Yehovha A Nga Yi Soli Mbilu Leyi Tshovekeke
“Maganḍelo ya Šikwembu i moya lo’wu ṭhovekeke; oho Šikwembu! a ku soli mbilu le’yi ṭhov̌ekeke, le’yi nge nhlomulweni.”—PISALEMA 51:17.
1. Yehovha u va languta njhani vagandzeri va yena lava endleke xidyoho lexikulu kambe va kombisa ku hundzuka?
YEHOVHA a nga ‘tifunengeta hi papa leswaku xikhongelo xi nga fiki eka yena.’ (Swirilo 3:44) Kambe u lava leswaku vanhu vakwe va n’wi fikelela. Hambi loko un’wana wa vagandzeri va yena o tshuka a endla xidyoho lexikulu kambe a hundzuka, Tata wa hina wa le tilweni wa swi tsundzuka swilo leswinene leswi endliweke hi munhu yoloye. Hikwalaho, muapostola Pawulo u swi kotile ku byela Vakreste-kulobye a ku: “Xikwembu a xi na mona, xi nga ka xi nga rivali ntirho wa n’wina ni rirhandzu leri mi ri kombeke hi vito ra xona.”—Vaheveru 6:10.
2, 3. I yini lexi vakulu va Vakreste va faneleke ku xi xiya loko va vulavula ni vapfumeri-kulobye lava endleke xidyoho?
2 Vakulu va Vukreste na vona va fanele va xiya malembe ya ntirho wo tshembeka lowu endleriweke Xikwembu hi vapfumeri-kulobye. Leswi swi katsa ntirho wo hlawuleka wa vanhu lava hundzukeke endzhaku ko teka goza leri hoxeke kumbe ku endla xidyoho lexikulu. Varisi va Vakreste va lava leswaku vumoya bya hinkwavo lava nga swirho swa ntlhambi wa Xikwembu byi hlayiseka.—Vagalatiya 6:1, 2.
3 Mudyohi loyi a hundzukeke u lava musa wa Yehovha. Kambe ku laveka leswi engetelekeke. Leswi swi vekiwe erivaleni hi marito ya Davhida lama nga eka Pisalema 51:10-19.
Ku Laveka Mbilu Yo Tenga
4. Ha yini Davhida a khongelele mbilu leyi tengeke ni moya lowuntshwa?
4 Loko Mukreste la tinyiketeleke a ri exiyin’weni xo biha hi tlhelo ra moya hikwalaho ka xidyoho, i yini lexi a nga xi lavaka, handle ka musa ni ku rivaleriwa hi Yehovha? Davhida u komberile a ku: “Oho Šikwembu! v̌umba e nḍeni ka mina e mbilu le’yo tenga. U tlhela u pfuša e nḍeni ka mina e moya lo’wo tiya.” (Pisalema 51:10) Entiyisweni, Davhida u endle xikombelo lexi hikwalaho ka leswi a swi xiyeke leswaku a ka ha ri ni mboyamelo wo endla xidyoho lexikulu embilwini ya yena. Kumbexana hina a hi swi endlanga swidyoho swo fana ni leswi endliweke hi Davhida malunghana na Batixeba na Uriya, kambe hi lava mpfuno wa Yehovha leswaku hi papalata ku pfumela ku hluriwa hi ndzingo wo endla xidyoho xihi ni xihi lexikulu. Hikwalaho, hi nga lava mpfuno wa Xikwembu leswaku xi susa mimboyamelo ya vudyoho etimbilwini ta hina, tanihi makwanga ni rivengo—vugevenga lebyi fambisanaka ni vukhamba ni ku dlaya.—Vakolosa 3:5, 6; 1 Yohane 3:15.
5. (a) Ku va ni mbilu leyi tengeke swi vula yini? (b) Davhida a a navela yini loko a kombela moya lowuntshwa?
