Musa Wa Yehovha Wu Hi Nyika Matimba
“Oho Šikwembu! nḍi twele v̌usiwana hi tintŝalo ta wena [ta rirhandzu, NW]; hi musa lo’wukulu wa wena, hlangula ŝidyoho ŝa mina.”—PISALEMA 51:1.
1, 2. Un’wana wa malandza ya Yehovha a nga khumbiwa ku fikela kwihi hi xidyoho lexikulu?
MUNHU a nge wu tluli nawu wa Yehovha kambe a nga xupuriwi. Sweswo swa tikomba swinene loko hi endle xidyoho lexikulu eka Xikwembu! Hambi loko hi tirhele Yehovha hi ku tshembeka hi malembe yo tala, ku tlula nawu wa yena swi nga vanga ku karhateka lokukulu kumbe ntshikilelo lowukulu emianakanyweni. Hi nga ha vona onge Yehovha u hi tshikile, ni leswaku a swa ha fanelanga leswaku hi n’wi tirhela. Xidyoho xa hina xi nga fana ni papa lerikulu leri hi sivelaka ku kuma tintswalo ta Xikwembu.
2 Davhida Hosi ya khale ya Israyele u tshama a tikuma a ri exiyin’weni xexo. Xana xiyimo lexi xi tise ku yini ke?
Magoza Lama Hoxeke Ma Nga Yisa Eka Xidyoho Lexikulu
3, 4. Ku humelele yini hi Hosi Davhida hi nkarhi lowu swilo a swi famba kahle?
3 Davhida a a rhandza Xikwembu, kambe u teke magoza lama hoxeke lama yiseke eka swidyoho leswikulu. (Ringanisa Vagalatiya 6:1.) Leswi swi nga humelela eka munhu wihi ni wihi loyi a nga hetisekangiki, ngopfu-ngopfu loko a ri ni vutihlamuleri ehenhla ka vanhu van’wana. Tanihi hosi leyi humelelaka, Davhida a a ri ni ndhuma ni matimba. Ku hava ni un’we loyi a veke ni xivindzi xo kaneta rito rakwe. Vavanuna va vutlharhi a va n’wi tirhela hi timbilu ta vona hinkwato, naswona vanhu a va gingiritekela ku endla leswi a va byelaka swona. Hambi swi ri tano, Davhida u endle swidyoho hi ku titekela vavasati vo tala ni ku hlaya vanhu.—Deteronoma 17:14-20; 1 Tikronika 21:1.
4 Enkarhini lowu a a humelela hi tlhelo ra swilo swa nyama, Davhida u dyohele Xikwembu ni vanhu. Phela, swidyoho swin’wana swa tlhandlhamana tanihi miluko leyi hlanganeke ya nguvu leyi kunguhatiweke hi Sathana! Loko Vaisrayele-kulobye va ri karhi va lwa ni Vaamoni, Davhida u langutisise Batixeba, nsati wo saseka wa Uriya, loyi a ri karhi a hlamba, yena a ri ehenhla ka lwangu ra yindlu ya yena. Leswi Uriya a a ri enyimpini, hosi yi lerise leswaku wansati loyi a tisiwa endlwini ya yona ya vuhosi, kutani yi oswana na yena. Anakanya ndlela leyi a tsemekeke nhlana ha yona loko endzhaku a kuma leswaku wansati loyi u bihile emirini! Davhida u rhumele vanhu ku ya vitana Uriya, a ehleketa leswaku u ta xwa vusiku na Batixeba ni leswaku u ta pfumela leswaku n’wana i wa yena. Hambi leswi Davhida a n’wi pyopyiseke, Uriya u arile ku ya etlela ni nsati wa yena. Kutani tanihi leswi se a a ri ekhombyeni lerikulu, Davhida u rhumele swileriso swa xihundla eka Yowabu mufambisi wa nyimpi leswaku a veka Uriya laha nyimpi yi hisaka kona, laha a a tiyiseka leswaku u ta dlayiwa. Uriya u dlayiwile enyimpini, kutani nsati wakwe a rila nkosi ku ringana nkarhi lowu tolovelekeke, ivi Davhida a n’wi teka vanhu va nga si swi xiya leswaku u bihile emirini.—2 Samuwele 11:1-27.
