzu wa moya wo kwetsima, ri tiyisiwile. Leswi swi va hlomisele ntirho lowukulu wa ku endla vadyondzisiwa lowu a a wa ha ta.—Matewu 28:19, 20.

17. (a) Xana ntiyiso wu te njhani naswona ripfumelo ri hetisisiwe hi ndlela yihi ku sukela hi 1914? (b) Hi byihi vumbhoni lebyi hi nga na byona bya ku tirha ka moya lowo kwetsima ku sukela hi 1919?

¹⁷ Ripfumelo ri fike loko Yesu a tinyikele tanihi Hosi leyi Hlawuriweke ku tlula malembe ya 1 900 lama hundzeke. Kambe leswi sweswi a nga Hosi ya le tilweni leyi fumaka, xisekelo xa hina xa ripfumelo—ntiyiso lowu paluxiweke—xi kule swinene, xisweswo xi hetisisa ripfumelo ra hina. Hi ku fanana, ku tirha ka moya lowo kwetsima ku tiyisiwile. A a ku ri na vumbhoni lebyi nga erivaleni bya leswi hi 1919, loko moya wo kwetsima wu pfuxete malandza lama tinyiketeleke ya Xikwembu eka xiyimo xa ku nga tirhi. (Ezekiel 37:1-14; Nhlavutelo 11:7-12) Hi nkarhi wolowo ku simekiwe masungulo ya paradeyisi ya moya, leyi eka makume ya malembe lama landzeleke yi vonakeke kahle naswona yi ya yi vangama lembe na lembe. Xana ku nga va ni vumbhoni lebyi engetelekeke bya ku tirha ka moya wo kwetsima wa Xikwembu ku tlula lebyi?

Ha Yini Hi Kambisisa Ripfumelo Ra Hina?

18. Xana tinhlori ta Vaisrayele a ti hambana njhani hi ripfumelo?

¹⁸ Endzhakunyana ka ku ntshunxiwa ka Vaisrayele evukhumbini le Egipta, vavanuna va 12 va rhumiwile ku ya kamba tiko ra Kanana. Hambi swi ri tano, khume eka vona va pfumale ripfumelo, va kanakana vuswikoti bya Yehova bya ku hetisisa xitshembiso xa yena xo nyika Israyele tiko. Va susumetiwe hi ku vona hi mahlo, hi swilo leswi vonakaka. Eka lava 12, i Yoxuwa na Kalebe ntsena lava kombiseke leswaku a va famba hi ripfumelo, hayi hi ku vona. (Ringanisa 2 Vakorinto 5:7.) Hikuva hi ku kombisa ripfumelo, hi vona ntsena vavanuna lava, lava poneke va nghena eTikweni leri Tshembisiweke.—Tinhlayo 13:1-33; 14:35-38.

19. Xana masungulo yo aka ripfumelo eka wona ma ente ku tlula rini na rini hi ndlela yihi, kutani hi fanele hi hambeta hi endla yini?

¹⁹ Namuntlha, hi yime emindzilakanini ya misava leyintshwa ya Xikwembu ya ku lulama. Leswaku hi ta nghena eka yona, ku laveka ripfumelo. Lexi tsakisaka, xisekelo xa ntiyiso wo sekela ripfumelo eka xona xi entile ku tlula rini ra rini. Hi na Rito hinkwaro ra Xikwembu, xikombiso xa Yesu Kriste ni valandzeri vakwe lava totiweke, nseketelo wa vamakwerhu va moya va timiliyoni ni nseketelo wa moya wo kwetsima wa Xikwembu hi mpimo lowu nga ringanisiwiki. Kambe, hi fanele hi kambisisa ripfumelo ra hina ivi hi teka magoza yo ri tiyisa loko ha ha ri na nkarhi wo endla tano.

