Xana A Ku Ri Vukati Byo Pfumala Vuxaka Bya Rimbewu?

EKA matshalatshala yo seketela leswi vuriwaka vunhwana lebyi nga heriki bya Mariya ni ku tekana ka yena na Yosefa, vapendi vo tala ni vavatli va maribye va mpfampfarhute Yosefa tanihi wanuna loyi a dyuhaleke. Va anakanya leswaku Yosefa a a ri muhlayisi wa Mariya hayi nuna wa yena. Kambe Mupapa John Paul wa Vumbirhi sweswinyana u ve ni langutelo leri hambaneke emhakeni leyi. U ringanyete leswaku Yosefa “a a nga dyuhalanga hi nkarhi wolowo.” Ematshan’weni ya sweswo, “vumunhu bya yena lebyinene ni nyiko leyi a nyikiwe yona, swi n’wi susumetele ku papalata vuxaka bya rimbewu na Mariya.”

Loko Mariya a a kunguhate ku tshama a ri nhwana hilaha ku nga heriki, ha yini a vutiwile? Mupapa wa hlamula: “Ku nga ha vuriwa leswaku hi nkarhi wa ku vutana ka vona a ku ri na xiboho xo karhi exikarhi ka Yosefa na Mariya malunghana ni kungu ro tshama a ri nhwana.”

Hambiswiritano, Bibele yi andlala mhaka leyi hi ndlela leyi hambaneke. Mhaka ya Matewu yi vula leswaku Yosefa “a nga tivananga na yena ku kondza a veleka n’wana wa mufana.” (Matewu 1:25, Catholic New American Bible, xiitaliki i xerhu.) Endzhaku ka ku velekiwa ka Yesu, vukati bya Yosefa na Mariya a byi yanga emahlweni byi ri hava vuxaka bya rimbewu. Vumbhoni byin’wana bya leswi hi leswaku endzhakunyana emhakeni ya Tievhangeli, Yesu u kombisiwa a ri ni vamakwavo va xinuna ni va xisati.—Matewu 13:55, 56.

Xisweswo, hambileswi Bibele yi vulaka leswaku loko Mariya a veleka Yesu a ri nhwana, a ku na xisekelo xo vula leswaku u tshame na Yosefa a ri nhwana vutomi bya yena hinkwabyo.