5. Ku humelele yini endzhaku ka loko Davhida a endle xidyoho na Batixeba, naswona swidyoho swa yena swi ve ni vuyelo byihi ehenhla ka yena?
5 Hi ku tirhisa muprofeta Natani, Xikwembu xi paluxe swidyoho swa Davhida, kutani xi ku: “Nḍi ta humesa khombo e ndlwini ya wena.” Xisweswo, n’wana loyi Batixeba a n’wi tswaleke a fa. (2 Samuwele 12:1-23) Aminoni n’wana wa mativula wa Davhida, u pfinye Tamari, makwavo wakwe hi tatana, ivi a dlayiwa hi buti wakwe. (2 Samuwele 13:1-33) Abixalomu n’wana hosi u ringete ku vutla mfumo ivi a tsongahata tata wakwe hi ku va ni vuxaka bya rimbewu ni vavasati lavatsongo va Davhida. (2 Samuwele 15:1–16:22) Nyimpi ya xin’wana-manana yi hele loko Abixalomu a fa, leswi swi dyiseke Davhida mbitsi swinene. (2 Samuwele 18:1-33) Hambi swi ri tano, swidyoho swa Davhida swi endle leswaku a titsongahata ni ku n’wi endla a xiya leswaku u fanele ku tshama ekusuhi ni Xikwembu xakwe lexi nga ni ntwela-vusiwana. Loko hi dyohile, a hi hundzukeni, hi titsongahata, hi titshineta ekusuhi na Yehovha.—Ringanisa Yakobo 4:8.
6. Ha yini Hosi Davhida a ve ni nandzu lowukulu?
6 Lexi xi nga endla leswaku Davhida a va ni nandzu lowukulu hi leswi a a ri hosi ya Israyele leyi a yi wu tiva kahle Nawu wa Yehovha. (Deteronoma 17:18-20) A a nga ri faro wa le Egipta kumbe hosi ya le Babilona lava a va pfumala vutivi byo tano, ni lava a va tshamela ku endla swilo leswi Xikwembu a xi nga swi amukeli. (Ringanisa Vaefesa 2:12; 4:18.) Tanihi xirho xa tiko leri tinyiketeleke eka Yehovha, Davhida a a swi tiva leswaku vuoswi ni ku dlaya i swidyoho leswikulu. (Eksoda 20:13, 14) Vakreste na vona va wu tiva nawu wa Xikwembu. Hambi swi ri tano, ku fana na Davhida, van’wana va vona va wu tlula, hikwalaho ka xidyoho lexi va tswariweke na xona, ku tsana loku vanhu va nga na kona, ni hikwalaho ka ku hluleka ku lwisana ni ndzingo. Loko sweswo swi humelela eka un’wana ni un’wana wa hina, a hi fanelanga hi tshama emunyameni lowu sivaka xiyimo xa hina xa moya, wu hi vangela gome lerikulu.
Ku Boxa Swidyoho Swa Wena Swi Ku Nyika Matimba
7, 8. (a) Ku humelele yini hi Davhida loko a ringeta ku fihla swidyoho swakwe? (b) Ha yini u fanele ku boxa swidyoho swa wena kutani u nga ha yi na swona emahlweni?