5 Yehovha u lava leswaku malandza yakwe ya va ni “mbilu le’yo tenga,” leswi vulaka ku va ni nsusumeto kumbe mboyamelo lowunene. Hi ku xiya leswaku a nga ku kombisanga ku tenga ko tano, Davhida u khongele eka Xikwembu leswaku xi basisa mbilu yakwe ni ku endla leswaku yi fambisana ni milawu ya Xikwembu. Mupisalema nakambe a a lava moya lowuntshwa, lowo lulama, kumbe mboyamelo lowunene wa mianakanyo. A a lava moya lowu a wu ta n’wi pfuna ku lwisana ni ndzingo, kutani a namarhela milawu ni misinya ya milawu ya Yehovha hi matimba.
Moya Lowo Kwetsima I Wa Nkoka
6. Ha yini Davhida a kombele Yehovha leswaku a nga n’wi tekeli moya wa yena lowo kwetsima?
6 Loko hi khomiwe hi gome hikwalaho ka swihoxo kumbe swidyoho swa hina, hi nga vona onge Xikwembu xi lava ku hi bakanyela etlhelo, kutani xi hi tekela moya wa xona lowo kwetsima kumbe matimba ya xona lama tirhaka. Davhida u titwe hi ndlela yoleyo, hikuva u kombele Yehovha a ku: “U nga nḍi tšukumeti kule ni mombo wa wena, u nga nḍi tekeli moya wa wena lo’wo kwetsima.” (Pisalema 51:11) Davhida la tivonaka nandzu ni la titsongahataka u vone onge swidyoho swa yena swi endle leswaku a nga ha fanelekeli ku tirhela Yehovha. Ku cukumetiwa ekule ni mombo wa Xikwembu a swi ta vula ku lahlekeriwa hi tintswalo, nchavelelo ni nkateko wa xona. Loko Davhida a ta kondleteriwa emoyeni, a a lava moya wa Yehovha lowo kwetsima. Loko moya lowu wu ri ehenhla ka hosi leyi, a yi ta lava vukongomisi bya Xikwembu hi xikhongelo leswaku yi tsakisa Yehovha, yi ta kota ku papalata xidyoho ni ku kota ku fuma hi vutlharhi. Hi ku xiya swidyoho leswi a swi endleleke Munyiki wa moya lowo kwetsima, Davhida hi laha ku faneleke u kombele leswaku Yehovha a nga n’wi tekeli wona.
7. Ha yini hi fanele ku khongelela moya lowo kwetsima ni ku vona leswaku hi nga wu khomisi tingana?
7 Ku vuriwa yini hi hina? Hi fanele ku khongelela moya lowo kwetsima naswona hi fanele ku tivonela leswaku hi nga wu khomisi tingana hi ku hluleka ku landzela vukongomisi bya wona. (Luka 11:13; Vaefesa 4:30) Loko swi nga ri tano, hi nga lahlekeriwa hi moya lowu, hi hluleka ku kombisa mihandzu ya wona leyi humaka eka Xikwembu ya rirhandzu, ntsako, ku rhula, ku lehisa mbilu, tintswalo, vunene, ripfumelo, musa ni ku tikhoma. Yehovha Xikwembu u ta hi tekela moya wa yena ngopfu-ngopfu loko hi tshamela ku n’wi dyohela handle ko hundzuka.
Ku Tsakela Ku Ponisiwa
8. Hi fanele hi endla yini loko hi dyohile kambe hi lava ku kuma ntsako wa ku ponisiwa?
8 Mudyohi la hundzukeke loyi a titwaka a hlakarhela emoyeni nakambe a nga tsakela lunghiselelo ra Yehovha ro kutsula. Hi ku navela leswi, Davhida u kombele Xikwembu a ku: “Nḍi tlherisele ku ṭaka ka ku hlayiseka ka wena, nḍi v̌a nḍi seketeriwa hi moya lo’wu lulameke!” (Pisalema 51:12) Ku tsakela ntshembo lowu tiyeke wa ku ponisiwa hi Yehovha Xikwembu a swi kufumeta mbilu swonghasi! (Pisalema 3:8) Endzhaku ko dyohela Xikwembu, Davhida u lave ku tlhela a kuma ntsako wa ku ponisiwa hi xona. Endzhaku, Yehovha u lunghiselele ndlela yo ponisa hi ku tirhisa gandzelo ra nkutsulo ra Yesu Kreste, N’wana wakwe. Loko hina tanihi malandza lama tinyiketeleke eka Xikwembu hi endla xidyoho lexikulu, kambe hi lava ku tlhela hi kuma ntsako wa ku ponisiwa, hi fanele hi va ni langutelo leri kombisaka ku hundzuka, leswaku hi papalata xidyoho ku fikela laha hi dyohelaka moya lowo kwetsima.—Matewu 12:31, 32; Vaheveru 6:4-6.
