Hi Byihi Vumundzuku Bya Misava Ya Hina?

“Ku hava lembe-xidzana rin’wana ematin’wini leri ringanaka ni ra vu-20 hi madzolonga ya tiko ya tihanyi, hi nhlayo ya tinyimpi leti lwiweke, mintshungu ya vabaleki lava veke kona, timiliyoni ta vanhu lava dlayiweke enyimpini, ni mali yo tala leyi tirhiseriwaka ‘ku tilwela,’” ku vula World Military and Social Expenditures 1996. Xana xiyimo lexi xi ta kala xi cinca?

Muapostola Petro u tsundzuxe Vakreste hi xitshembiso lexi endliweke hi Xikwembu malembe-xidzana yo tala emahlweninyana: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa [Xikwembu], naswona ku ta va ni ku lulama eka swona.” (2 Petro 3:13) Marito wolawo eku sunguleni a ma ri xiphemu xa vuprofeta bya Esaya. (Esaya 65:17; 66:22) Israyele wa khale u vone ku hetiseka ka byona ko sungula loko tiko ri tlheriseriwe etikweni leri tshembisiweke loko ri ve evuhlongeni eBabilona ku ringana 70 wa malembe. Hi ku phindha xitshembiso lexi xa “matilo lamantshwa ni misava leyintshwa,” Petro u kombise leswaku vuprofeta a bya ha ta hetisisiwa hi mpimo lowukulu—emisaveni hinkwayo!

Ku simekiwa ka swiyimo leswo lulama emisaveni hinkwayo i ku rhandza ka Xikwembu, naswona swi ta tisiwa hi Mfumo wa xona wa le tilweni, Kreste a ri Hosi ya wona. “Tiko ri nga ka ri nga ha lwi ni riṅwana, kutani a ku nga ha dyonḍisiwi ku lwa.” (Esaya 2:4) Ku rhula koloko loku heleleke ni ku sirheleleka emisaveni hi leswi Yesu a swi dyondziseke valandzeri va yena leswaku va swi langutela ni ku swi khongelela eka leswi hi ntolovelo swi vitaniwaka Tata wa Hina, kumbe Xikhongelo xa Hosi, a ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

Xana u nga swi tsakela ku hanya emisaveni leyo lulama hilaha tilo ri nga hakona? Wolowo i ntshembo lowu Bibele yi wu nyikaka un’wana ni un’wana loyi hi mbilu hinkwayo a lavaka ku tiva Xikwembu ni ku hanya hi ku ya hi tindlela ta xona leto lulama.