Ku Hlayisa Vito Lerinene

SWA tsakisa ku nyanga xifaniso xo saseka hi vukheta. Hi ku nyangisisa, munhu a nga xiya ndlela leyi mumpfampfarhuti a byi tirhiseke ha yona voya bya madzana bya bulachi leswaku a nghenisa mivala yo hambana-hambana eka lexi a xi mpfampfarhutaka.

Hilaha ku fanaka, vito lerinene a ri kumiwi hi ku bulacha kan’we, kambe hi swiendlo swo tala leswitsongo endzhaku ka nkarhi wo leha. Ina, hakatsongo-tsongo ndhuma ya hina ya kula hikwalaho ka swiendlo leswi hi swi endlaka.

Hi tlhelo rin’wana, voya byin’we bya bulachi lebyi nga fambisiwangiki kahle byi nga onha nkoka wa xifaniso. Kutani swi tano ni hi vito ra hina. Hosi ya vutlhari Solomoni yi te: “V̌uhunguki bya munhu byi ṅwi hambukisa ndlela.” (Swivuriso 19:3) Ku nga ha va ku ri vuphukuphuku byitsongo—kumbexana ku hlundzuka ka vukarhi loku nga lawulekiki, ku nga ringaniseli eswakunweni swa xihoko, kumbe xiendlo xin’we xa ku tikhoma hi ndlela yo biha hi tlhelo ra rimbewu—leswaku u onha ndhuma leyinene. (Swivuriso 6:32; 14:17; 20:1) Hikwalaho, i swa nkoka leswaku, hi lwela ku kuma vito lerinene, naswona hi tirha hi matimba leswaku hi ri hlayisa.—Ringanisa Nhlavutelo 3:5.