‘Mathonsi Ya Mberha Ma Endliwe Hi Mani Xana?’

MUTSARI wa phepha-hungu wa lembe-xidzana ra vu-19 u hlamusele mathonsi ya mberha tanihi “tindzalama leti nga mati ta misava, leti vumbiwaka hi moya.” Muvumbi wa hina u vutise mupatriyarka wa khale Yobo a ku: “Manṭhonsi ya mbera ma v̌elekiwile hi mani šana?” (Yobo 38:28) Xikwembu a xi tsundzuxa Yobo hi mberha ya risima leyi endliweke hi Xikwembu.

Handle ka ku saseka ka yona loku vangamaka, loku fanaka ni tindzalama, eBibeleni mberha yi hlanganisiwa ni nkateko, ku nona, ndzalo ni ku hlayisiwa ka vutomi. (Genesa 27:28; Deteronoma 33:13, 28; Zakariya 8:12) Hi nguva ya ku hisa, ni ku pfumala mpfula le Israyele, “mbera ya Hermon” yi hlayise swimilana swa tiko rolero, swin’we ni vanhu va rona. Tinhlohlorhi leti nga ni gamboko ni leti nga ni swihlahla ta ntshava ya Hermoni ta ha humesa nkahelo nivusiku lowu hundzukaka wu va mberha yo tala. Mupisalema Davhida u fanise ku phyuphya loku tisiwaka hi mberha leyi ni ntokoto lowu tsakisaka wo tshama hi vun’we ni vagandzeri-kulobye va Yehovha.—Pisalema 133:3.

Swiletelo swa muprofeta Muxe leswi yaka eka Israyele a swi olova ni ku phyuphyisa, ku fana ni mathonsi ya mberha. U te: “Rito ra mina ri ta širirika kukotisa mbera; kukota mpfula e rihlazeni, kukota mbera le’yo tala e byanyini!” (Deteronoma 32:2) Namuntlha, Timbhoni ta Yehovha ti huwelela mahungu lamanene lama nyikaka vutomi ya Mfumo wa Xikwembu ku fika emakun’wini ya misava. (Matewu 24:14) Xikwembu xi ndlandlamuxa xirhambo lexi nge: “ ‘Tana!’ Mani na mani la khomiweke hi torha a a te; mani na mani la swi navelaka a a nwe mati ya vutomi mahala.” (Nhlavutelo 22:17) Timiliyoni ta vanhu va tinxaka hinkwato va amukela nyiko leyi ya ku phyuphyisiwa ka moya loku humaka eka Xikwembu, loku nga hlayisaka vutomi hilaha ku nga heriki.