Xiendlakalo Lexi Nga Rivalekiki Efurwa
“A HI WU LAVI MUTI WA YEHOVHA!” ku vula maphepha lama nameketiweke edorobeni hinkwaro. “Hinkwerhu A Hi Lwisaneni Ni Ntirho Wo Aka Wa Yehovha” ku vula ntlawa wun’wana lowu kanetaka. Madzana ya swihloko eka maphepha-hungu ma endle leswaku vanhu va yi xiya mhaka leyi. Ku sayiniwe swikombelo, naswona nhlayo leyi hlamarisaka ya swiphephana swo tlula hafu ya miliyoni leswi vulavulaka hi ntirho lowu wo aka a swi tele emabokisini ya poso ya kwalaho. Xana a ku ri ntirho wo aka yini lowu a wu kavanyeta ku rhula ka doroba ra Louviers, en’walungu-vupela-dyambu bya Furwa? A ku ri ku akiwa loku ringanyetiweke ka hofisi ya rhavi leyintshwa ni vutshamo bya Timbhoni ta Yehovha.
Yehovha Wa Kurisa
Ntirho wa Timbhoni ta Yehovha eFurwa wu sungule eku heleni ka lembe-xidzana ra vu-19. Vuhlayiselo byo sungula bya tibuku ta Bibele byi pfuriwe hi 1905 eBeauvène, edzongeni wa Furwa, naswona hi 1919, a ku tirhisiwa hofisi leyitsongo eParis. Hofisi ya rhavi yi pfuriwe ximfumo emutini hi 1930, naswona hi lembe leri tlhandlameke vatirhi va le hofisini va sungule ku tshama ekaya ra Bethele leri nga eEnghien-les-Bains, en’walungwini wa Paris. Endzhaku ka Nyimpi ya Vumbirhi ya Misava, ndyangu wa Bethele wu tlhelele eParis, ivi hi 1959 rhavi ri rhurhiseriwa emuakweni wa swithezi swa ntlhanu eBoulogne-Billancourt, ehandle ka ntsindza hi tlhelo ra le vupela-dyambu.
Hikwalaho ka ku andza ka ntirho wo chumayela Mfumo, hi 1973 switirho swa ku gandlisa ni swa ku rhumela swi rhurhiseriwe eLouviers, tikhilomitara ta 100 evupela-dyambu bya Paris, kasi vatirhi va le hofisini a va ha sele eBoulogne-Billancourt. Hambiswiritano, ku andza ka nhlayo ya vahuweleri eFurwa ku endle leswaku switirho leswi nga eLouviers swi nga eneli, hambileswi ku engeteriweke miako hi 1978 na hi 1985. Kutani ku anakanyiwe leswaku ku engeteriwa ni leswaku ndyangu hinkwawo wa Bethele wu va endhawini yin’we. Muako lowu a wu nga tsakeriwi hi vanhu hinkwavo, hilaha swi boxiweke hakona eku sunguleni. Ku nga khathariseki nkaneto wo tano, ndhawu yo aka eka yona yi kumiwile eka khilomitara yin’we na hafu ku suka evugandliselweni. Ku landzele malembe ya 6 ya ntirho lowukulu, naswona eku heteleleni, endzhaku ka ku hambana malembe ya 23, ndyangu wa Bethele hinkwawo wu hlanganisiwile eLouviers hi August 1996.
