I Mani A Nga Ni Nandzu?

Vanhu vo tala va vona Xikwembu nandzu hikwalaho ka swiphiqo swa vona. Xivuriso xa Bibele xi ri: “Vuhomboloki bya munhu byi onha vutomi bya yena, ivi a va ni xikhomela eHosini.” (Swivuriso 19:3, The New English Bible) Kambe ku vona Xikwembu nandzu hikwalaho ka makhombo ya vanhu swi fana ni ku vona muendli wa movha nandzu hikwalaho ka ku andza ka makhombo lama vangiwaka hi vachayeri lava pyopyiweke.

Xikwembu xi nyike vanhu nkongomiso wa nkoka eRitweni ra xona, Bibele. Hi ku hlaya buku leyi ya Xikwembu na hi ku hanya hi milawu ni misinya ya milawu leyi yi yi vekaka, hi nga papalata mintlhamu yo tala ya vutomi. Ku hambana ni sweswo, ku endla swilo hi ku lwisana ni nkongomiso wa Xikwembu swi ni khombo. Hi xikombiso, lava va dyaka ku tlula mpimo, lava dzahaka, lava nwaka ku tlula mpimo, kumbe lava nga ni mahanyelo yo biha hakanyingi va kuma vuyelo lebyi nga tsakisiki bya rihanyo. (Luka 21:34; 1 Vakorinto 6:18; 2 Vakorinto 7:1) Muapostola wa Mukreste Pawulo u tsarile a ku: “Xin’wana ni xin’wana lexi munhu a xi byalaka, u ta tlhela a tshovela xona; hikuva loyi a byalelaka nyama ya yena u ta tshovela ku onhaka enyameni yakwe, kambe loyi a byalelaka moya u ta tshovela vutomi lebyi nga heriki emoyeni.”—Vagalatiya 6:7, 8.

Wa nga vona ndlela leyi swi antswaka ha yona ku hanya hi milawu ya Xikwembu ni misinya ya milawu ya xona! Loko hi endla tano, hi ta vona ku hetiseka ka xitshembiso xa Xikwembu lexi vuriweke hi muprofeta Esaya: “Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona. Mawako! loko ngi u yingisa milawu ya mina! Ku rula ka wena ku ta v̌a tani hi nambu, ku lulama ka wena ku ta fana ni magandlati ya lwandle.”—Esaya 48:17, 18.