Mati Ya Vutomi

“LOYI a swi twaka a a vule a ku: ‘Tana!’ Loyi a nga ni torha a a te; ni loyi a swi navelaka a a nwe mati ya vutomi a nga hakeli.” (Nhlavutelo 22:17) “Mati ya vutomi”—sweswo swi vula malunghiselelo hinkwawo ya Xikwembu ya ku kutsuriwa ka hina lama sekeriweke egandzelweni ra nkutsulo ra Yesu Kreste. Malunghiselelo lawa ma kumeka, naswona i ya mahala. Vona ku hanana loku hlamarisaka ka Xikwembu xa hina! Kambe ha yini ma fanekiseriwa hi mati?

Phela, mati ya xiviri ma endla leswaku swimilana swi kula emisaveni, naswona sweswo swi endla leswaku vanhu va kota ku hanya. Handle ka mati, vutomi bya swimilana, hambi ku ri bya vanhu, a byi nge vi kona. Ku tlula kwalaho, tiphesente ta 65 ta miri wa wena i mati ntsena. Vativi van’wana va ta rihanyo va bumabumela leswaku u nwa mati ya tilitara timbirhi ni hafu hi siku. Matirhelo hinkwawo ya miri wa wena—ku sukela eku gayeleni ka swakudya ku ya eku humeseni ka thyaka—ma lava mati. Loko wo heta vhiki u nga nwanga mati, u ta fa.

Hi ku fanana, “mati ya vutomi” ma nyika ma tlhela ma tiyisa vutomi bya moya. Loko ho ala mati ya vutomi, a hi nge vi na byona vumundzuku lebyi nga heriki. (Yohane 3:36) Loko hi ma amukela, hi nga kuma vutomi lebyi nga heriki. A swi hlamarisi leswi wansati wa Musamariya a anguleke kahle loko Yesu a ku eka yena: “Un’wana ni un’wana la nwaka mati lawa ndzi nga ta n’wi nyika wona, a nga ka a nga ha tlheli a twa torha ni siku ni rin’we; kambe mati lawa ndzi nga ta n’wi nyika wona, ma ta va eka yena xihlovo xa mati lama pfelelaka, ku yisa evutomini lebyi nga heriki”! (Yohane 4:14) Onge hi nga lwa hi matimba leswaku hi faneleka naswona hi nwa mati ya vutomi hi nga hakeli.

[Laha Xifaniso Xi Humaka Kona eka tluka 31]

Garo Nalbandian