Ntirho Lowu “Tisaka Xichavo Hakunene”

MUAPOSTOLA PETRO u tsundzuxe Vakreste-kulobye a ku: “Hlayisani ku tikhoma ka n’wina ku ri kunene exikarhi ka matiko, leswaku, eka leswi va mi lumbetaka ha swona onge hi loko mi ri vaendli va leswo biha, va dzunisa Xikwembu . . . hikwalaho ka mintirho leyinene ya n’wina leyi va nga timbhoni leti yi voneke hi mahlo.” (1 Petro 2:12) Timbhoni ta Yehovha le Italy ti kombise ku tikhoma ko tano lokunene erivaleni ku ringana malembe yo tala. Ku pfumelelana ni xileriso xa Yesu xo ‘chumayela va ri ehenhla ka tindlu,’ ti endla ntirho wa tona hinkwawo wa Vukreste erivaleni, ti voniwa hi vanhu hinkwavo. (Matewu 10:27; Yohane 18:20) Hikwalaho, loko gqweta ni muprista wa le Italy va humese swihehlo swa leswaku Timbhoni ta Yehovha i “mpambukwa wa vuxisi wa vukhongeri” naswona va ti katsa ni “mavandla ya le xihundleni lama phasaka vanhu,” Timbhoni ti bohe ku teka goza ra le nawini hikwalaho ka swihehlo leswi.

Eka ku tenga ko sungula, huvo yi gimete hi leswaku gqweta ni muprista a va tlulanga nawu. Hambiswiritano, hi July 17, 1997, Huvo ya Swikombelo ya le Venice yi kanete xiboho xa huvo yo sungula, yi vona vahehliwa havambirhi nandzu. Huvo ya Swikombelo yi te: “Swihloko haswimbirhi leswi kandziyisiweke leswi vangeke mhaka leyi swi ni swiga ni swivulwa leswi swi nga onhaka ndhuma ya valandzeri va vukhongeri bya ‘Timbhoni ta Yehovha.’ Swi le rivaleni leswaku xikongomelo xa swihloko leswi i ku endla leswaku valandzeri va byona va soriwa hi vanhu.” Huvo yi vule leswaku swihloko leswi “a swi fambisani ni mfanelo leyi nga enawini yo vika ni ku xopaxopa.” Huvo yi rihise vahehli lavambirhi yi tlhela yi va lerisa ku hakela tihakelo hinkwato ta huvo, ku katsa ni mali hinkwayo leyi Timbhoni ti yi tirhiseke eka milandzu leyi yimbirhi.

Eka vuavanyisi bya yona lebyi tsariweke, Huvo ya Swikombelo ya le Venice yi te: “Hi ku tirhisa ni ku sirhelela timfanelo hinkwato leti tiyisekisiwaka hi Vumbiwa bya le [Italy] ntsena, swa koteka ku sivela xihlawuhlawu ni ku hisekela vukhongeri etlhelo.” Xiboho xi bumabumela leswaku ntirho wa Timbhoni ta Yehovha a hi wa xihundla naswona a hi wa vukanganyisi. Huvo yi te: “Ku hlanganisa Timbhoni ni mavandla ya le xihundleni a swi fambisani ni nawu wa ntiyiso wa matimu, tanihi leswi vukhongeri lebyi byi nga kona emadorobeni yo tala nileswi ntirho lowu hangalakeke wa ku hundzula vanhu lowu endliwaka hi swirho swa byona, ngopfu-ngopfu hi Tisonto na hi tiholideyi tin’wana, wu tiviwaka swinene naswona wu xiximiwaka hi vanhu hikwalaho ka matshalatshala lama endliwaka, ku nga khathariseki leswi munhu a nga ha swi ehleketaka hi dyondzo leyi chumayeriwaka.” Xisweswo, rhekhodo ya ku chumayela hi ku hiseka ni ku tikhoma ka Timbhoni ta Yehovha loku nga xikombiso eItaly yi pfune ku herisa ku vengiwa ka tona.—Matewu 5:14-16; 1 Petro 2:15.