Ku Dyondza Eka Swihoxo Swa Nkarhi Lowu Hundzeke

MILAWU ya mahanyelo ya Muvumbi wa hina a yi na makumu naswona a yi hundzuki. Hikwalaho ka xivangelo lexi nsinya wa nawu lowu kumekaka eka Vagalatiya 6:7 wa tirha namuntlha: “Xin’wana ni xin’wana lexi munhu a xi byalaka, u ta tlhela a tshovela xona.” I ntiyiso, munhu a nga ha vula leswaku a nga na vutihlamuleri eka Xikwembu, kambe nawu wa Xikwembu a wu hundzuki. Eku heteleleni, ku hava munhu loyi a balekelaka vuyelo bya swiendlo swa yena.

Ku vuriwa yini hi munhu loyi a hanyaka vutomi byo biha ivi a hundzuka, a va nandza wa Xikwembu? A nga ha boheka ku langutana ni vuyelo bya mahanyelo ya yena ya nkarhi lowu hundzeke. Hambiswiritano, leswi a swi vuli swona leswaku Xikwembu a xi n’wi rivalelanga. Vuxaka bya vuoswi bya Hosi Davhida na Batixeba byi tise khombo lerikulu evuton’wini bya yena. A a nga ta swi balekela leswi. Kambe u hundzukile, ivi a rivaleriwa hi Xikwembu.—2 Samuwele 12:13-19; 13:1-31.

Xana u titwa u hele matimba loko u langutana ni vuyelo bya swihoxo leswi u swi endleke? Loko hi swi languta hi ndlela leyinene, ku tisola ku nga va xitsundzuxo eka hina leswaku ‘hi tivonela leswaku hi nga endli leswi nga ni khombo.’ (Yobo 36:21) Ina, ku tisola ku nga hi pfuna ku papalata ku engeta xidyoho. Lexi pfunaka swinene, Davhida u tirhise ntokoto lowu a wu kumeke eka xidyoho lexi a xi endleke leswaku ku nga vuyeriwi yena ntsena kambe ni van’wana. U te: “Nḍi ta dyonḍisa v̌adyohi e tindlela ta wena, kutani v̌endlaŝiv̌i v̌a ta v̌uyela ka wena.”—Pisalema 51:13.

[Swifaniso leswi nga eka tluka 7]

Davhida u kume dyondzo eka xidyoho xa yena na Batixeba