Kutani a ku ri ntsako lowukulu leswaku ntshungu lowu tsakeke wa 1187, ku katsa ni swirho swa ndyangu wa Bethele swa le Furwa swa 300, na 329 wa vapfhumba lava humaka emarhavini man’wana ya 42, va hlengeletanile hi Mugqivela, November 15, 1997, va ta yingisa nkulumo ya ku nyiketela leyi a yi nyikeriwa hi Makwerhu Lloyd Barry, xirho xa Huvo leyi Fumaka. Hambiswiritano, leswi rhavi ri nyiketeriweke ku ri ni rivengo ni tsima leri phikelelaka ra ku lumbetiwa ka Timbhoni ta Yehovha hi swihaxi swa mahungu eFurwa hinkwayo, ku ehleketiwe leswaku Timbhoni hinkwato ta le Furwa ti fanele ti kota ku hlanganyela eku tlangeleni loku ka ku hlula. Hikwalaho ka sweswo, hi Sonto, November 16, ku hleriwe nhlangano wo hlawuleka lowu nga ni xihloko lexi nge, “Tshamani eRirhandzwini ra Kreste” eVillepinte Exhibition Center, en’walungwini wa Paris. Timbhoni ta Yehovha hinkwato ta le Furwa swin’we ni Timbhoni leti vulavulaka Xifurwa ta le Belgium na Switzerland a ti rhambiwile, swin’we ni mavandlha ya le Britain, Jarimani, Luxembourg na Netherlands.
Nhlengeletano Leyi Nga Rivalekiki
Malunghiselelo ya nhlengeletano leyi ma sungule ka ha sele tin’hweti ta tsevu. Kutani, mavhiki mambirhi ntsena emahlweni ka ku nyiketeriwa loku, vachayeri va tilori va le Furwa va terekile, va pfala mapatu lamakulu ni tindhawu to chela eka tona mafurha. Xana switulu ni switirho swin’wana a swi ta fika hi nkarhi? Xana ku pfariwa ka mapatu a ku ta sivela vamakwerhu leswaku va ta? Nkateko wa kona, ku nga si hela vhiki xitereka a xi herile, naswona swifambo a swi pfuleriwe mapatu nakambe. Hi Ravuntlhanu ni madyambu emahlweni ka mahelo-vhiki yo nyiketela rhavi, tilori ta 38 ti tise 84 000 wa switulu eka tiholo timbirhi letikulu leti a ti hirhiwile hikwalaho ka xiendlakalo lexi. Vamakwerhu va xinuna ni va xisati vo tlula 800 va tirhe vusiku hinkwabyo ku fikela ku va hafu ku bile awara ya kaye hi Mugqivela ni mixo leswaku va veketela switulu, platifomo, switirho swa mpfumawulo na tithelevhixini ta kaye letikulu to kombisa vhidiyo.
Hi 6:00 hi Sonto nimixo, tinyangwa a ti pfulekile, kutani mintshungu yi sungule ku nghenetela. Switimela swo hlawuleka swa 17 leswi hirhiweke swi tise Timbhoni to tlula 13 000 entsindza. Vamakwerhu va xinuna ni va xisati lava tlulaka madzana mambirhi a va ri eswitichini swa xitimela leswaku va ta amukela vaendzi ni ku famba na vona hi mintlawa leswaku va ya endhawini ya ntsombano. Makwerhu un’wana wa xisati u vule leswaku lunghiselelo leri ra rirhandzu ri va endle va “titwa va sirhelelekile ni ku hlayiseka.”
Van’wana va te eParis hi swihaha-mpfhuka kumbe hi mimovha. Hambiswiritano, vunyingi byi te hi mabazi ya 953, kasi Timbhoni ta le Paris ti tirhise swo famba swa mani na mani leswaku ti ya le Exhibition Center. Vo tala va fambe vusiku hinkwabyo kumbe va suke emakaya hi matakuxa, kambe nyanyuko wa vona wo va kona eka nhlangano lowu a wu ri lowu xiyekaka. Ku pfuxelana hi mbilu hinkwayo ni ku vukarhana hi rirhandzu ku funghe ku hlanganisiwa ka vanghana lava va nga vonanangiki hi malembe yo tala. Swiambalo swa mivala swa tiko ro karhi swi endle leswaku ntshungu lowu tsakeke wu titwa wu hlangane ni vanhu va matiko hinkwawo. Handle ko kanakana, nchumu wun’wana lowu nga tolovelekangiki a wu ri endleleni.