9. Davhida a a lava yini loko a kombela Xikwembu ku n’wi tiyisa “hi moya lo’wu lulameke”?
9 Davhida u kombele leswaku Yehovha a n’wi tiyisa “hi moya lo’wu lulameke.” Entiyisweni leswi a swi vuli ku tiyimisela ka Xikwembu ku pfuna, naswona a swi vuli moya wa xona lowo kwetsima, kambe swi vula ku lulamisa mboyamelo wa mianakanyo ya Davhida. Davhida a a lava leswaku Xikwembu xi n’wi tiyisa hi ku n’wi nyika moya wa ku tiyimisela ku endla leswi lulameke ni leswaku a nga tlheli a wela exidyohweni. Yehovha Xikwembu u hambeta a tiyisa malandza yakwe ni ku pfuxa lava va tshikileriweke hi miringo yo hambana-hambana. (Pisalema 145:14) Ku xiya mhaka leyi swa khutaza swinene, ngopfu-ngopfu loko hi endle xidyoho, kambe hi ri ni langutelo leri kombisaka ku hundzuka ni ku navela ku tirhela Yehovha hi ku tshembeka swinene!
Vadyohi Va Fanele Ku Dyondzisiwa Yini Ke?
10, 11. (a) Davhida a a ta va dyondzisa yini vadyohi va Vaisrayele? (b) Davhida a a ta dyondzisa vadyohi endzhaku ka loko yena a endle yini?
10 Loko Xikwembu xi n’wi pfumelela, Davhida a a lava ku endla nchumu wo karhi hi mbilu leyi baseke, lowu a wu ta kombisa ku tlangela ka yena musa wa Yehovha ni lowu a wu ta pfuna van’wana. Hi marito ya xikhongelo lexi kongomisiweke eka Yehovha, hosi leyi hundzukeke yi ye emahlweni yi ku: “Nḍi ta dyonḍisa v̌adyohi e tindlela ta wena, kutani v̌endlaŝiv̌i v̌a ta v̌uyela ka wena.” (Pisalema 51:13) Xana Davhida la dyoheke a a ta swi kotisa ku yini ku dyondzisa vanhu lava tlulaka Nawu wa Xikwembu? A a ta va byela yini ke? Naswona xana leswi a swi ta pfuna yini ke?
11 Loko a kombisa vadyohi va Vaisrayele tindlela ta Yehovha hi ntshembo wo endla leswaku va tshika tindlela ta vona leto homboloka, Davhida a a ta swi kota ku kombisa leswaku xidyoho xi bihe ku fikela kwihi, leswi ku hundzuka swi vulaka swona, ni ndlela yo kuma musa wa Xikwembu. Tanihi leswi a veke na gome hikwalaho ko lahlekeriwa hi tintswalo ta Yehovha ni ku va ni ripfalo ra ku tivona nandzu, Davhida handle ko kanakana a a ta va mudyondzisi la nga ni ntwela-vusiwana eka vadyohi lava hundzukeke, lava tshovekeke timbilu. Kavula, a a ta tirhisa xikombiso xa yena leswaku a dyondzisa van’wana endzhaku ka loko yena hi yexe a amukele milawu ya Yehovha, ni ku rivaleriwa hi Yena, hikuva lava va alaka ku endla swilaveko swa Xikwembu a va na yona mfanelo yo ‘hlamusela milawu ya Xikwembu.’—Pisalema 50:16, 17.
