Riendzo Leri Nga Rivalekiki Ri Siya Xihlala Xi Tsakile

Cuba, xihlala xo saseka eKharibiya, sweswinyana xa ha ku va ni nguva ya ku phyuphyisiwa hi tlhelo ra moya hi ndlela leyi nga pimanisiwiki na nchumu. Ku hela ka 1998 ku te ni nkateko lowu ku nga khale wu rindzeriwile hi Timbhoni ta Yehovha leti tshamaka etikweni leri kumekaka eWest Indies. Ro sungula endzhaku ka malembe yo tlula 30, swirho swa Huvo leyi Fumaka ya Timbhoni ta Yehovha swi endzele kona, naswona a swi famba ni vapfhumba va 15. Vaendzi lava a va ri vaaka-tiko va le Australia, Austria, Belgium, Great Britain, Italiya, New Zealand ni le Puerto Rico.

XEXO a xi ri xiendlakalo xa matimu eka vahuweleri va Mfumo va kwalaho lava ringanaka 82 258, ni vanhu va 87 890 lava hlanganyeleke na vona ku tlangela Xilalelo xa Hosi hi ximun’wana xa 1998.

Ku sukela hi ti-1 ku ya eka ti-7 ta December, 1998, Lloyd Barry, John Barr na Gerrit Lösch va endzele Kaya ra Bethele eHavana kutani va va kona eka yin’wana ya Mintsombano ya Muganga ya “Ku Hanya Hi Ndlela Ya Xikwembu,” leyi a yi khomeriwe eCuba. Va tsakile ku va va swi kotile ku hlangana ni vakulu lava famba-fambaka ni ku tolovelana kahle ni vatirhela-mfumo va le Cuba.

John Barr u ri: “Lexi a ku ri xiendlakalo xo hlawuleka xa moya evuton’wini bya mina ni nkatanga. Vamakwerhu lava rhandzekaka va le Cuba va wu hisekela swinene ntiyiso! Ndzi swi vonile leswaku vumakwerhu bya misava hinkwayo i bya risima hakunene!” Lloyd Barry u engetele a ku: “Vhiki leri ra nkoka ri ndzi pfune leswaku ndzi swi twisisa ku antswa swiyimo swa vamakwerhu va kwalaho.”

Eka malembe ya ntlhanu lama hundzeke, Timbhoni ta Yehovha ti nyikiwe ntshunxeko wa vugandzeri lowu engetelekeke eCuba, naswona mavulavulelo ya valawuri va Cuba ma komba leswaku va tsakela onge leswi swi nga tshama swi ri tano.

Hi September 1994, ku sunguriwe ntirho wa vugandlisi eKaya ra Bethele le Havana. Timbhoni ta Yehovha ti pfumeleriwile nakambe ku hlangana erivaleni ni ku chumayela yindlu hi yindlu. Endzhakunyana hi 1998, valawuri va pfumelele ku endza loku ka vapfhumba va 18 va Timbhoni ta Yehovha lava humaka ematikweni man’wana, ku katsa ni swirho swinharhu swa Huvo leyi Fumaka.

Ku Hlangana Nakambe Loku Tsakisaka

Loko vapfhumba lava va fika erivaleni ra swihaha-mpfhuka ra José Martí le Havana, va hlanganisiwe hi malwandla hi vatirhela-mfumo ni ntlawa wa vanhu lava humaka eKaya ra Bethele, exikarhi ka vona ku ri ni makwerhu loyi a a tsundzuka riendzo ro hetelela ra xirho xa Huvo leyi Fumaka eCuba—ku nga Milton Henschel—hi 1961. Hi nkarhi wolowo makwerhu loyi a a ri ni malembe ya 12 hi vukhale; sweswi i mulanguteri la famba-fambaka.

