Xana Xikwembu Xi Ta Yi Lovisa Misava?

HI KU ya hi Mupapa John Paul wa Vumbirhi, vanhu va nga langutela vumundzuku hi ntshembo. U te, ematin’wini hinkwawo “vanhu va ye emahlweni va endla swidyoho, kumbexana leswikulu ku tlula ni leswi hlamuseriweke emahlweni ka ndhambhi.” Hambiswiritano, mupapa u hlamuserile, “eka marito ya ntwanano lawa Xikwembu xi ma vuleke eka Nowa ha swi xiya leswaku sweswi a ku na xidyoho lexi nga endlaka leswaku Xikwembu xi lovisa misava leyi xi nga lo yi vumba hi xoxe.”

Xana i ntiyiso leswaku Xikwembu a xi nge yi lovisi misava? Bibele yi vula leswaku endzhaku ka Ndhambhi, Xikwembu xi byele Nowa xi ku: “Nyama yiṅwana ni yiṅwana yi nga ka yi nga ha [l]ov̌isiwi hi mati ya ndambi, ni leŝaku ku nga ka ku nga ha v̌i na ndambi yiṅwana le’yi nga ta lov̌isa misav̌a.” (Genesa 9:11) Mupapa u vula leswaku hi marito lawa, Xikwembu “xi tibohile ku hlayisa [misava] xi nga yi lovisi.”

Bibele yi swi veka erivaleni leswaku Muvumbi a nge pfumeli pulanete ya hina yi lovisiwa. Bibele yi ri: “Misav̌a yi ṭhama hi laha ku nga heriki.” (Eklesiasta 1:4) Kambe ku ni swo tala leswi nga ta dyondziwa eka Ndhambhi—ku nga nchumu lowu mupapa a nga vulavuliki ha wona.

Yesu u vule leswaku swiyimo swa misava enkarhini wa vukona bya yena bya nkarhi lowu taka swi ta va “hilaha masiku ya Nowa a ma ri hakona,” laha va nga “lemukangiki nchumu ku fikela loko ndhambi yi fika yi va kukula hinkwavo.” (Matewu 24:37-39) Hi ku fanana, muapostola Petro u tsale leswaku tanihi leswi “misava ya nkarhi wolowo yi lovisiw[eke] . . . loko mati ma yi khubumeta,” kutani “siku ra vuavanyisi ni ra ndzoviso wa vanhu lava nga xiximiki Xikwembu” ri langutane ni misava ya sweswi.—2 Petro 3:5-7.

Xana Yesu na Petro a va wu rivarile ntwanano wa Xikwembu eka Nowa? Nikatsongo! Tanihi laha xi vuleke hakona entwananweni wa Nowa, Xikwembu a xi nge tirhisi mati ya ndhambhi leswaku xi herisa mafambiselo lawa yo biha ya swilo. Ematshan’weni ya sweswo, xi ta tirhisa matimba ya “Hosi ya tihosi ni Mufumi wa vafumi,” Yesu Kreste. (Nhlavutelo [Apocalipsi] 19:11-21) Hikwalaho, hi ku ya hi Bibele misava a yi nge lovisiwi, kambe “misava” ya vanhu vo homboloka handle ko tsandzeka yi ta herisiwa. (Swivuriso 2:21, 22; Nhlavutelo 11:18) Endzhaku ka sweswo, “la’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.