12. Davhida u pfuneke njhani hi ku tiva leswaku Xikwembu xi n’wi kutsurile enandzwini wa ngati?
12 Loko a phindha leswi a swi navelaka hi xivumbeko xin’wana, Davhida u te: “Oho Šikwembu, Šikwembu ša ku hlayiseka ka mina! Nḍi kuṭule ka ngati le’yi halatiweke, kutani ririmi ra mina ri ta twarisa ku lulama ka wena.” (Pisalema 51:14) Nandzu wa ngati a wu fambisana ni ku avanyiseriwa rifu. (Genesa 9:5, 6) Kutani ku tiva leswaku Xikwembu lexi n’wi ponisaka xi n’wi kutsurile enandzwini wa ngati malunghana na Uriya a swi ta rhurisa mbilu ni mianakanyo ya Davhida. Kutani ririmi ra yena a ri ta yimbelela hi ku tsaka malunghana ni ku lulama ka Xikwembu, hayi ka yena n’wini. (Eklesiasta 7:20; Varhoma 3:10) Davhida a a nga ta swi kota ku sula ku tikhoma ka yena loko biha hi yexe, kumbe ku pfuxa Uriya eku feni, tanihi leswi munhu wa namuntlha na yena a hlulekaka ku tlhela a basisa munhu loyi a n’wi kanganyiseke kumbe ku pfuxa munhu loyi a n’wi dlayeke. Xana a hi nga fanelanga hi anakanya hi sweswo loko hi ringiwa? Naswona hi fanele hi wu tlangela swonghasi musa wa Yehovha lowu hi kombisiwaka wona hi ku lulama! Entiyisweni, ku tlangela ku fanele ku hi susumetela ku kongomisa van’wana eka Xihlovo lexi xa vululami ni ku rivalela.
13. Mudyohi a nga faneleka ku pfula milomu ya yena a dzunisa Yehovha ehansi ka swiyimo swihi ntsena?
13 Ku hava mudyohi loyi a fanelaka ku pfula milomu ya yena leswaku a dzunisa Yehovha, handle ka loko Xikwembu xi yi pfula hi musa, leswaku a vulavula mintiyiso ya xona. Hikwalaho Davhida u yimbelerile a ku: “Hosi, pfula milomu ya mina, kutani nomu wa mina wu ta v̌ula šidumo ša wena.” (Pisalema 51:15) Loko ripfalo leri a a ri na rona ri hela hikwalaho ka leswi Xikwembu xi n’wi rivaleleke, Davhida a a ta susumeteleka ku dyondzisa vadyohi tindlela ta Yehovha, naswona a a ta N’wi dzunisa a ntshunxekile. Hikwavo lava rivaleriweke swidyoho swa vona ku fana na Davhida va fanele va tlangela tintswalo letikulu ta Yehovha eka vona, naswona va fanele ku tirhisa nkarhi wun’wana ni wun’wana leswaku va twarisa ntiyiso wa Xikwembu ni ku ‘xi dzunisa.’—Pisalema 43:3.
Magandzelo Lama Amukelekaka Eka Xikwembu
14. (a) I magandzelo wahi lawa a ma laveka hi ku ya hi ntwanano wa Nawu? (b) Ha yini swi hoxile ku anakanya leswaku hi nga pfala-pfala swidyoho leswi hi hambetaka hi swi endla hi ku endla swilo swo karhi leswinene?
14 Davhida u kume vutlharhi lebyikulu, lerova a kala a ku: “Hikuv̌a [wena Yehovha] a ku ṭakeli maganḍelo, ingi nḍi ku humesele wona; kambe a ku ṭakeri tiholokosta.” (Pisalema 51:16) Ntwanano wa Nawu a wu lava leswaku magandzelo ya swiharhi ma nyikeriwa eka Xikwembu. Kambe swidyoho swa Davhida swa vuoswi ni ku dlaya, leswi a swi faneriwa hi rifu, a swi nga ta suriwa hi magandzelo yo tano. Loko a swi ri tano, ingi a humese hinkwaswo leswi a nga na swona leswaku a nyikela magandzelo ya swiharhi eka Yehovha. Handle ka mbilu leyi hundzukeke, magandzelo a ma pfuni nchumu. Hikwalaho ingi swi hoxile ku anakanya leswaku hi nga pfala-pfala swidyoho leswi hi hambetaka hi swi endla, hi ku endla swilo swo karhi leswinene.