Loko nongonoko wu sungula hi 10:00 nimixo, switulu hinkwaswo a swi tele, kambe eka minete yin’wana ni yin’wana a ku fika madzana ya vanhu. Kun’wana ni kun’wana laha munhu a languta kona, a hlangana ni swikandza swo tala leswi n’wayitelaka. Magidi ya van’wana va yime hi milenge kumbe va tshama ehansi. Hi ku kombisa moya wa nhloko-mhaka ya nhlengeletano, vantshwa vo tala va yime hi ku swi rhandza leswaku vanhu lava dyuhaleke va ta tshama. Mpatswa wun’wana wu tsarile wu ku: “Mawaku ndlela leyi a hi tsake ha yona ku sukela switulu swa hina hi nyika vamakwerhu lava a hi nga va tivi, kambe lava hi va rhandzaka swinene!” Vo tala va kombise langutelo lerinene ra ku tinyiketa: “Eka nongonoko hinkwawo a hi yime ekusuhi ni switulu leswi hi pfuneteke ku swi veketela hi vusiku bya Ravuntlhanu. Kambe ku va kona ntsena, ku hi vangele ku tala hi ku nkhensa eka Yehovha.”
Ku nga khathariseki matshimbi kumbe ku nonon’hweriwa, vapfhumba va rhiye ndleve va yingisela swiviko leswi humaka ematikweni man’wana ni tinkulumo ta Lloyd Barry na Daniel Sydlik, loyi na yena a nga xirho xa Huvo leyi Fumaka. Makwerhu Barry u vulavule hi nhloko-mhaka leyi nge, “Yehovha U Andzisa Matimba Lama Teleke,” naswona u yi kombise kahle ndlela leyi Yehovha a katekiseke vanhu va yena ha yona hi ku andza ku nga khathariseki miringo yo hambana-hambana. Nkulumo ya Makwerhu Sydlik a yi ku “Va Tsaka Vanhu Lava Xikwembu Xa Vona Ku Nga Yehovha!” Tinkulumo hatimbirhi a ti ri enkarhini ngopfu-ngopfu hikwalaho ka nkaneto lowu Timbhoni ta Yehovha ti langutaneke na wona eFurwa. Makwerhu Sydlik u kombise leswaku ntsako wa ntiyiso a wu titsheganga hi swilo swa le handle kambe wu titshege hi vuxaka bya hina na Yehovha ni langutelo ra hina hi vutomi. Xivutiso lexi a xi vutiseke vayingiseri xa leswaku, “Xana mi tsakile?” xi hlamuriwe hi ku phokotela lokukulu ka mavoko.
Makwerhu un’wana wa xisati loyi a “lahlekeriwe hi ntsako wa yena” endzhakunyana u tsarile a ku: “Hi xitshuketa ndzi swi xiyile leswaku a swi koteka ku kuma ntsako. A ndzi tikarhatela swilo leswi hoxeke, kutani eka nkulumo leyi, Yehovha u ndzi kombe ndlela leyi a ndzi fanele ndzi cinca ha yona.” Makwerhu un’wana wa xinuna u te: “Sweswi ndzi lava ku lwela ku tsakisa mbilu ya Yehovha. A ndzi lavi ku pfumelela nchumu xi susa ntsako lowu ndzi sunguleke ku va na wona embilwini.”
Loko nhlangano wu ya eku heleni, mutshama-xitulu u tivise hi ku hiseka lokukulu nhlayo ya lava a va ri kona: 95 888—nhlengeletano leyikulu ku tlula hinkwato ya Timbhoni ta Yehovha eFurwa!
Endzhaku ka risimu ro pfala, leri vo tala va ri yimbeleleke hi mihloti ya ntsako, na xikhongelo xo pfala, vamakwerhu va teke riendzo ro tlhelela emakaya va ri ni mintlhaveko ya ntsako. Moya wa rirhandzu ni wa xinghana wa nhlengeletano leyi wu xiyiwile. Tinhlamuselo to tala letinene hi langutelo ra vapfhumba ti vuriwe hi vachayeri va mabazi. Va tlhele va tsakisiwa hi nhleleko lowu endleke leswaku mabazi hinkwawo ya 953 ma suka le Exhibition Center ku nga si hela tiawara timbirhi handle ka ntlimbano wa swifambo! Ku tikhoma ka vapfhumba ku tlhele ku tlangeriwa swinene hi vatirhi va ka rhalaweyi ni va swifambo swa mani na mani. Mabulo yo tala lamanene ma landzerile, naswona ku nyikeriwe vumbhoni lebyinene.