20. Hi swihi swivutiso leswi swi nga fanelaka ku tivutisa swona?

²⁰ ‘Ina, ndza tshemba leswaku lowu i ntiyiso,’ u nga ha vula tano. Kambe ripfumelo ra wena ri tiye ku fikela kwihi? Tivutise: ‘Xana Mfumo wa Yehova wa le tilweni i wa xiviri eka mina ku fana ni hulumendhe ya vanhu? Xana ndza yi xiya nhlengeletano leyi vonakaka ya Yehova ni ku yi seketela hi xitalo swin’we ni Huvo ya yona leyi Fumaka? Hi mahlo ya ripfumelo, xana ndza swi kota ku vona leswaku matiko sweswi ma karhi ma byisiwa ku ya exivandleni xo hetelela xa Armagedoni? Xana ripfumelo ra mina ra fana ni leriya ra “vunyingi lebyikulu lebyi bya timbhoni” lebyi boxiweke eka Vaheveru ndzima 11?’—Vaheveru 12:1; Nhlavutelo 16:14-16.

21. Xana ripfumelo ri va susumeta njhani lava nga na rona, naswona xana va katekisiwa njhani? (Katsa tinhlamuselo leti nga ebokisini eka tluka 13.)

²¹ Lava va nga ni ripfumelo leri sekeriweke entiyisweni va susumeteriwa ku teka goza. Ku fana ni gandzelo leri amukelekaka leri nyikeriweke hi Avele, magandzelo ya vona ya ku dzunisa ma tsakisa eka Xikwembu. (Vaheveru 13:15, 16) Ku fana na Nowa, muchumayeri wa ku lulama loyi a yingiseke Xikwembu, va landzelela ndlela ya ku lulama tanihi vachumayeri va Mfumo. (Vaheveru 11:7; 2 Petro 2:5) Tanihi Abrahama, lava nga ni ripfumelo leri sekeriweke entiyisweni va yingisa Yehova ku nga khathariseki swiphiqo leswi nga vaka kona hambi loko va ri ehansi ka swiyimo swo nonon’hwa swinene. (Vaheveru 11:17-19) Ku fana ni malandza yo tshembeka ya Yehova ya minkarhi ya khale, lava va nga ni ripfumelo namuntlha va katekisiwa swinene naswona va khathaleriwa swinene hi Tata wa vona wa rirhandzu wa le tilweni.—Matewu 6:25-34; 1 Timotiya 6:6-10.

22. Xana ripfumelo ri nga tiyisiwa njhani?

²² Loko u ri nandza wa Yehova kambe u kuma leswaku ripfumelo ra wena ri tsanile hi ndlela yo karhi, xana u nga endla yini? Tiyisa ripfumelo ra wena hi ku dyondza swinene Rito ra Xikwembu kutani u pfumelela nomu wa wena wu khapa-khapa hi mati ya ntiyiso lowu tateke mbilu ya wena. (Swivuriso 18:4) Loko ripfumelo ra wena ri nga hambeti ri tiyisiwa, ri nga ha tsana, ri nga ha tirhi, hambi ku ri ku fa. (1 Timotiya 1:19; Yakobo 2:20, 26) Tiyiseka leswaku leswi swi nga humeleli eka ripfumelo ra wena. Kombela mpfuno wa Yehova, khongela u ku: “Ndzi pfune eku kanakaneni ka mina!”—Marka 9:24.

Hi Tihi Tinhlamulo Ta Wena?

◻ Ripfumelo i yini?

◻ Hikwalaho ka yini ripfumelo ri nga taka ri nga vi kona handle ka ntiyiso ni moya wo kwetsima?

◻ Xana Yesu Kriste u ve Muhetisisi wa ripfumelo ra hina hi ndlela yihi?

◻ Ha yini hi fanele hi kambisisa leswaku ripfumelo ra hina ri tiye ku fikela kwihi?

[Bokisi leri nga eka tluka 13]

LAVA NGA NI RIPFUMELO...

◻ Va vulavula ha Yehova.—2 Vakorinto 4:13.

◻ Va endla mintirho yo fana ni ya Yesu.—Yohane 14:12.

◻ I swihlovo swa xikhutazo eka van’wana.—Varhoma 1:8, 11, 12.

◻ Va hlula misava.—1 Yohane 5:5.

◻ A va chavi.—Esaya 28:16.

◻ Va le xiyin’weni xo kuma vutomi lebyi nga heriki.—Yohane 3:16.