Ku Kombisa Rirhandzu Eka Lava Nga Ni Xilaveko

VAKRESTE va ni ndzhwalo ni lunghelo ro kombisa rirhandzu eka vamakwavo va vona va xinuna ni va xisati lava nga ni xilaveko. (1 Yohane 3:17, 18) Muapostola Pawulo u tsarile a ku: “A hi endleleni vanhu hinkwavo leswinene, ngopfu-ngopfu va ndyangu wa lava pfumeleke.” (Vagalatiya 6:10) Makwerhu loyi a a tirhela Yehovha ku ringana malembe-xikhume ya mune u kombiwe rirhandzu ra vuxaka bya Vukreste hi nkarhi wa ku vabya ka nsati wakwe ni rifu rakwe leri landzeleke. Wa tsala:

“Tanihi leswi a ndzi khathalela nsati wa mina ekaya hi nkarhi wa ku vabya ka yena, a ndzi nga swi koti ku tirha ntirho wo tihanyisa kwalomu ka tin’hweti timbirhi. Wa nga vona ndlela leyi ndzi ntshunxekeke ha yona loko vanghana va le vandlheni va hi pfunile hi ku swi rhandza! Tinyiko to tala ta mali—‘to pfuna eka swixava-xavana leswi engetelekeke,’ hilaha makhadi lama rhumeriweke na tona a ma vula hakona—ti hakele xikweleti xa yindlu, swikweleti swa mati ni gezi ni swixava-xavana swin’wana.

“Mavhiki mambirhi emahlweni ka rifu ra nsati wa mina, mulanguteri wa hina wa xifundzha u hi khutazile swinene. U tlhele a hi komba ti-slide leti vandlha a ri ta ti vona hi mahelo-vhiki. A hi swi kota ku yingisela minhlangano hi riqingho—ku katsa ni minhlangano ya ntirho wa nsimu leyi a yi fambisiwa hi mulanguteri wa xifundzha. Eka yin’wana ya yona, u kombele hinkwavo lava a va ri kona enhlanganweni wa ntirho wa nsimu leswaku tanihi ntlawa va ku, ‘xewani,’ eka nsati wa mina. Xisweswo, hambileswi a a nga swi koti ku hlangana na vona hi nyama, a nga titwi a ri yexe.

“Ku nga si hela awara endzhaku ka rifu ra yena, kwalomu ka vakulu hinkwavo a va ri endlwini ya mina. Vamakwerhu va xinuna ni va xisati vo tlula dzana va hi endzerile hi siku rolero ntsena. Swakudya swo ringana hinkwavo lava a va ri kona a swi tele hi ndlela leyi ‘hlamarisaka.’ A ndzi nge swi koti ku hlamusela tinyiko hinkwato leti ndzi ti kumeke, marito ya ntwela-vusiwana, marito yo chavelela ni swikhongelo leswi a ndzi khongeleriwa ha swona. Wa nga vona ndlela leyi a swi tiyisa ha yona! Eku heteleleni ndzi boheke ku tshikisa vamakwerhu ku tisa swakudya ni ku ndzi pfuna hi ku basisa yindlu!

“Hi kwihi kun’wana handle ka le nhlengeletanweni ya Yehovha laha hi nga kumaka swikombiso swo tano leswi nga riki na vutianakanyi swa ntwela-vusiwana, ku khumbeka ni rirhandzu? Vanhu vo tala namuntlha va ni vanghana va nga ri vangani. Yehovha u hi katekisile hi ku va ni ndyangu lowu ndlandlamuxiweke swinene wa vamakwerhu va xinuna ni va xisati!”—Marka 10:29, 30.