Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka lowu pfunaka eka wena? Kutani u nga kambela mianakanyo ya wena hi swivutiso leswi landzelaka:

▫ Hikwalaho ka yini Timbhoni ta Yehovha ti ya emahlweni ti endzela vaakelani va tona?

Timbhoni ta Yehovha hi toxe ti lava nkateko wa Xikwembu hi Mfumo lowu tshembisiweke, naswona hikwalaho ko rhandza vaakelani va tona, ti lava leswaku na vona va kuma nkateko lowu fanaka. Kutani, hi ku landzelela xikombiso xa Yesu, ti titwa ti boheka ku endzela vanhu-kulobye hi rirhandzu ro pfumala vutianakanyi. (Matewu 6:9, 10; 22:37-39)—8/15, matluka 8, 9.

▫ Hikwalaho ka yini ku pfumela eka hundzuluko ku ri mhaka ya ripfumelo?

Vativi va sayense a va si tshama va vona ku hundzuka ka xiaki xa xitekela—hambi ku ri ku hundzuka loku pfunaka—ku humesa swilo leswintshwa leswi hanyaka, hambi swi ri tano vativi va hundzuluko va vula leswaku leyi hi yona ndlela leyi swilo leswintshwa leswi hanyaka swi humeleleke ha yona. Vativi va hundzuluko a va ku vonanga hi mahlo ya vona ku humelela ka swilo leswintshwa leswi hanyaka hi xitshuketa, ku huma eka swilo leswi nga hanyiki, kambe va vula hi matimba leswaku leyi i ndlela leyi vutomi byi sunguleke ha yona.—9/1, tluka 5.

▫ Xana hi nga ku hlula njhani ku hetiwa matimba hi swipimelo leswi nga vaka kona evuton’wini?

Ku nga khathariseki leswaku xiyimo xa hina hi xihi, loko hi anakanyisisa swinene hi leswi hi nga swi endlaka, ematshan’weni yo vilela hi leswi hi nga swi kotiki ku swi endla, hi ta va ni vutomi lebyi enerisaka, naswona ku endla ntirho wa Xikwembu swi ta hi tsakisa. (Pisalema 126:5, 6)—9/1, tluka 28.

▫ Hi byihi vuyelo bya ku rivalela?

Ku rivalela van’wana swi kondletela vuxaka lebyinene (Vaefesa 4:32); a swi nyiki ku rhula ni vanhu-kulorhi ntsena, kambe swi nyika ni ku rhula embilwini (Varhoma 14:19; Vakolosa 3:13-15); ku rivalela van’wana swi hi endla leswaku hi rivaleriwa swidyoho swa hina hi ku olova (Matewu 6:14); nakambe, swi hi pfuna ku tsundzuka leswaku na hina ha swi lava ku rivaleriwa. (Varhoma 3:23)—9/15, tluka 7.

▫ Xikombiso xa muprofeta Amosi xi hi pfunisa ku yini entirhweni wa hina wo chumayela?

Ku kota Amosi, a hi hundzuli kumbe ku bakanyela rungula ra Xikwembu etlhelo. Ematshan’wini ya sweswo, hi ri twarisa hi ku titsongahata ku nga khathariseki n’wangulo wa vayingiseri va hina.—9/15, tluka 17.

▫ I timfanelo tihi ta Xikwembu leti hi faneleke ku ti tekelela?

Timbirhi leti xiyekaka i vuswikoti bya Yehovha byo hleleka ni ntsako wa yena. (1 Vakorinto 14:33; 1 Timotiya 1:11) Timfanelo leti ta Xikwembu ti ringaniseriwile, kutani yin’wana ya tona a yi tlakusiwi ivi ku yisiwa yin’wana ehansi.—10/1, tluka 10.

▫ Hi wahi magoza man’wana lamanene lawa vatswari va ma tekeke ku pfuna vana va vona leswaku va hlawula Yehovha?

Xa nkoka ngopfu i ku sungula ka ha ri na nkarhi. Minsusumeto leyi kumiwaka ni tidyondzo leti dyondzisiwaka emalembeni ya vuhlangi ti tshama nkarhi wo leha. (Swivuriso 22:6) I swa nkoka swinene ku va dyondzisa ku yingisa ni ku va ni xichavo eka Yehovha ni vugandzeri bya yena eminhlanganweni hinkwayo. Vatswari lava humelelaka va xiya mimboyamelo leyo biha naswona va pfuna vana va vona ku lulamisa mimboyamelo leyi. (Swivuriso 22:15) Xo hetelela, hatlisa u vekela n’wana wa wena tipakani ta ntirho wa Mfumo wa Xikwembu leti a nga ti fikelelaka hi ku olova.—10/1, matluka 27-8.

▫ Hi xihi xikombiso xo hlawuleka xa Yehovha xo rivalela lexi hi faneleke ku ringeta ku titoloveta xona?

Yehovha wa rivalela a tlhela a rivala. (Yeremiya 31:34) Eka swivumbiwa leswi nga vanhu leswi swa nonon’hwa ku swi endla. Nkoka wa ku endla tano wu kandziyisiwe hi Yesu, tanihi laha swi tsariweke ha kona eka Matewu 6:14, 15.—10/15, matluka 25-6.

▫ I swihinga swihi swinharhu leswi endlaka leswaku hi nga vi na ntwela-vusiwana?

Hikwalaho ka xiyimo xa hina xa vudyoho, mavondzo ma nga dzima timitsu. Loko hi vondzoka un’wana, xana hi nga n’wi kombisisa ku yini ntwela-vusiwana lowukulu? Xihinga xin’wana i ku hlalela madzolonga ku tlula mpimo. Leswi swi tala ku endla leswaku hi nga vi na mhaka ni ku xaniseka ka van’wana. Ku tlula kwalaho, munhu la nga ni vutianakanyi u tala ku pfumala ntwela-vusiwana. (1 Yohane 3:17)—11/1, matluka 19, 20.

▫ I dyondzo yihi leyi hi nga yi dyondzaka emhakeni ya Matsalwa malunghana na Yobo?

Mhaka ya Yobo yi hi endla hi ma xiya kahle marhengu ya Sathana yi tlhela yi hi pfuna ku vona ndlela leyi vuhosi bya Yehovha bya vuako byi yelanaka ha yona ni vutshembeki bya munhu. Kukotisa Yobo, hinkwavo lava rhandzaka Xikwembu va fanele ku ringiwa. Na hina hi nga tiyisela hi laha Yobo a endleke ha kona, hi kombisa vunwa bya Sathana kutani hi tiphina hi mikateko ya Mfumo wa Xikwembu.—11/15, tluka 20.

▫ Xana mutshama-xitulu wa huvo ya vakulu a nga xi kombisa njhani xichavo lexinene eka nkulu un’wana ni un’wana?

Loko swi koteka, mutshama-xitulu wa huvo ya vakulu u fanele a tsala tinhla leti ku nga ta buriwa ha tona ka ha ri emahlweni leswaku vakulu-kulobye va kota ku lunghiselela tinhla leti va nga ta bula ha tona ni ku anakanyisisa kahle hi xikhongelo. Hi nkarhi wa nhlangano wa vakulu a nge ringeti ku soholota mianakanyo ya vakulu kambe u fanele ku va khutaza ‘ku vulavula hi ku ntshunxeka’ emhakeni leyi ku vulavuriwaka ha yona. (1 Timotiya 3:13)—12/1, tluka 30.