Xiviko Xa Vahuweleri Va Mfumo

U Landzelele Ripfalo Ra Yena Leri Leteriweke Hi Bibele

HOSI Davhida wa Israyele a a khongelela mpfuno wa Yehovha loko a ku: “Loko nḍi ri mina, nḍi famba hi ku lulama ka mina; u nḍi hlayisa, u nḍi endla hi tintŝalo.” (Pisalema 26:11) Xikwembu xi n’wi endlele tintswalo hi ku va a hlayisa vutshembeki. Yehovha u tlhele a katekisa Yesu hi ku va a endle ku rhandza ka Tata wa yena wa le tilweni, naswona U katekise ni muntshwa wa le Colombia loyi a landzeleleke ripfalo ra yena leri leteriweke hi Bibele, ivi a tiyimisela ku endla ku rhandza ka Xikwembu. Jaha leri ra hlamusela:

“Loko ndzi sungula ku dyondza Bibele ni Timbhoni ta Yehovha a ndzi ri xichudeni exikolweni xa Khatoliki. Hambi swi ri tano, ripfalo ra mina a a ri ndzi karhata loko ndzi ri eXilalelweni xa Rhoma Khatoliki, kutani ndzi ye eka nhloko ya xikolo (leyi a a yi ri muprista), mutsundzuxi ni le ka murhangeri wa ntlawa wa hina, ndzi kombela ku ka ndzi nga yi eka Xilalelo xa Rhoma Khatoliki. Hambi leswi ndzi pfumeleriweke, van’wana va ringete ku ndzi sindzisa leswaku ndzi ya. Ntshikilelo wu kule ngopfu loko ndza ha ku khuvuriwa tanihi un’wana wa Timbhoni ta Yehovha. Tata wa mina u vule leswaku u ta ndzi hlongola ekaya loko ndzo hlongoriwa exikolweni. Yena a a ndzi langutele leswaku ndzi kuma dyondzo ya le yunivhesiti ni ku thwasela ntirho.

“Nhloko ya xikolo a yi tshamela ku nyika switsundzuxo hi loyi a a tsandzeka ku yingisa milawu ya Khatoliki. Loko nkarhi wa xitsundzuxo xa Rhoma Khatoliki xo sungula elembeni wu fikile, ndzi tumberile ku kondza xi hela. Kutani ndzi nyike mudyondzisi (muprista) kopi ya broxara leyi nge School and Jehovah’s Witnesses, kutani ndzi n’wi byela leswaku tanihi un’wana wa Timbhoni ta Yehovha ndzi nga ka ndzi nga yi eka Xitsundzuxo xa Rhoma Khatoliki. U te: ‘Swa antswa u sungula ku lava xikolo xin’wana.’ A ndzi swi tiva leswaku ku hlongoriwa ka mina exikolweni a swi ta vula ku hlongoriwa ka mina ekaya hi tatana. Hambi swi ri tano, ndzi khongele eka Yehovha, naswona ndzi hambete ndzi nyikela vumbhoni bya rixaladza eka lava a ndzi dyondza na vona xikolo.

“Nkarhi wo wisa wu fikile. Kutani loko hi tlhelela exikolweni endzhaku ka nkarhi wo wisa, a ku ri nkarhi wa Xitsundzuxo xa Rhoma Khatoliki nakambe. Nhloko ya xikolo ni vaprista van’wana a va ri emahlweni ka kereke, va rindzele ku twa ta lava tivulaka swidyoho. Ndzi lave ku hluriwa hi ku chava. Ndzi nghenile ndzi tshama ehansi, kambe ripfalo ra mina a ri ndzi karhata. Loko ku sunguriwa ku yimbelela, ndzi ehleketile, ‘Xana ndzi endla yini laha? Yehovha i Xikwembu xa mina. Ndzi nge vi na vutoya ivi ndzi n’wi xandzukela. Ndzi nge n’wi khomisi tingana. A nge ndzi tshiki.’ Ndzi khongelele ku va ni xivindzi. Kutani ndzi humile ekerekeni kutani ndzi ya yima enxaxamelweni wa lava tivulaka swidyoho. Loko ndzi fika eka nhloko ya xikolo, ndzi te: ‘Mudyondzisi, mina a ndzi teli ku ta tivula swidyoha.’ U te: ‘Ndzi swi vone khale.’ Ndzi n’wi byele leswaku ndzi tiyimiserile ku byarha vuyelo bya kona ni leswaku ripfalo ra mina a ri nga ndzi pfumeleli ku hlanganyela eka Xilalelo xa Rhoma Khatoliki. A ndzi nga ta fularhela swilo leswi ndzi swi dyondzeke eBibeleni.

“U ndzi langutile, a n’wayitela, kutani a ku: ‘Ndza ku nkhensa. Hinkwenu n’wina Timbhoni ta Yehovha mi faneriwa hi ku nkhensiwa. Eka n’wina Xikwembu xi rhanga emahlweni, naswona mi tiyimisele ku yingisa milawu ya xona, ku nga khathariseki leswaku ku humelela yini. Khomisa sweswo. Leswi u swi endlaka i swinene. Ndzi navela onge Makhatoliki hinkwawo ma nga fana na wena, ma kombisa ku hiseka ni rirhandzu leri u ri kombisaka eka Xikwembu. Ku sukela sweswi hi ku pfumelela ku ka u nga hlanganyeli eka mintirho ya hina ya vukhongeri.’ Ndzi tsake swonghasi! Yehovha u katekise ku tiyimisela ka mina ku yingisa ripfalo ra mina leri leteriweke hi Bibele.

“Siku leri tlhandlamaka nhloko ya xikolo yi byele swichudeni yi ku: ‘Vukhongeri byin’wana byi le mahlweni eka bya hina. Xana ha yini hi nga fani na byona, hi hiseka hi va ni rirhandzu lerikulu eka Xikwembu, naswona hi navela ku xi tirhela ku tlula hinkwaswo ke? Leswi hi leswi swi faneleke ku va etimbilwini ta hina.’

“Eku heteleleni nhloko ya xikolo yi cinceriwe eRhoma, naswona nhloko leyintshwa ya xikolo a yi nga ri na mhaka loko ndzi nga hlanganyeli. Tatana u rhurhile ekaya, a ndzi siya ndzi ntshunxekile leswaku ndzi kota ku fikelela pakani ya mina ya vutirheli bya nkarhi hinkwawo loko se ndzi thwasile.”

Yehovha u katekise jaha leri ri landzeleke ripfalo ra rona leri ri leteriweke hi Bibele. Hi laha ku fanaka u ta katekisa hinkwavo lava lavaka ku endla ku rhandza ka yena.—Swivuriso 3:5, 6.