7 Loko hi ri ni nandzu wa ku tlula milawu leyikulu ya Xikwembu, hi nga swi kuma swi nonon’hwa ku boxa swidyoho swa hina, hambi ku ri eka Yehovha. Xana ku nga humelela yini ehansi ka swiyimo swo tano? Eka Pisalema 32, Davhida u pfumerile a ku: “Loko nḍi miyerile [ematshan’wini yo boxa swidyoho], marambu ya mina a ma gudlagudla, hi ku konya ka mina hi siku hikwaro. Hikuv̌a nhlekanhi ni v̌usiku v̌oko ra [Yehovha] ri ṭhama ri nḍi tikela, matimba ya mina ma hunḍukile ku oma ka šimumu.” (Tindzimana 3, 4) Davhida la hambukeke u tsanile hikwalaho ka ku ringeta ku fihla xidyoho xakwe ni ku kandziyela ripfalo leri ri n’wi byelaka leswaku u ni nandzu. Ku karhateka swi n’wi hete matimba swinene lerova a a fana ni murhi lowu hlaseriweke hi dyandza, lowu nga riki na ndzhongo lowu hanyisaka. Entiyisweni, swi nga ha endleka a xanisekile emianakanyweni ni le mirini. Entiyisweni u lahlekeriwe hi ntsako wakwe. Loko un’wana wa hina a tikuma a ri exiyin’weni lexi fanaka, xana u fanele a endla yini?
8 Ku boxa swidyoho swa wena eka Xikwembu swi nga endla leswaku u rivaleriwa ni ku kuma matimba. “Nḍi ku tiv̌isile šidyoho ša nga, a nḍi fihlanga ku homboloka ka nga,” ku yimbelela Davhida. “Nḍi te: Nḍi ta tiv̌ula ka Yehova e ku dyoha ka mina; kutani u hlangurile nanḍu wa šidyoho ša mina.” (Pisalema 32:5) Xana wa karhateka hi xidyoho xo karhi lexi u xi fihleke? Xana a swi antswi ku xi boxa kutani u tshika ku xi endla leswaku u ta kuma musa wa Xikwembu? Ha yini u nga vitani vakulu va vandlha, u kombela ku horisiwa emoyeni? (Swivuriso 28:13; Yakobo 5:13-20) Moya wa wena lowu kombaka ku hundzuka wu ta amukeriwa, naswona hi ku famba ka nkarhi u nga tlhela u kuma ntsako wa wena wa Vukreste. “Ku katekile munhu loyi ku riv̌aleriweke ku dyoha ka yena, loyi ŝidyoho ŝa yena ŝi funengetiweke,” ku vula Davhida. “Ku katekile munhu loyi Yehova a nga ṅwi hlayeriki ku biha ka yena, loyi ku nga riki na mano e mbilwini ya yena!”—Pisalema 32:1, 2.
9. Pisalema 51 yi qambiwe rini, naswona ha yini?
9 Davhida na Batixeba a va ri ni nandzu eka Yehovha Xikwembu hikwalaho ka xidyoho xa vona. Hambi leswi a va ta va va dlayiwile hikwalaho ka swidyoho swa vona, Xikwembu xi ve ni musa eka vona. Naswona a xi ri ni musa lowu hlawulekeke eka Davhida hikwalaho ka ntwanano wa Mfumo. (2 Samuwele 7:11-16) Langutelo ra Davhida leri kombisaka ku hundzuka eka swidyoho swa yena malunghana na Batixeba ri voniwa eka Pisalema 51. Pisalema leyi yi khumbaka mbilu yi qambiwe hi hosi leyi tisoleke endzhaku ka loko muprofeta Natani a n’wi kombise ku biha ka swidyoho swa yena eku tluleni ka nawu wa Xikwembu. Natani a a fanele ku va ni xivindzi leswaku a kombisa Davhida swidyoho swa yena, hi laha vakulu va Vukreste va faneleke ku va ni xivindzi ha kona loko va endla ntirho wo tano namuntlha. Ematshan’wini yo ala xihehlo lexi ni ku lerisa leswaku Natani a dlayiwa, hosi yi pfumele swidyoho swa yona hi ku titsongahata. (2 Samuwele 12:1-14) Pisalema 51 yi kombisa leswi a swi byeleke Xikwembu hi xikhongelo malunghana ni swiendlo swakwe swa manyala, naswona swi lava leswaku munhu a anakanyisisa ha swona hi xikhongelo, ngopfu-ngopfu loko a endle xidyoho, kutani a navela ku kuma musa wa Yehovha.