Loko vapfhumba va fika eKaya ra Bethele, va amukeriwe hi swiluva swa ti-gladiolus, ti-rose, ti-jasmine ni ti-daisy ta xitshopana ni to tshwuka, leswi makwerhu un’wana a swi byaleke hi xikongomelo xa ku swi tirhisa eka xiendlakalo lexi. Mihloti a yi halaka kunene loko ndyangu wa Bethele wu amukela vapfhumba volavo. Endzhaku, va dye swin’we swakudya swa le Cuba, ku nga nyama ya nguluve leyi oxiweke, rhayisi na tinyawa, saladi, yucca leyi pfanganisiweke ni mojo (murhu lowu endliweke hi xinyalana ni mafurha ya mutlhwari) ni mihandzu. Endzhaku ka swakudya, xirho ha xin’we xa Huvo leyi Fumaka xi nyikele nkulumo leyi akaka, leyi vulavulaka hi nkoka wa ntirho wa Bethele. Leswi makwerhu Lösch a swi vuleke swi va khumbile swinene, tanihi leswi a a vulavula ni vamakwerhu hi Xipaniya. Ndyangu wa Bethele wu ni vatirhi vo tirhandzela va nkarhi hinkwawo va 48 ni vapfuni va nkarhinyana va 18.

Hambileswi Italiya ri kandziyiselaka vamakwerhu va le Cuba tibuku ni Tibibele, minkandziyiso ya muvala wa ntima ni wo basa ya timagazini ta Xihondzo xo Rindza na Xalamuka! yi kandziyisiwa etikweni rero hi michini mimbirhi yo kandziyisa. Ku laveka ku tirha tiawara to tala endhawini leyitsongo ni ku endla ntirho wa mavoko lowu phindha-phindhiwaka leswaku ku kandziyisiwa timagazini hinkwato leti lavekaka. Vatirheli lava va ku tirhandzela va teka ntirho lowu va wu endlelaka Yehovha wu ri wa risima hi ndlela leyi hlawulekeke.—2 Vakorinto 4:7.

Tinhla-nkulu Ta Ntsombano

Vapfhumba lava va 18 va hambanile va va mintlawa yinharhu leswaku va ta va kona emintsombanweni leyi khomiweke etindhawini tinharhu—eHavana, Camagüey ni le Holguín. Eka rin’wana ni rin’wana ra masiku lawa manharhu ntlawa lowukulu wa vamakwerhu, ku katsa ni vakulu ni maphayona yo tala, va rhambiwile leswaku va va kona eka yin’wana ya tindhawu leti. Timbhoni ta kwalaho ti byeriwe leswaku lexi xi ta va xiendlakalo xo hlawuleka, kambe a ti nga swi tivi leswaku swirho swa Huvo leyi Fumaka swi ta va swi ri kona. U nga vona ndlela leyi va hlamaleke ha yona loko va vona vamakwerhu lava rhandzekaka ni vasati va vona va xika hi Ravuntlhanu nimixo emabazini lama qachiweke!

Mintsombano yi khomeriwe eka miako leyi pfulekeke ematlhelo, leyi akiweke hi vamakwerhu hi mpfumelelo wa valawuri. Eka rin’wana ra maribye ya le nyangweni wa laha ntsombano wa le Havana a wu khomeriwe kona, a ku kovotliwe “Pisalema 133:1” (NW). Leswi swi tsundzuxe vamakwerhu hi marito ya ndzimana yoleyo lama nge: “Waswivo! Mawaku ndlela leyi swi nga swinene ha yona ni ku tsakisa ha yona loko vamakwavo va tshama swin’we hi vun’we!” Hakunene, hi nkarhi wa ntsombano a ku ri ni xinakulobye lexi tsakisaka ni lexinene xa Vukreste endhawini yoleyo.

Vaendzi va vulavule hi ndlela leyinene leyi tinkulumo ti vekiweke ha yona ku katsa ni mimbulavurisano, nakambe va tsakisiwe hi ndlela leyi drama yi tlangiweke ha yona, leyi a yi sekeriwe emhakeni ya Bibele ya Daniyele ndzima 3, leyi endlekeke eBabilona wa khale. Makwerhu wun’wana wa xisati u te: “Vatlangi hinkwavo va tlange kahle swinene, ni ndlela leyi a va fambisana ni marito lama rhekhodiweke ha yona a yi ri yinene lerova a wu nga swi xiyi leswaku mpfumawulo wa marito wu rhekhodiwa ka ha ri emahlweni. . . . Vanhu va le Babilona lavo biha a va vonaka va bihile hakunene, kasi Vaheveru lavaya vanharhu a va tiyile naswona va tiyimiserile.”