15. Hi rihi langutelo ra munhu loyi a tinyiketeleke la nga ni moya lowu tshovekeke?
15 Davhida u ye emahlweni a ku: “Maganḍelo ya Šikwembu i moya lo’wu ṭhov̌ekeke; oho Šikwembu! a ku soli mbilu le’yi ṭhov̌ekeke, le’yi nge nhlomulweni.” (Pisalema 51:17) Malunghana ni mudyohi la hundzukeke, “maganḍelo ya Šikwembu [lama amukelekaka] i moya lo’wu ṭhov̌ekeke.” Munhu wo tano a nga na mona. Mbilu ya munhu la tinyiketeleke la nga ni moya lowu tshovekeke ya vaviseka swinene hikwalaho ka xidyoho xa yena, wa titsongahata hikwalaho ko vona leswaku Xikwembu a xa ha n’wi amukeli, naswona u tiyimisele ku endla xin’wana ni xin’wana leswaku a tlhela a kuma tintswalo ta Xikwembu. Ku hava nchumu xa nkoka lexi hi nga xi endlelaka Xikwembu ku kondza loko hi hundzuka eswidyohweni swa hina kutani hi xi nyika timbilu ta hina hi ku tinyikela eka xona hi ku helela.—Nahume 1:2.
16. Xikwembu xi n’wi languta njhani munhu loyi a tshovekeke mbilu hikwalaho ka xidyoho xakwe?
16 Xikwembu a xi ri ali gandzelo ro tanihi mbilu leyi tshovekeke ni leyi nga enhlomulweni. Hikwalaho, ku nga khathariseki xiphiqo xihi ni xihi lexi hi langutanaka na xona tanihi vanhu va xona, hi nga tshuki hi lahlekeriwa hi ntshembo. Loko hi khunguvanyekile hi ndlela yin’wana leyi endlaka mbilu ya hina yi navela musa wa Xikwembu, hi nga tshuki hi lahlekeriwa hi ntshembo. Hambi loko hi lo endla xidyoho lexikulu kambe hi kombisa ku hundzuka, Yehovha a nge ti soli timbilu ta hina leti tshovekeke. U ta hi rivalela hi ku tirhisa gandzelo ra Kreste ra nkutsulo naswona u ta vuyisa tintswalo ta Yena eka hina. (Esaya 57:15; Vaheveru 4:16; 1 Yohane 2:1) Hambi swi ri tano, ku fana na Davhida, leswi hi faneleke ku khongelela swona i ku tlhela hi kuma tintswalo ta Xikwembu, hayi ku balekela ku tshinyiwa kumbe ku lulamisiwa loku lavekaka. Xikwembu xi rivalele Davhida, kambe xi tlhele xi n’wi basisa.—2 Samuwele 12:11-14.
Ku Tikarhatela Vugandzeri Lebyi Tengeke
17. Handle ko kombela ku rivaleriwa hi Xikwembu, vadyohi va fanele ku endla yini?
17 Loko hi endle xidyoho lexikulu, entiyisweni swi ta hi karhata swinene emianakanyweni ya hina, kutani mbilu leyi tisolaka yi ta hi susumetela ku kombela ku rivaleriwa hi Xikwembu. Hambi swi ri tano, a hi khongeleleni ni van’wana. Hambi leswi Davhida a a langutele ku gandzela Xikwembu nakambe hi ndlela leyi amukelekaka, eka pisalema ya yena a nga honisanga vanhu van’wana hikwalaho ka vutianakanyi. Yi katsa xikombelo lexi landzelaka eka Yehovha: “Katekisa Sion hi nsov̌o wa wena, akisa rirhangu ra Yerusalem!”—Pisalema 51:18.
