“Bibele Ya Ritiho Rin’we”

JOSEPH SCHERESCHEWSKY, loyi a lamaleke endzhaku ko hlaseriwa hi vuvabyi, a kota ku tsala ntsena hi ku thayipa, a tirhisa ritiho rin’we. Kambe u yi fikelerile pakani ya yena—yo hundzuluxela Bibele yi ya eka Xichayina, ku nga rin’wana ra tindzimi leti nonon’hwaka swinene eka munhu wumbe leswaku a ri tiva.

Schereschewsky loyi a ri Muyuda, u endle nkambisiso ivi a amukela Vukreste loko a ri munhu lonkulu. Eku heteleleni u ve murhumiwa eChina. Kwalaho u fike a hlanganyela emintirhweni yo tala yo hundzuluxela, u sungule hi 1866 ivi a hambeta ku fikela eka malembe yo sungula ya lembe-xidzana ra vu-20. Hikwalaho ka ndhavuko wa yena wa Vuyuda, Schereschewsky a tolovelane ngopfu ni Xiheveru ku tlula swidyondzi-kulobye. Xisweswo, u byarhisiwe ku hundzuluxela Matsalwa hinkwawo ya Xiheveru. Eku heleni ka ntirho-vutomi wa yena wo leha, u tlhele a humesa vuhundzuluxeri bya Xichayina bya Bibele hinkwayo leyi nga ni swikombo.

Leswi a ri muhundzuluxeri wa Bibele, Joseph Schereschewsky a ri muyimeri la hisekaka wa vuhundzuluxeri bya ririmi leri tolovelekeke. Kambe ntirho wa yena a wu nga olovi. Ku hoxa xandla ka yena eka Bibele ya Xichayina a ku hlawulekile, ku vula The Book of a Thousand Tongues, “hikuva a yi helerile naswona yi hetisisiwe loko ku anakanyiwa hi swihinga swo tala.”

Loko mavoko ya Schereschewsky ma ta va ma lamarile, u ye emahlweni ni ntirho wa yena. Ku thayipa a ku lava matshalatshala lamakulu, tanihi leswi a nga ha tirhisi mavoko ya yena hi ndlela leyi tolovelekeke. Hikwalaho u vitane vuhundzuluxeri lebyi a ku i Bibele ya yena ya ritiho rin’we. Leswaku a yi humesa ku nga khathariseki ku lamala ka yena, Schereschewsky u tiyisele malembe ya 25. Hikwalaho ka ku nga lan’wi ka yena, u hlanganyerile eku endleni ka leswaku Rito ra Xikwembu ri twisisiwa hi Xichayina—ku nga ririmi leri vulavuriwaka hi vanhu vo tala swinene ku tlula vahi ni vahi.

[Laha Xifaniso Xi Humaka Kona eka tluka 11]

Both images: Courtesy of American Bible Society Archives