“Xihlovo-mananga eKwandzasini”
Muapostola Pawulo u khutaze Vakreste-kulobye a ku: “A hi khathalelaneni leswaku hi khutazana erirhandzwini ni le mintirhweni leyinene, . . . naswona hi endla tano hilaha ku engetelekeke ngopfu tanihi leswi mi vonaka siku ri tshinela.” (Vaheveru 10:24, 25) Entiyisweni, nhlangano lowu wo hlawuleka a wu ri xihlovo xa xikhutazo lexikulu eka hinkwavo, “xihlovo-mananga ekwandzasini” hilaha makwerhu un’wana wa xisati a vuleke hakona. Vamakwerhu va le rhavini ra le Togo va tsarile va ku: “Hi tlhelele endzhaku hi nyikiwe matimba, hi khutazekile, hi tiyisiwile naswona hi tiyimisele swinene ku tsaka entirhweni wa Yehovha ku tlula rini na rini.” Mulanguteri un’wana wa xifundzha u te: “Lava a va tshikilelekile va tlhelele emakaya va tsakile.” Mulanguteri un’wana wa xifundzha u te: “Vamakwerhu a va khutaziwile ni ku tiyisiwa.” Mpatswa wun’wana wu susumeteleke ku tsala wu ku: “A hi si tshama hi titwa hi tshinele eka Yehovha ku fana ni sweswi.”
Mupisalema u te: “Nenge wa mina wu tiyile ndleleni le’yi lulameke; nḍi ta ḍunisa Yehova e tinhlengeletanweni.” (Pisalema 26:12) Tinhlengeletano to tano ta Vukreste ti pfuna hinkwerhu ku tlhela hi kuma matimba hi tlhelo ra moya hambi ku ri ni swihinga. Makwerhu un’wana wa xisati u tiyisekisile a ku: “Ku nga khathariseki mahlomulo, swiendlakalo leswi swo hlawuleka swa dzika swinene etimbilwini ta hina naswona hi ta tshama hi ri karhi hi swi tsundzuka leswaku swi hi chavelela.” Hilaha ku fanaka, mulanguteri la famba-fambaka u tsarile a ku: “Loko ku va ni minkarhi leyi nonon’hwaka, ku tsundzuka natswo lowu wa Paradeyisi ku ta hi pfuna ku langutana na yona.”
“Ṅwina, tinšaka ta matiko, nyikani ka Yehova, nyikani ka Yehova e ku kwetsima ni matimba,” ku khongotela Pisalema 96:7. Handle ko kanakana, ku nyiketeriwa ka muako lowuntshwa wa rhavi eFurwa i ku hlula lokukulu ka Yehovha. Hi yena a endleke leswaku ku hetisisiwa ntirho wo aka hambileswi a ku ri ni nkaneto lowukulu hinkwako-nkwako. Timbhoni ta Yehovha eFurwa ti tiyimisele swinene ku tlula rini na rini ku ‘tshama erirhandzwini ra Kreste’ ni ku ‘endla ku voninga ka vona ku vonakala.’ (Yohane 15:9; Matewu 5:16) Hinkwavo lava veke kona eka nongonoko wa ku nyiketela handle ko kanakana va titwa hi ndlela leyi mupisalema a titweke ha yona loko a ku: “Leŝo ŝi endliwe i Yehova; i singita e mahlweni ka hina.”—Pisalema 118:23.
[Xifaniso lexi nga eka tluka 26]
Lloyd Barry
[Xifaniso lexi nga eka tluka 26]
Daniel Sydlik
[Xifaniso lexi nga eka tluka 26]
Vanhu va 95 888 va ve kona eka nongonoko wo hlawuleka eVillepinte Exhibition Center
[Swifaniso leswi nga eka tluka 28]
Magidi ya lava veke kona a ma yime hi milenge kumbe ma tshame ehansi ma yingisela