Xana U Ta Ya eTilweni Kumbe eTiheleni?

“HI SWIHI switiyisekiso leswi u nga na swona swa leswaku u ta ya etilweni kumbe etiheleni?”

Kahle-kahle sweswo swi vutisiwe Maamerika eka vulavisisi bya sweswinyana. Vandla ra Nkambisiso wa Vukhongeri ra le Princeton ri kandziyise vuyelo bya kona eka Religion in America 1992-1993.

Xana a wu ta va u hlamurise ku yini? Hi swihi switiyisekiso swa munghana wa wena wa vukati kumbe van’wana lava u va rhandzaka swa leswaku va ta ya etilweni loko va file? Xana u ehleketa leswaku swi nga endleka leswaku wena kumbe vona va ya etiheleni?

Nkambisiso wu komba leswaku 78 wa tiphesente va vule leswaku switiyisekiso swa vona swo ya etilweni swa tshembisa swinene, nhlayo ya lava yi tlakukile ku tlula ya lava hlamuleke hi ndlela yoleyo eka malembe ya 40 lama hundzeke. Etiheleni ke? Kwalomu ka 77 wa tiphesente va vule leswaku switiyisekiso swa ku ya kona a swi nyawuli.

Xana tinhlamulo ta vona a ti sekeriwe evutivini lebyi kongomeke bya Bibele? Phela, kwalomu ka vanhu va 4 ehenhla ka 10 va pfumele leswaku hakanyingi a va nga yi eminhlanganweni ya vukhongeri ku fana ni le ka malembe ya ntlhanu lama hundzeke. Ko va tiphesente ta 28 ntsena ta lava vuleke leswaku va hlanganyela emintirhweni ya dyondzo ya Bibele naswona 27 wa tiphesente va hlanganyela etitlilasini ta dyondzo ya vukhongeri.

Loko u yi dyondza kahle Bibele, u ta kuma mintiyiso leyi hlamarisaka. Hi xikombiso, hi ku kongoma Bibele yi vula leswaku Yesu loko a file u ye “etiheleni,” hi laha swi hundzuluxeriweke ha kona eka vuhundzuluxeri bya Tibibele tin’wana. (Mintirho 2:31, King James Version; “Hades,” New World Translation) Rito ra Xikwembu ri kombisa leswaku hambi ku ri Hosi Davhida kumbe Yohane Mukhuvuri a va yanga etilweni loko va file. (Matewu 11:11; Mintirho 2:29) Yoleyo i mintiyiso, ku nga ri malangutelo lama humaka eka vulavisisi bya vukhongeri.

Mintiyiso yin’wana leyi nga ku khumbaka hi leyi: Bibele yi dyondzisa leswaku vaapostola va Yesu ni nhlayo yitsongo ya van’wana va ta ya etilweni ku ya fuma na Yesu. Hambi swi ri tano, vunyingi bya vanhu lava feke byi ye esirheni leri tolovelekeke ra vanhu. Xikwembu xi ta va pfuxa eku feni, xi va nyika vutomi emisaveni ni malangutelo lama heleleke ya ntsako, vutomi lebyi nga riki na makumu emisaveni ya paradeyisi leyi vuyeteriweke.

Timbhoni ta Yehovha ti ta tsakela ku ku pfuna leswaku u simeka xisekelo lexi tiyeke xa ntshembo wolowo hi ku tirhisa Bibele ya wena.