Xana Mariya U Fe Rifu Ra Ntumbuluko?

HI KU ya hi L’Osservatore Romano, phepha-hungu ra le Vatican, dyondzo ya Khatoliki ya Ntlhandluko wa Mariya yi ri: “Nhwana la Hetisekeke, la nga ri na xona xidyoho xo sungula, u tekeriwe eku kwetsimeni ka le tilweni hi miri ni moya-xiviri, loko vutomi bya yena bya laha misaveni byi herile.” Phepha-hungu leri ri vula leswaku, dyondzo leyi yi endle leswaku vafundhisi van’wana va Khatoliki va vula leswaku Mariya “a nga fanga naswona u susiwe evuton’wini bya laha misaveni a yisiwa eku kwetsimeni ka le tilweni hi ku hatlisa.”a

Sweswinyana, Mupapa John Paul wa Vumbirhi u veke mhaka leyi hi ndlela leyi hambaneke. Eka Nhlangano wa Mani na Mani le Vatican hi June 25, 1997, u te: “Testamente leyintshwa a yi vuli nchumu hi swiyimo swa ku fa ka Mariya. Leswi swi endla leswaku munhu a ehleketa leswaku swi lo humelela hi ndlela ya ntumbuluko, ku nga ri na vuxokoxoko byo hlawuleka lebyi a byi fanele byi boxiwa. . . . Mavonelo ya leswaku rifu rakwe a ri vangiwanga hi swilo swa ntumbuluko ma vonaka ma nga ri na xisekelo.”

Marito ya Mupapa John Paul ma paluxa ku tsana lokukulu eka dyondzo ya Ku Tika Loku Hetisekeke. Loko mana wa Yesu a nga vanga “na xona xidyoho xo sungula,” xana Mariya a ta dlayiwa njhani hi “swilo swa ntumbuluko,” leswi vangiwaka hi xidyoho lexi kumiweke eka Adamu la dyoheke? (Varhoma 5:12) Xiphiqo lexi xa ntivo-vukwembu xi vangiwa hi langutelo leri soholotiweke leri Kereke ya Khatoliki yi nga na rona hi mana wa Yesu. A swi hlamarisi leswi ku veke ni ku avana ni ku pfilunganyeka eKerekeni ya Khatoliki emhakeni leyi.

Hambileswi Bibele yi kombisaka Mariya tanihi loyi a titsongahataka, la tshembekaka ni la tinyiketeleke, a yi yisi timfanelo leti eka “ku tika loku hetisekeke.” (Luka 1:38; Mintirho 1:13, 14) Bibele yi vula hi ku olova yi ku: “Hinkwavo va dyohile, naswona va kayivela ku vangama ka Xikwembu.” (Varhoma 3:23) Ina, Mariya u tswariwe ni xidyoho naswona a nga hetisekanga ku fana ni vanhu hinkwavo, naswona a ku na vumbhoni bya leswaku a nga dlayiwanga hi swilo swa ntumbuluko.—Ringanisa 1 Yohane 1:8-10.

[Nhlamuselo ya le hansi]