Ripfumelo Ri N’wi Susumetele Ku Teka Goza

LOKO Yehovha a lerise Muxe leswaku a rhangela tiko ra Israyele va huma evuhlongeni aEgipta, eku sunguleni Muxe u kanetile, a ku: “Yo! Wena Hosi, a nḍi munhu l’a tiv̌aka ku v̌ulav̌ula ŝinene, hambi ku ri tolo, ne tolweni, hambi ku ri loko u sungurile ku v̌ulav̌ula ni nanḍa wa wena, hikuv̌a nḍi munhu wa nomu wo tika, ni ririmi ro nonoṅhwa.” (Eksoda 4:10) Ina, Muxe a a titwa a nga faneleki ku hetisisa xiavelo xolexo xo tika.

Hikufanana namuntlha, vo tala va malandza ya Yehovha minkarhi yin’wana va titwa va nga faneleki ku endla mintirho leyi va averiweke yona. Hi xikombiso, mulanguteri un’wana wa Mukreste la vitaniwaka Theodore wa hlamusela: “Eka swilo hinkwaswo leswi Yehovha a ndzi kombeleke leswaku ndzi swi endla, ntirho wa nsimu hi wona wo nonon’hwa. Loko ndza ha ri ntsongo, a ndzi famba hi ku hatlisa ndzi ya erivantini, ndzi endla onge ndzi ba bele ya le rivantini, ivi ndzi tlhela ndzi nga vulanga nchumu, ndzi ri karhi ndzi nwayela nhompfu leswaku ku nga vi na munhu la nga ta ndzi twa kumbe ku ndzi vona. Loko ndzi kula, sweswo ndzi swi tshikile, kambe mhaka ya leswaku ndzi fanele ku famba hi yindlu na yindlu a yi ndzi vabyisa. Ku fika ni namuntlha, ndzi twa ndzi vabya loko ndzi nga si ya evutirhelini, kambe ndza ya hambiswiritano.”

I yini lexi pfuneke Muxe ni Timbhoni ta manguva lawa ku fana na Theodore leswaku ti langutana ni ku chava loko tano? Bibele ya hlamula: “Hi ku pfumela, Muxe ú sukile etikweni ra Egipta . . . hikuva ú tiyiserile onge hi loko a ri karhi a vona loyi a nga voniwiki.”—Vaheveru 11:27.

Kunene, hi ku kombisa ripfumelo eka Yehovha, Muxe u kote ku hlula mintlhaveko yakwe ya ku titwa a nga faneleki ivi a tirha mintirho yakwe tanihi muavanyisi, muprofeta, murhangeri wa tiko, muhlanganisi wa ntwanano wa Nawu, ndhuna, n’wamatimu ni mutsari wa Bibele.

Hi mukhuva lowu fanaka, loko hi ri ni ripfumelo ro fana ni ra Muxe, hi ta famba onge hi loko hi ‘vona Loyi a nga voniwiki.’ Ripfumelo ro tano ri nyika xivindzi, ri hi pfuna ku byarha vutihlamuleri bya hina bya Vukreste—hambi loko hi titwa hi nga faneleki.