“A Ndzi Lorhi, A Swi Tano Ke?”

Xiviko lexi landzelaka xi huma eMalawi malunghana ni wun’wana wa Mintsombano ya Muganga ya Timbhoni ta Yehovha wa “Vadzunisi Lava Tsakeke” lowu nga ematin’wini lowu veke kona hi ximumu xa 1995.

“EGONDZWENI lerikulu, ku lava ku va exikarhi ka mpfhuka ku ya eribuweni ra le vupela-dyambu bya Tiva ra Malawi, a ku dzimiwe mfungho ro sungula endzhaku ka malembe ya 29. A wu hlayekisa xileswi, ‘Ntsombano Wa Muganga Wa Timbhoni Ta Yehovha.’

“Lori leyikulu a yi yimisiwe etlhelo ka mfungho lowu, naswona exigolonyanini xa yona a ku ri ni vapfhumba vo tlula 200 lava humaka edorobeni ra Mzuzu. Va te ni swiputsa swa swiambalo, minkumba, timbita, mabakiti, swakudya, tihunyi ni Tibibele leswaku va hlangana ni vamakwavo va xinuna ni va xisati va kwalomu ka 3 000 lava humaka etindhawini tin’wana.

“Loko hi ri karhi hi xeweta vamakwerhu lava xikaka elorini, George Chikako, la nga ni 63 wa malembe, u fikile, a ri karhi a susumeta xikanyakanya xa yena esaveni, a a fambe riendzo ra masiku mambirhi ku suka eNkhotakota. Hi malembe yo tala, Makwerhu Chikako u tirhele swigwevo swa mune ekhotsweni hikwalaho ka ku ala ka yena ku landzula misinya ya milawu ya Bibele. Makwavo wa yena hi tatana u file endzhaku ka ku bukuteriwa loko a ha pfaleriwe ekhotsweni. ‘A ndzi lorhi, a swi tano ke?’ ku vutisa Makwerhu Chikako. ‘Ntsombano lowu wu khomiwe dyambu ri lo hosi, naswona vanhu lava a va yimbelela tinsimu ta Mfumo hi marito lama tlakukeke! Nkarhi lowu hinkwawo, a hi boheka ku hlanganyela emunyameni wa vusiku, hi hlevetela kunene loko hi yimbelela tinsimu ta Mfumo, ni ku chukucha swandla swa hina loko hi fanele ku ba mavoko. Sweswi hi hlanganyela erivaleni, naswona vanhu va hlamarisiwa hi ku tala ka hina tanihi leswi a va ehleketa leswaku a hi talanga!’

“Ndhawu ya ntsombano yi biyeriwe hi rihlampfu ro endliwa hi byanyi naswona yi rharhiketiwe hi tinhlanga leswaku ku va ni ndzhuti. Swiyindlwana leswi endliweke hi byanyi ni byetlelo lebyi pfulekeke byi akiwile leswaku ku rhurheriwa vapfhumba. Moya wa nivusiku a wu tatiwe hi mpfumawulo wa miloti ya marito yo saseka lama nga ha miyetiwiki hikwalaho ko chava nxaniso.

“Vona ndlela leyi nhloko-mhaka-nkulu ya ntsombano leyi nge ‘Vadzunisi Lava Tsakeke’ yi fanelaka ha yona!”

[Xihlovo Xa Kona]

Mountain High Maps® Copyright © 1995 Digital Wisdom, Inc.