Vuswikoti Byo Endla Swilo—I Nyiko Ya Xikwembu Ya Rirhandzu
YEHOVHA wa tsaka hi mintirho ya yena yo tumbuluxa. (Pisalema 104:31) Ku eneriseka lokukulu loku a ku kumaka entirhweni wo tumbuluxa ku hlamuseriwa eka Genesa 1:31: “Šikwembu ši languta hikwaŝo leŝi ši ŝi endleke, kutani maŝiv̌o, a ŝi ri ŝinene.”
Yehovha a nga kumanga ntsako lowu a ri yexe ntsena. U nyike Yesu lunghelo ro va muyimeri, kumbe xitirho-nkulu, loyi swilo hinkwaswo swi tumbuluxiweke ha yena. (Yohane 1:3; Vakolosa 1:16, 17) Tanihi ‘mutirhi lonkulu’ nakambe Yesu a a ‘tsaka emahlweni ka [Yehovha] minkarhi hinkwayo.’—Swivuriso 8:30, 31.
Kambe vuswikoti byo endla swilo a byi le tilweni ntsena. Eugene Raudsepp, ebukwini yakwe leyi nge How Creative Are You? wa tsala: “Byi kunguhatiwile tanihi xiphemu xa vanhu.” Leyi a hi mhaka ya xiwelo, hikuva munhu u vumbiwile hi xifaniso xa Xikwembu. (Genesa 1:26) Hi ndlela yoleyo Yehovha u nyike vanhu vuswikoti lebyi tsakisaka byo endla swilo.—Yakobo 1:17.
Hikwalaho, a swi hlamarisi leswi Bibele yi ndhundhuzelaka vuswikoti byo yimbelela, byo cina, byo luka, byo sweka, byo vatla, ni mintirho yin’wana yo endla swilo. (Eksoda 35:25, 26; 1 Samuwele 8:13; 18:6, 7; 2 Tikronika 2:13, 14) Besalele, muvatli, u tirhise vuswikoti bya yena “ku endla ŝilo leŝi nga tiv̌iwiki hi munhu” swo pfuneta entirhweni wo aka tabernakele. (Eksoda 31:3, 4) Murisi loyi a vuriwaka Yabala a nga ha va a ri yena musunguri wa ntsonga, muako lowu anakanyeriweke kahle lowu swi olovaka ku wu rhurhisa. (Genesa 4:20) Davhida a nga ri muyimbeleri ni muqambhi ntsena, nakambe a ri muendli wa swichayachayana leswintshwa. (2 Tikronika 7:6; Pisalema 7:17; Amosi 6:5) Meriyamu ku nga ha va ku ri yena loyi a sunguleke ncino wa ntsako lowu ku tlangeriweke ha wona ku kutsuriwa ka Vaisrayele eLwandle ro Tshwuka.—Eksoda 15:20.
Vuswikoti byo endla swilo hakanyingi i rifuwo ro ndlandlamuxa vugandzeri bya ntiyiso. Yesu u tirhise swikombiso ku katsa ni swilo leswi dyondzisaka leswaku a hundzisela rungula ra yena eka van’wana. Hi laha ku fanaka valandzeri va yena va tsundzuxiwa leswaku va ‘tikarhatela ku vulavula ni ku dyondzisa.’ (1 Timotiya 5:17) Ina, ntirho wa vona wo chumayela a hi nchumu lowu olovaka. I vutshila lebyi lavaka vuswikoti byo tirhisa tindlela to dyondzisa. (Vakolosa 4:6) Leswi i swa nkoka ngopfu-ngopfu loko u dyondzisa vana va wena.—Deteronoma 6:6, 7; Vaefesa 6:4.
Xisweswo, Yehovha u avelana ni van’wana ntsako lowu a wu kumaka hi ku tumbuluxa. Mawaku nyiko yonghasi ya rirhandzu!