Xana Vafundhisi Hinkwavo Va Swi Tshemba Leswi Va Swi Dyondzisaka?

NUNA wa wansati un’wana wa ha ku fa. Mufundhisi wa wansati loyi u hlamusela leswaku nuna wa yena a a nga lulamanga hilaha ku eneleke leswaku a nga ya etilweni hi ku kongoma naswona a a nga bihanga ngopfu leswaku a hundziseriwa endzilweni wa tihele. Hikwalaho, hi ku ya hi mufundhisi loyi, u le ku xanisiweni ku kondza a fanelekela tilo. Wansati loyi u hakela mufundhisi leswaku a ya khongela leswaku nuna wa yena a ta ntshunxiwa hi ku hatlisa eku basisiweni. Noni yi enerisiwa hi leswi, yi anakanya leswaku mufundhisi loyi u pfumela eka leswi yona yi swi pfumelaka hi mbilu hinkwayo.

Xana u anakanya leswaku noni yi ta heleriwa hi ntshembo loko yi kuma leswaku mufundhisi wa yona a nga pfumeli leswaku vanhu va xanisiwa loko va file? Vo tala va khunguvanyeka loko va kuma leswaku nhlayo leyikulu ya vafundhisi a va swi pfumeli hinkwaswo leswi va swi dyondzisaka. National Catholic Reporter, loko yi vulavula hi leswi vuriwaka “xiphiqo xa vafundhisi lexi enteke ku tlula ku tikhoma loko biha hi tlhelo ra rimbewu,” yi te: “Exikarhi ka vafundhisi hi ku angarhela, ku ni vo tala lava nga ha pfumeriki eka vukona bya Xikwembu kumbe eka dyondzo ya ku hakeriwa ni ku xupuriwa kumbe ku pfuka ka vafi . . . lerova i nchumu lowu tolovelekeke ngopfu eka vafundhisi.”

Tikereke tin’wana ti langutane ni xiphiqo lexi fanaka. Nkambisiso wa vayimeri va Kereke ya Nghilandhi wu paluxe leswaku vo tala “a va pfumeli eka swilo swa xisekelo swa vupfumeri bya Vukreste swo tanihi ku velekiwa hi wanhwana, masingita ya Yesu ni ku ta ra vumbirhi ka mesiya,” ku vika Canberra Times ya le Australia.

Mutsari wa ta vukhongeri George R. Plagenz u vutisile malunghana ni mufundhisi leswaku a nga yi hlamusela njhani dyondzo leyi yena a nga pfumeliki eka yona, hi ripfalo lerinene. Mufundhisi un’wana u vule leswaku a a siva marito yo sungula ya dyondzo lama nge, “Ndza pfumela.” U te: “A ndzi sungula dyondzo hi ku vula leswaku, ‘VA pfumela eka Xikwembu Tatana wa Matimba Hinkwawo . . . ’” Plagenz u vitane vuxisi byolebyo “vukanganyisi lebyikulu etikweni.”

Lexi vavisaka, ku nga pfumeli koloko ka vafundhisi ni vukanganyisi bya vona swi pfilunganya vanhu vo tala malunghana ni vukhongeri hi ku angarhela. Kambe a hi yona ntsena mhaka leyi khunguvanyisaka ya vukhongeri namuntlha. Vanhu vo tala lava nghenaka kereke va dyondzisiwe leswaku Bibele i Rito ra Xikwembu. Xana va ta hlamala loko vo dyondza leswaku tidyondzo tin’wana leti ku nga khale ti amukeleka ekerekeni a ti dyondzisiwi eBibeleni? Xihloko lexi landzelaka xi ta vulavula hi xikombiso xin’wana.