“Swa Fanela Leswaku Mi Tiyisela”

HI FANELE hi “tiyisela,” loko hi lava ku amukela leswi “xi nga [hi] tshembisa swona.” (Vaheveru 10:36) Xidyondzi xin’wana xa Bibele xi hlamusela leswaku rito ra Xigriki leri nge “ku tiyisela” leri muapostola Pawulo a ri tirhiseke endzimaneni leyi minkarhi yin’wana ri tirhiseriwe ku hlamusela “vuswikoti bya ximilana byo hanya eswiyin’weni swo nonon’hwa ni leswi nga riki swinene.”

Ximilana xo tano xi kumeka ntsena etintshaveni ta le Yuropa. Lexi tsakisaka, ximilana lexi xi vuriwa lexi hanyaka hi masiku. Kavula, ximilana lexi xa le tintshaveni ta Alps a xi hanyi hilaha ku nga heriki, kambe xi hanya malembe yo tala, xi ri karhi xi baleka swiluva leswo saseka hi ximumu xin’wana ni xin’wana. The New Encyclopædia Britannica yi hlamusela leswaku vito leri nge lexi hanyaka hi masiku ri thyiwe ximilana lexi hikwalaho ko “tiyisela ni ku hanya ka xona nkarhi wo leha.” (Vito ra xisayense ra swimilana leswi swa muxaka wa Sempervivum na rona ri vula leswaku “lexi hanyaka hi masiku.”)

Lexi endlaka ximilana lexi lexi hanyaka nkarhi wo leha xi xiyeka hi leswaku hakanyingi xi mila etindhawini leto biha swinene. Xi nga ha kumeka etinhlohlorhini ta tintshava laha ku hungaka moya, laha mahiselo ma nga ehlaka ma fika eka 35°C. hi 24 wa tiawara ntsena. Xi nga mila eribyeni lerikulu leri pandzekeke leri nga ni misava yitsongo. Xana hi swihi swin’wana swa swilotlelo swa ku tiyisela ka xona eka swiyimo swo tano swo nonon’hwa?

Ximilana lexi vuriwaka lexi hanyaka hi masiku xi ni matluka lama teleke mati, lama hi vukheta ma hlayisaka mati. Leswi swi xi pfuna leswaku xi kota ku khoma ndzhongo lowu veke kona hikwalaho ka ku na ka mpfula kumbe gamboko leyi n’okeke. Kutlulakwalaho, xi mila hi mintlawa leyi hlanganisaka matimba ya yona leswaku yi kota ku tiya eka nseketelo wa yona wa ribye. Hi ku dzima timitsu emaribyeni lama pandzekeke, xa sirheleteka eka maxelo yo biha, hambileswi ku nga ha vaka ku ri ni misava yitsongo. Hi marito man’wana, xi ringetela xin’wana ni xin’wana lexi nga kona eswiyin’weni leswi swo nonon’hwa leswaku xi kota ku hanya.

Loko hi vulavula hi tlhelo ra moya, hi nga ha tikuma hi ri eswiyin’weni leswi ringaka ku tiya ka ku tiyisela ka hina. Xana i yini lexi nga ta hi pfuna ku tiyisela ehansi ka ndzingo? Kukotisa ximilana lexi xi hanyaka hi masiku, hi nga hlayisa mati lama nyikaka vutomi ya Rito ra Xikwembu ni ku titshineta ekusuhi ni Vakreste va ntiyiso leswaku hi kuma nseketelo ni nsirhelelo. Ku tlula hinkwaswo, kukotisa ximilana lexi lexi hanyaka hi masiku, hi fanele hi namarhela swinene eka “ribye” ra hina, Yehovha, swin’we ni le Ritweni ra yena ni le ka nhlengeletano ya yena.—2 Samuwele 22:3.

Entiyisweni, ximilana lexi vuriwaka lexi hanyaka hi masiku, i xitsundzuxo lexinene xa leswaku, hambi ku ri eka matshamelo lama nonon’hwaka, hi nga tiyisela loko hi tirhisa malunghiselelo lama nga kona. Yehovha wa hi tiyisekisa leswaku ku tiyisela ko tano ku ta hi yisa eku ‘kumeni ka leswi hi tshembisiweke swona,’ leswi hi ku kongoma swi nga ta vula ku hanya hi laha ku nga heriki.—Vaheveru 6:12; Matewu 25:46.