“I Ntirho Wa Yehovha”

Leyi a a ku ri nhloko-mhaka ya El Norte, phepha-hungu ra Doroba-nkulu ra Monterrey, le Mexico. Nhloko-mhaka leyi a a yi vulavula hi Holo ya Nhlengeletano ya Timbhoni ta Yehovha leyi ya ha ku akiwaka.

Monterrey i doroba-nkulu leri nga ni vaaki va 2 300 000 (ku katsa ni lava tshamaka emalokixini lama nga ehandle ka doroba) lama nga en’walungwini wa Mexico, naswona ri na 19 200 wa vahuweleri va Mfumo. Ku ringana kwalomu ka lembe ni hafu, hi vun’we Timbhoni ti endle matshalatshala yo aka Holo leyinene ya Nhlengeletano leyi nga ni switulu swa kahle swa 3 000 ni swinghenisa moya. Timbhoni ta ndhawu leyi a a ti tsakile loko xirho xa Huvo leyi Fumaka ya Timbhoni ta Yehovha xi nyikele nkulumo yo nyiketela. Nongonoko wu katse ni matimu yo koma ya ntirho le Monterrey, naswona ku ve ni mbulavurisano ni lava hoxeke xandla eku akeni. Kutani vanhu va 4500 lava a va ri kwalaho va tiphine hi nkulumo yo nyiketela.

Leyi i ya vunharhu eka Tiholo ta Nhlengeletano ta sweswinyana leti akiweke le Mexico, eka tsima leri a ri vuriwa ro aka “Tiholo Ta Mfumo Ni Tiholo Ta Nhlengeletano Leti Engetelekeke Letikulu Ni Leti Antswaka.”

Leswi Mexico ri nga na 443 000 wa vahuweleri, ni lava a a va ri kona eXitsundzuxweni va 1 492 500 hi 1995, Tiholo ta Tinhlengeletano leti letintshwa, to tanihi leyi nga eMonterrey, entiyisweni ti ta hetisisa xikongomelo xa Xikwembu.