Ku Tshembeka—Hi Xiwelo Kumbe Hi Ku Tirhandzela?

“HAMBILESWI hi ntumbuluko ndzi nga tshembekiki, ndza tshembeka minkarhi yin’wana hi xiwelo.” Ku vula munhu la nga tshembekiki Autolycus ebukwini leyi nge The Winter’s Tale ya William Shakespeare. Leswi swi kombisa ku tsana lokukulu ka munhu—mboyamelo wa hina eku dyoheni, lowu vangiwaka hi ‘mbilu leyi kanganyisaka.’ (Yeremiya 17:9; Pisalema 51:5; Varhoma 5:12) Kambe xana leswi swi vula leswaku a hi nge swi koti ku tihlawulela emhakeni leyi? Xana mahanyelo lamanene i mhaka ya xiwelo? Nikatsongo!

Loko vana va Israyele va nga si nghena eTikweni leri Tshembisiweke, Muxe u vulavule na vona loko va ha dzime mixaxa erivaleni ra Mowabu. U veke minhlawulo mimbirhi leyi nga erivaleni emahlweni ka vona. A va ta yingisa swileriso swa Xikwembu ivi va kuma mikateko ya xona kumbe va swi ala kutani va tshovela mihandzu leyi vavaka ya xidyoho. (Deteronoma 30:15-20) Nhlawulo a wu ri wa vona.

Tanihi vanhu lava tihlawulelaka, na hina hi ni nhlawulo. Ku hava munhu ni un’we—ku katsa ni Xikwembu—loyi a hi sindzisaka ku endla leswinene kumbe ku endla leswo biha. Hambiswiritano, van’wana va nga ha vutisa hi ndlela leyi faneleke, ‘Loko timbilu ta hina ti voyamele evubihini, xana hi nga swi endlisa ku yini leswinene?’ Phela, dokodela wa meno u kambela meno hi vukheta leswaku a ta kota ku vona ku onhaka kumbe ku bola ku nga si ya kule. Hi ku fanana, hi fanele hi kambela timbilu ta hina to fanekisela leswaku hi lavisisa ku tsana ni ku hohloka ka mahanyelo. Ha yini? Hikuva “miehleketo leyo biha, ni ku dlayana, ni vuoswi, ni vuphukuphuku, ni ku yiva, ni vumbhoni byo hemba, ni ku sandzana, swi huma embilwini,” ku vule Yesu.—Matewu 15:18-20.

Leswaku a sirhelela tino, dokodela wa meno u fanele a susa hinkwako ku bola kwihi na kwihi loku a ku kumaka. Hilaha ku fanaka, ku laveka ku tiyimisela leswaku ku herisiwa “miehleketo leyo biha” ni ku navela loko biha loku humaka embilwini. Hi ku hlaya ni ku anakanyisisa hi Rito ra Xikwembu, ku nga Bibele, a hi tivi tindlela ta Muvumbi wa hina ntsena kambe hi tlhela hi dyondza ku endla leswinene.—Esaya 48:17.

Hosi ya Israyele Davhida u kume mpfuno lowu engetelekeke lowu a wu ta n’wi pfuna enyimpini yo endla leswinene. U khongerile: “Oho Šikwembu! v̌umba e nḍeni ka mina e mbilu le’yo tenga. U tlhela u pfuša e nḍeni ka mina e moya lo’wo tiya.” (Pisalema 51:10) Ina, loko hi xikhongelo hi titshega hi Yehovha Xikwembu, na hina hi nga hlula mboyamelo wa hina wo endla leswo biha kutani hi hlakulela “e moya lo’wo tiya” wo endla leswinene. Hi ndlela leyi, a hi nge tshembeki hi xiwelo. Ku ta va mhaka yo tihlawulela.

[Xifaniso lexi nga eka tluka 21]

Tanihi le mhakeni ya Davhida, ku khongela eka Yehovha ku nga hi pfuna ku endla leswinene