I Tibuku, Ni Tibuku, Ni Tibuku!

“A ku na ku hela e ku endleni ka tibuku le’to tala,” ku tsale Solomoni Hosi ya khale yo tlhariha. (Eklesiasta 12:12) Hi 1995 kwalomu ka buku yin’we leyintshwa yi humesiwile le Britain eka vaaki van’wana ni van’wana va tiko va kwalomu ka 580, leswi swi endle leswaku tiko leri ri tlula misava hinkwayo eku kandziyiseni ka tibuku letintshwa. China, tiko leri nga ni vaaki vo tala, ri ve ra vumbirhi hi ku kandziyisa tibuku ta 92 972 loko ti ringanisiwa ni ta Britain ta 95 015. Jarimani ri landzerile (67 206 wa tibuku), ivi ku landzela United States (49 276), kutani ku landzela Furwa (41 234). “Lexi endlaka Britain ri va emahlweni ngopfu emisaveni hinkwayo, hi leswi ririmi ra Xinghezi ri tirhisiwaka etindhawini to tala,” ku vula The Daily Telegraph phepha-hungu ra le London.

Swiviko swi kombisa leswaku ku xavisa tibuku ku hungutekile emalembeni yo hlayanyana, naswona sweswi 80 wa tiphesente ntsena ta vanhu lavakulu le Britain ti xava buku yin’we kumbe to tala hi lembe. Kambe xana vanhu va ti hlaya tibuku hinkwato leti va ti xavaka?

Buku yin’wana leyi yaka emahlweni yi hangalasiwa swinene ni ku hlayiwa i Bibele, sweswi yi kumeka hi xiphemu kumbe yi helerile hi tindzimi to tlula 2120. Loko u nga ri na yona, tihlanganise ni hofisi ya Sosayiti ya Watch Tower ya le kusuhi na wena leswaku u ta tikumela yona. Loko u ri na yona Bibele, yi teke ivi u kambisisa Matsalwa lama humelelaka eswihlokweni leswi nga eka magazini lowu. Loko u endla tano, u ta kuma vutivi bya Bibele lebyi nyikaka vutomi.