Hi Ni Nandzu Eka Xikwembu
10. Davhida u kote ku hlakarhela emoyeni hi ndlela yihi?
10 Davhida a nga lavanga ku yimelela xidyoho xa yena, kambe u komberile a ku: “Oho Šikwembu! nḍi twele v̌usiwana hi tintŝalo ta wena; hi musa lo’wukulu wa wena, hlangula ŝidyoho ŝa mina.” (Pisalema 51:1) Hi xidyoho lexi a xi endleke, Davhida a a tlule Nawu wa Xikwembu. Hambi swi ri tano, a ku ri ni ntshembo wa leswaku a nga hlakarhela emoyeni loko Xikwembu xi n’wi kombisa musa hi ku ya hi tintswalo ta xona ta rirhandzu kumbe rirhandzu ra xiviri. Tintswalo letikulu ta Xikwembu ta nkarhi lowu hundzeke ti nyike hosi leyi hundzukeke xisekelo xo va ni ripfumelo ra leswaku Muvumbi wa yona a a ta susa swidyoho swa yona.
11. I yini leswi a swi kombisiwa hi magandzelo ya Siku ro Phahlelana Mariyeta, naswona i yini lexi munhu a xi lavaka leswaku a ta ponisiwa namuntlha?
11 Hi ku tirhisa swivumbeko swa vuprofeta leswi yimelaka magandzelo ya Siku ro Phahlelana Mariyeta, Yehovha u kombise leswaku u ni lunghiselelo ro basisa vanhu lava hundzukeke exidyohweni xa vona. Se ha swi tiva leswaku u ni musa ni le ka hina a tlhela a hi rivalela hikwalaho ka ripfumelo ra hina egandzelweni ra nkutsulo ra Yesu Kreste. Leswi Davhida, loyi a a tiva swifanekiselo swa gandzelo leri ntsena, a koteke ku tshemba tintswalo ta rirhandzu ni musa wa Yehovha, malandza ya Xikwembu ya namuntlha a ma fanele ma kombisa ripfumelo leri engetelekeke eka nkutsulo lowu lunghiseleriweke leswaku ma ponisiwa!—Varhoma 5:8; Vaheveru 10:1.
12. Ku dyoha swi vula yini, naswona Davhida u titwise ku yini hi ku dyoha ka yena?
12 Loko a kombela Xikwembu, Davhida u ye emahlweni a ku: “Nḍi hlantŝe kunene, u susa ku homboloka ka mina, u nḍi basisa hi ku susa ŝiv̌i ŝa mina, hikuv̌a nḍi tiv̌isisa šidyoho ša mina, ni šiv̌i ša mina ši le mahlweni ka mina hi masiku hikwawo.” (Pisalema 51:2, 3) Ku dyoha i ku tlula mimpimanyeto ya Yehovha. Davhida a a endle sweswo hakunene. Kambe, a a nga fani ni mudlayi kumbe muoswi loyi a nga riki na mhaka ni nandzu wa yena, loyi a karhatekaka hi ku xupuriwa ka yena ntsena kumbe ku anakanya leswaku a nga tluleriwa hi vuvabyi. Tanihi leswi a a rhandza Yehovha, Davhida a a venga leswo biha. (Pisalema 97:10) A a karhateka hi xidyoho xakwe naswona a a lava leswaku Xikwembu xi susa xidyoho lexi hi ku helela. Davhida a a swi vona kahle leswaku u ni nandzu naswona a a tisola hi leswi a pfumeleleke ku navela kakwe ko endla xidyoho ku n’wi hlula. A a tshama a ri karhi a anakanya hi xidyoho xa yena, hikuva ripfalo ra ku tivona nandzu ra munhu loyi a chavaka Xikwembu a ri heli ku kondza loko a hundzuka, a boxa swidyoho swa yena kutani Yehovha a n’wi rivalela.