18. Ha yini Davhida la hundzukeke a khongelele Siyoni?
18 Ina, Davhida a a langutele ku tlhela a kuma tintswalo ta Xikwembu. Hambi swi ri tano, mupisalema loyi a titsongahataka u tlhele a khongelela leswaku ‘Xikwembu xi katekisa Siyoni hi nsovo wa xona,’ lowu ku nga Yerusalema, ntsindza wa Israyele, laha Davhida a a langutele ku aka tempele ya Xikwembu kona. Swidyoho swa Davhida leswikulu swi nghenise tiko hinkwaro ekhombyeni, hikuva vanhu hinkwavo a va ta xaniseka hikwalaho ka ku dyoha ka hosi. (Ringanisa 2 Samuwele, ndzima 24.) Kahle-kahle, swidyoho swa yena a swi tsekatsekise ‘marhangu ya Yerusalema,’ lerova se a ma fanele ku pfuxiwa.
19. Loko hi dyohile kambe hi rivaleriwile, i yini lexi swi faneleka, leswaku hi xi khongelela?
19 Loko hi endle xidyoho lexikulu kambe Xikwembu xi hi rivalela, swi fanerile ku khongelela leswaku xi lulamisa xin’wana ni xin’wana lexi onhiweke hi xidyoho xa hina hi ndlela yo karhi. Hi nga ha va hi yise ndzhukano evitweni ra xona lero kwetsima, hi nga ha va hi onhe vito ra vandlha, naswona hi nga ha va hi vangele ndyangu wa ka hina gome. Tata wa hina wa le tilweni la nga ni rirhandzu a nga susa ndzhukano wihi ni wihi lowu tisiweke ehenhla ka vito rakwe, a nga aka vandlha hi ku tirhisa moya wa yena lowo kwetsima, naswona a nga chavelela timbilu ta varhandziwa va hina lava n’wi rhandzaka ni ku n’wi tirhela. Kavula, hambi xidyoho xa katseka kumbe e-e, lexi hi faneleke ku tikarhatela xona minkarhi hinkwayo i ku kwetsimisiwa ka vito ra Yehovha ni vuhlayiseki bya vanhu va yena.—Matewu 6:9.
20. Yehovha a a ta tsakisiwa hi magandzelo ni leswi nyikeriwaka hi Vaisrayele ehansi ka swiyimo swihi?
20 Loko Yehovha a pfuxa marhangu ya Siyoni, i yini xin’wana lexi a xi ta humelela? Davhida u yimbelerile a ku: “Hi kona [wena Yehovha] u nga ta ṭakela maganḍelo ya ku lulama, ni tiholokosta, ni timhamba le’ti u humeseriwaka ŝiro hikwaŝo ŝa tona; hi kona v̌a nga ta humesa tinkunzi altarini ya wena.” (Pisalema 51:19) Davhida a a swi navela hi mbilu hinkwayo leswaku yena ni tiko va kuma tintswalo ta Yehovha leswaku va ta kota ku N’wi gandzela hi ndlela leyinene. Kutani Xikwembu a xi ta tsakela tiholokosta ta vona ni timhamba leti ku nyikeriwaka swirho hinkwaswo swa tona. Sweswo a swi ta va tano hikuva lawa a ku ta va magandzelo ya ku lulama lama nyikeriweke hi vanhu lava tinyiketeleke, lava tshembekaka ni lava hundzukeke ni lava nga ni tintswalo ta Xikwembu. Hi ku tlangela musa wa Yehovha, a va ta nyikela tinkuzi ealtarini ya yena—ku nga magandzelo lamanene ni ya nxavo wa le henhla. Namuntlha, hi dzunisa Yehovha hi ku n’wi nyika leswinene ngopfu eka leswi hi nga na swona. Naswona magandzelo ya hina ma katsa “maganḍelo ya tinḍimi ta hina,” ku nga magandzelo yo dzunisa Yehovha, Xikwembu xa hina xa musa.—Hosiya 14:2; Vaheveru 13:15.