Vayimeri va Hofisi ya Timhaka ta Vukhongeri ni vatirhela-mfumo van’wana lava veke kona emintsombanweni leyi, va bumabumele vamakwerhu hi ku hleleka ka vona ni ku tikhoma ka vona lokunene. Makwerhu Barry u yi tlangele ngopfu ndlela leyinene leyi valawuri va Cuba va khomeke vapfhumba ha yona. Vamakwerhu va be mavoko nkarhi wo leha ku ri ku kombisa ku tlangela tinkulumo, swin’we ni leswi valawuri va va pfumeleleke ku va ni mintsombano leyi. Ndyangu wun’wana wa Vakreste wu te: “Leswi a hi nga swi langutelanga nikatsongo—ntsombano wutsongo wa matiko hinkwawo! Wu tsakisile hakunene, hikuva wu kombise vumbhoni bya matimba lamakulu ya Yehovha ya ku endla leswaku switshembiso swakwe swi hetiseka.”

Mintsombano leyi yi tlhele yi endla leswaku vanhu van’wana va ti tiva ku antswa Timbhoni. Un’wana wa vachayeri va mabazi u ve kona entsombanweni hi Mugqivela ni hi Sonto. U vule leswaku u twe swilo swo tala leswi vuriwaka malunghana ni Timbhoni ta Yehovha, kambe sweswi wa swi tiva leswaku i vanhu lavanene, lava rhandzaka ku rhula.

“Swilo Leswi Hi Nga Taka Hi Nga Swi Rivali”

Vanhu va le Cuba va tsakise vapfhumba hi rirhandzu ni xinakulobye xa vona. Vanhu va Cuba va ni migingiriko, va xixima naswona va ni musa. Mupfhumba un’wana u ri: “Ko tala vanhu lava hi nga va tiviki hi ku helela va tinyiketele ku hi pfuna.”

Vapfhumba va tsakisiwe ngopfu hi ripfumelo, ntsako ni rirhandzu leri kombisiweke hi Timbhoni-kulobye ta le Cuba. Hambileswi va langutanaka ni swihinga leswikulu, va endla Yehovha khokholo ra vona. (Pisalema 91:2) John Barr u te: “Ku ni swilo swo tala swinene leswi ndzi hlamariseke eka riendzo leri ra mina ro sungula ra ku ta eCuba—ku saseka ka ndhawu, vumunhu lebyinene bya vanhu lava ndzi hlanganeke na vona, kasi ehenhla ka hinkwaswo, ndzi hlamarisiwe hi ntsako lowukulu ni ku hiseka emoyeni ka Timbhoni ta le Cuba. Evuton’wini bya mina a ndzi si tshama ndzi twa vuyimbeleri byo tano lebyi humaka embilwini bya tinsimu ta Mfumo ni ku biwa ka mavoko nkarhi wo leha swonghasi loko timhaka ta moya ti va khumbe timbilu! Leswi hi nge pfuki hi swi rivarile. Hi ta tshama hi ri karhi hi swi tlangela.”

Pisalema 97:1 yi ri: “Ŝihlale hikwaŝo a ŝi ṭakisise!” Intiyiso, Timbhoni ta Yehovha ta xihlala xa le Cuba ti swi tsakerile ku kuma ntshunxeko lowu engetelekeke wa ku gandzela Xikwembu xa tona, swin’we ni ku endzeriwa loku nga rivalekiki hi vapfhumba lava humaka ematikweni man’wana.

[Swifaniso leswi nga eka tluka 8]

Mindyangu yo tala yi ve kona eMintsombanweni yo hlawuleka ya Muganga ya le Cuba ya “Ku Hanya Hi Ndlela Ya Xikwembu”

[Xifaniso lexi nga eka tluka 8]

Kaya ra Bethele le Havana ri tlhele ri pfuriwa hi 1994

[Xifaniso lexi nga eka tluka 8]

Swirho swa Huvo leyi Fumaka swi sayina Tibibele leti nyikiweke vatirhela-mfumo