13. Ha yini Davhida a vule leswaku u dyohele Xikwembu ntsena?
13 Loko a pfumela nandzu wa yena emahlweni ka Yehovha, Davhida u te: “Nḍi dyohele wena, wena ntsena; nḍi endlile le’ŝo biha e mahlweni ka wena, hi laha u nga ta v̌a l’a lulameke loko u v̌ulav̌ula, ni loyi a tengeke loko u av̌anyisa.” (Pisalema 51:4) Davhida a a tlule milawu ya Xikwembu, a nyamisa ntirho wa vuhosi, ni ku ‘delela Yehovha,’ a N’wi vangela ku rhukaniwa. (2 Samuwele 12:14; Eksoda 20:13, 14, 17) Swiendlo swa Davhida swa vudyoho a swi bihile ni le ka Vaisrayele ni swirho swa ndyangu wa yena, tanihi leswi mudyohi la khuvuriweke namuntlha a vangelaka va vandlha ra Vukreste ni varhandziwa ku khunguvanyeka kumbe ku karhateka. Hambi leswi hosi leyi hundzukeke a yi swi tiva leswaku yi dyohele vanhu-kulobye, tanihi Uriya, yi swi vonile leswaku yi ni vutihlamuleri lebyikulu eka Yehovha. (Ringanisa Genesa 39:7-9.) Davhida u pfumerile leswaku ku avanyisa ka Yehovha ku ta va loku lulameke. (Varhoma 3:4) Vakreste lava dyoheke va fanele ku va ni langutelo leri fanaka.
Swiyimo Leswi Tsanisaka
14. I swiyimo swihi leswi tsanisaka leswi Davhida a swi vuleke?
14 Hambi leswi Davhida a a nga ringeti ku tiyimelela, u te: “Waŝiv̌o, nḍi tŝariwile e ku dyoheni, mana wa mina o nḍi v̌elekile ŝiv̌ini.” (Pisalema 51:5) Davhida u tswariwe a ri na xidyoho, naswona mana wakwe u karhatiwe hi switlhavi swa ku veleka hikwalaho ka xidyoho lexi a tswariweke na xona. (Genesa 3:16; Varhoma 5:12) Marito ya yena a ma vuli swona leswaku vuxaka bya rimbewu exikarhi ka vanhu lava tekaneke, ku tika ni ku veleka i swidyoho, hikuva hi xona Xikwembu xi lunghiseleleke vukati ni ku tswariwa ka vana; naswona Davhida a a nga vulavuli hi xidyoho xo karhi xa mana wakwe. U velekeriwe exidyohweni hikwalaho ka leswi vatswari va yena a va ri ni vudyoho, ku fana ni vanhu hinkwavo lava nga hetisekangiki.—Yobo 14:4.
15. Hambi leswi Xikwembu xi nga swi xiyaka swiyimo leswi katsekaka, i yini lexi hina hi nga fanelangiki ku xi endla?
15 Loko hi endle xidyoho, hi nga vula swiyimo swihi ni swihi leswi nga ha vaka leswi swi hoxe xandla eku dyoheni ka hina, loko hi khongela eka Xikwembu. Kambe hi nga tshuki hi hundzula tintswalo letikulu ta Xikwembu ti va xisirhelelo xa mahanyelo yo biha kumbe ku tirhisa vudyoho lebyi hi tswariweke na byona tanihi xisirhelelo xo balekela nandzu wa xidyoho xa hina. (Yuda 3, 4) Davhida u amukele nandzu wo tinyiketela eku anakanyeni hi swilo leswi nga tengangiki ni ku tinyiketela ku hluriwa hi ndzingo. A hi khongeleleni leswaku hi nga tshuki hi yisiwa endzingweni, kutani hi teka goza leri fambisanaka ni xikhongelo xo tano.—Matewu 6:13.