Yehovha U Twa Swirilo Swa Hina
21, 22. Pisalema 51 yi ni tidyondzo tihi leti pfunaka hina?
21 Xikhongelo xa Davhida lexi humaka embilwini lexi tsariweke eka Pisalema 51 xi hi kombisa leswaku loko hi dyohile hi fanele hi hundzuka hi mbilu hinkwayo. Pisalema leyi nakambe yi ni tidyondzo leti kongomeke leti pfunaka hina. Hi xikombiso, loko hi dyoha kambe hi hundzuka, hi nga titshega hi musa wa Xikwembu. Hambi swi ri tano, hi fanele hi karhateka ngopfu hi ndzhukano wihi na wihi lowu hi nga ha vaka hi wu yise evitweni ra Yehovha. (Tindzimana 1-4) Tanihi Davhida, hi nga kombela musa wa Tata wa hina wa le tilweni hikwalaho ka xidyoho lexi hi tswariweke na xona. (Ndzimana 5) Hi fanele ku vulavula ntiyiso, naswona hi fanele hi lava vutlharhi lebyi humaka eka Xikwembu. (Ndzimana 6) Loko hi dyohile, hi fanele ku kombela Yehovha leswaku a hi basisa, hi va ni mbilu leyinene ni moya lowu tiyeke.—Tindzimana 7-10.
22 Pisalema 51 nakambe yi hi pfuna ku vona leswaku a hi fanelanga hi va ni mapfalo lama feke, lerova hi endla xidyoho hi vomu. Loko hi endla tano, Yehovha u ta hi tekela moya wa yena lowo kwetsima, kumbe matimba lama tirhaka. Kambe loko moya wa Xikwembu wu ri ehenhla ka hina, hi nga dyondzisa van’wana tindlela ta xona hi laha ku humelelaka. (Tindzimana 11-13) Loko hi endla xidyoho kambe hi hundzuka, Yehovha u ta hi pfumelela ku hambeta hi n’wi dzunisa hikuva a nga yi soli mbilu leyi tshovekeke kumbe leyi nga enhlomulweni. (Tindzimana 14-17) Pisalema leyi nakambe yi kombisa leswaku a hi fanelanga hi khongelela hina ntsena. Ku ri na sweswo, hi fanele hi khongelela hinkwavo lava katsekaka eka vugandzeri lebyi tengeke bya Yehovha leswaku va katekisiwa ni ku hlayiseka emoyeni.—Tindzimana 18, 19.
23. Ha yini Pisalema 51 yi fanele ku hi susumetela ku va ni xivindzi ni ntshembo?
23 Pisalema leyi ya Davhida leyi fikelelaka mbilu yi fanele ku hi susumetela ku va ni xivindzi ni ntshembo. Yi hi pfuna ku xiya leswaku hambi ho wela exidyohweni a hi fanelanga hi heleriwa hi ntshembo. Ha yini ke? Hikuva loko hi hundzuka, musa wa Yehovha wu nga hi nyika matimba. Loko hi tisola naswona hi tinyiketela eka Tata wa hina wa le tilweni hi ku helela, wa swi twa swirilo swo kombela musa. Naswona swa khutaza swonghasi ku tiva leswaku Yehovha a nga yi soli mbilu leyi tshovekeke!
A Wu Ta Hlamurisa Ku Yini Ke?
◻ Ha yini Vakreste va lava mbilu leyi tengeke ni moya lowo kwetsima wa Xikwembu?
◻ Munhu la hundzukeke a nga va dyondzisa yini vanhu lava tlulaka nawu wa Yehovha?
◻ Yehovha u yi languta njhani mbilu leyi tshovekeke ni leyi nga enhlomulweni?
◻ Hi tihi tidyondzo leti kumekaka eka Pisalema 51?
[Xifaniso lexi nga eka tluka 15]
Xana wa wu khongelela moya lowo kwetsima ni ku vona leswaku u nga wu khomisi tingana?
[Xifaniso lexi nga eka tluka 17]
Kombisa ku tlangela tintswalo letikulu ta Yehovha hi ku twarisa ntiyiso wa yena