Xikombelo Xo Hlantswiwa Swidyoho
16. Xikwembu xi tsakela mfanelo yihi, naswona sweswo swi fanele ku ma khumba njhani mahanyelo ya hina?
16 Vanhu va nga ha vonaka va ri lavanene, lava tinyiketeleke eka Xikwembu, kambe xona xi languta mbilu, xi vona leswaku i vanhu va njhani. Davhida u te: “Kambe, [wena Yehovha] u ranḍa le’ŝinene e mbilwini ya munhu, nḍi dyonḍise v̌utlhari e šihundleni ša moya wa mina!” (Pisalema 51:6) Davhida a a ri ni nandzu wa mavunwa ni wa ku pfumala ku tshembeka hi ku endla makungu ya leswaku Uriya a dlayiwa ni ku ringeta ku fihla ntiyiso malunghana na ku tika ka Batixeba. Hambi swi ri tano, a a swi tiva leswaku Xikwembu xi tsakela ntiyiso ni ku tenga. Leswi swi fanele ku hi susumetela ku tikhoma hi ndlela leyinene, hikuva Yehovha u ta hi landzula loko hi ri vakanganyisi. (Swivuriso 3:32) Davhida nakambe u swi xiyile leswaku loko Xikwembu xo n’wi ‘endla a va ni vutlharhi lebyinene,’ tanihi hosi leyi hundzukeke, a a ta swi kota ku fambisana ni mimpimanyeto ya Xikwembu evuton’wini bya yena hinkwabyo.
17. Ku khongelela ku hlantswiwa hi hisopa a swi ri ni nkoka wihi?
17 Hikwalaho ka leswi mupisalema a voneke leswaku u fanele ku pfuniwa hi Xikwembu leswaku a hlula mimboyamelo yo endla swidyoho, u ye emahlweni a kombela a ku: “Nḍi basise hi hisopa, hi kona nḍi nga ta tenga; nḍi hlantŝe, kutani nḍi ta basa e ku tlula gamboko.” (Pisalema 51:7) Murhi wa hisopa (kumbexana marjoram, kumbe Origanum maru) nakambe a wu tirhisiwa eka nkhuvo wa ku tibasisa ka vanhu lava a va khomiwe hi vuvabyi bya nhlokonho. (Levhitika 14:2-7) Kutani a swi fanerile leswaku Davhida a khongelela ku susiwa xidyoho hi hisopa. Mianakanyo ya ku basisiwa nakambe yi yelana ni xikombelo xa yena xa leswaku Yehovha a n’wi hlantswa leswaku a ta tenga hi ku helela, a basa ku tlula ni gamboko leyi nga riki na nsiti kumbe thyaka rin’wana. (Esaya 1:18) Loko un’wana wa hina a kingindziwa hi ripfalo ra xidyoho xo karhi lexi a xi endleke, a a ve ni ripfumelo ra leswaku loko a lava ku rivaleriwa hi Xikwembu, hi ku va la hundzukaka, xi nga n’wi basisa ni ku n’wi hlantswa hi ku tirhisa gandzelo ra Yesu ra nkutsulo.
Xikombelo Xo Tlhela U Kuma Matimba
18. Xiyimo xa Davhida a xi ri xihi loko a nga si hundzuka ni ku boxa swidyoho swakwe, naswona ku swi tiva swi nga hi pfuna njhani namuntlha?
18 Mukreste wihi ni wihi loyi a tshameke a kingindziwa hi ripfalo ra ku tivona nandzu a nga ma twisisa marito ya Davhida lama nge: “[Yehovha] nḍi byele ku khana ni ku ṭaka, kutani marambu lawa u ma ṭhov̌eke ma ta pfuka hi ku ṭaka.” (Pisalema 51:8) Loko Davhida a nga si hundzuka ni ku boxa swidyoho swakwe, ripfalo ra yena leri karhatekeke ri n’wi vangele gome. Hambi ku ri tinsimu ta ntsako ni ku khana loku a ku vangiwa hi vayimbeleri lavanene ni va vutshila a swi n’wi tiselanga ntsako. Gome ra Davhida ra ku va a nga ha amukeriwi hi Xikwembu hikwalaho ka xidyoho a ri ri rikulu swinene lerova a a fana ni munhu loyi marhambu yakwe ma fayiweke hi vukarhi. A a lava ku rivaleriwa, ku hlakarhela emoyeni ni ku tlhela a kuma ntsako lowu a a ri na wona eku sunguleni. Mudyohi la hundzukeke na yena namuntlha u fanele ku rivaleriwa hi Yehovha leswaku a ta tlhela a kuma ntsako lowu a a ri na wona loko a nga si endla xiendlo lexi ngheniseke vuxaka bya yena ni Xikwembu ekhombyeni. Leswaku munhu la hundzukeke a tlhela a kuma “ku tsaka loku nyikiwaka hi Moya lowo Kwetsima” swi kombisa leswaku Yehovha u n’wi rivalerile naswona wa n’wi rhandza. (1 Vatesalonika 1:6) Sweswo swi nyika nchavelelo lowukulu swonghasi!
19. Davhida a a ta titwisa ku yini loko Xikwembu xi sula swidyoho swakwe hinkwaswo?
19 Davhida u ye emahlweni a ku: “Ṭhika ku languta ŝidyoho ŝa mina, u hlangula ku homboloka ka mina hikwako.” (Pisalema 51:9) A hi nge languteli leswaku Yehovha a tsakela xidyoho. Hikwalaho, u komberiwe ku tshika ku languta swidyoho swa Davhida. Hosi nakambe yi kombele Xikwembu leswaku xi susa swidyoho swa yona hinkwaswo, xi sula ku homboloka ka yona hinkwako. Mawaku loko Yehovha o endla tano! A swi ta pfuxa moya wa Davhida, swi susa ndzhwalo wa ripfalo leri kingindzaka, ivi swi endla hosi leyi se yi hundzukeke yi tiva leswaku yi rivaleriwile hi Xikwembu xa yona xa rirhandzu.
Ku Vuriwa Yini Loko Wena U Endle Xidyoho?
20. I yini lexi Mukreste wihi ni wihi la endleke xidyoho lexikulu a khutaziwaka ku xi endla?
20 Pisalema 51 yi kombisa leswaku mani na mani exikarhi ka malandza lama tinyiketeleke ya Yehovha loyi a endleke xidyoho lexikulu kambe a hundzukile, a nga n’wi kombela hi ku tiyiseka leswaku a n’wi kombisa tintswalo, kutani a n’wi basisa eka xidyoho xakwe. Loko u ri Mukreste loyi a dyoheke hi ndlela yo tano, ha yini u nga lavi ku rivaleriwa hi Tata wa hina wa le tilweni hi xikhongelo xa ku titsongahata? Kombisa leswaku wa wu lava mpfuno wa Xikwembu leswaku u ta tshama u amukelekile emahlweni ka xona, ni ku kombela leswaku xi kondletela ntsako lowu a wu ri na wona eku sunguleni. Vakreste lava hundzukeke va nga ya eka Yehovha hi ku tiyiseka hi xikhongelo, va endla swikombelo swo tano, hikuva ‘xi ta va rivalela ku nga ri hi mpimo.’ (Esaya 55:7; Pisalema 103:10-14) Kavula, vakulu va vandlha va fanele ku vitaniwa leswaku va ta nyikela mpfuno lowu lavekaka wa moya.—Yakobo 5:13-15.
21. I yini lexi hi nga ta xi kambisisa eka xihloko lexi landzelaka?
21 Musa wa Yehovha wu nyika vanhu va yena matimba. Kambe a hi kambisiseni swikombelo swin’wana swa Davhida la hundzukeke leswi humaka embilwini, leswi nga eka Pisalema 51. Dyondzo ya hina yi ta kombisa leswaku Yehovha a nga yi honisi mbilu leyi tshovekeke.
A Wu Ta Hlamurisa Ku Yini Ke?
◻ Xidyoho lexikulu xi nga va ni vuyelo byihi eka un’wana wa malandza ya Yehovha?
◻ Davhida u titwise ku yini loko a ringeta ku fihla xidyoho xakwe?
◻ Ha yini Davhida a vule leswaku u dyohele Xikwembu ntsena?
◻ Hambi leswi Xikwembu xi nga xiyaka swiyimo leswi katsekaka loko hi dyoha, i yini lexi hina hi nga fanelangiki ku xi endla?
◻ Mukreste u fanele ku endla yini loko a endle xidyoho lexikulu?