Ku Ni Tindzalama Leti Hanyaka eNamibia! — Watchtower LAYIBURARI YA LE KA WEB SITE

Ku Ni Tindzalama Leti Hanyaka eNamibia!

TIKO ra Namibia ri nave mpfhuka wa kwalomu ka tikhilomitara ta 1 500 ku longoloka ni ribuwa ra dzonga-vupela-dyambu bya Afrika. Ribuwa hinkwaro ra tiko leri ri ni swipuwa swa sava, switsunga leswi nga ni maribye ni timbala to hambana-hambana ta rikhwarha. Emaribyeni lama hlanga-hlanganeke ya timbuwa ta Namibia ku ni maribye ya nkoka lama nga ni mivala yo hambana-hambana. Minkarhi yin’wana hambi ku ri tidayimani ta kumeka kwalaho. Kambe tiko hi roxe ri na nchumu wun’wana lowu nga wa risima swinene ku tlula maribye lawa. Namibia ri na tindzalama leti hanyaka—vanhu va rona vo tala i va tinxaka to hambana-hambana.

Vaaki vo sungula ku tshama eNamibia a va vulavula tindzimi leti yelanaka leti vitaniwaka Khoisan. Mavulavulelo ya vona a ma tiviwa hi ndlela leyi marito ya kona ma vitaniwaka hakona. Exikarhi ka lava va vulavulaka Xikhoisan namuntlha ku na Madamara ya ntima, vanhu vo koma va ntlhohe lava vitaniwaka Manama ni Varhwa lava dumeke hi ku hlota. Tinxaka to tala ta vantima na tona ti tile eNamibia eka malembe-xidzana ya sweswinyana. Tona ti wela eka tinxaka tinharhu letikulu: ku nga Maovambo, (rixaka lerikulu eNamibia), Maherero ni Makavango. Valungu va sungule ku tshama eNamibia hi lembe-xidzana ra vu-19. Valuveri vo tala va fike endzhaku ka loko tidayimani ti tshuburiwile emananga lawa ya sava.

Vaaki va le Namibia i va risima hikuva i xiphemu xa misava ya vanhu lava Xikwembu xi nyikeleke hi N’wana wa xona, xisweswo xi pfula ndlela leyi yisaka evuton’wini lebyi nga heriki. (Yohane 3:16) Vanhu va madzana va le Namibia lava humaka eka tinxaka to tala ana se va ri amukerile rungula leri ponisaka. Vanhu lava va nga fanisiwa ni maribye ya risima hikuva va le xikarhi ka “le’ŝi ranḍekaka ŝa matiko hikwawo,” leswi sweswi swi hlengeleteriwaka endlwini ya Yehovha ya ku gandzela.—Hagayi 2:7.

Ku Sunguriwa Ka Ku Cela Mugodi Hi Tlhelo Ra Moya

Tindzalama ta moya ti sungule ku ceriwa eNamibia hi 1928. Hi lembe rero, rhavi ra Sosayiti ya Watch Tower eAfrika Dzonga ri rhumele tibuku ta Bibele ta 50 000 eka vanhu lava hangalakeke ni tiko hinkwaro. Lembe leri tlhandlamaka, Mukreste la totiweke loyi vito rakwe ku nga Lenie Theron, la humaka eAfrika Dzonga, u landzelele ku tsakela loku kombisiweke. Hi tin’hweti ta mune u famba-fambe etikweni hinkwaro a ri yexe, a fambisa tibuku to dyondza Bibele ta 6 000, hi Xibunu, Xinghezi ni Xijarimani. Hakunene ntirho lowu hinkwawo a wu nga ri wa hava.

Hi xikombiso, vona Bernhard Baade, mutirhi wa le mugodini la humaka eJarimani. Hi 1929 a a kuma mphakelo wa mandza eka murimi loyi a a phutsela tandza rin’wana ni rin’wana hi tluka ra buku ya Watch Tower. Bernhard u hlaye tluka ha rin’we hi ku tiyimisela, a hlamala leswaku i mani mutsari wa buku leyi. Eku heteleleni u fike eka tluka ro hetelela, leri n’wi nyikeke adirese ya Sosayiti ya Watch Tower ya le Jarimani. Bernhard u tsarile a kombela tibuku leti engetelekeke kutani a va munhu wo sungula wa le Namibia la yimeleke ntiyiso.

Ku Fika Ka Vatirhi Va Nkarhi Hinkwawo

Hi 1950, ku fike varhumiwa va mune eNamibia lava leteriweke eXikolweni xa Bibele xa Gilead xa Watchtower. Hi 1953 nhlayo leyi ya varhumiwa yi andzile yi va nhungu. Yi katse Dick na Coralie Waldron, mpatswa lowu tekaneke wa le Australia, lowu na sweswi wa ha tirhaka kona hi vutshembeki. Vahuweleri vo tala va Mfumo va nkarhi hinkwawo lava humaka eAfrika Dzonga ni le tindhawini tin’wana va tile va ta cela tindzalama ta moya eNamibia. Varhumiwa van’wana, ku katsa ni mathwasana ya Xikolo xa Ndzetelo wa Vutirheli, va rhumeriwile eNamibia.

Nchumu wun’wana lowu hoxaka xandla eku andzeni hi tlhelo ra moya ka tiko ra Namibia ku ve ku hundzuluxeriwa ni ku kandziyisiwa ka tibuku ta Bibele hi tindzimi letikulu ta laha, to kota Xiherero, Xikwangali, Xikwanyama, Xinama/Damara ni Xindonga. Ku sukela hi 1990, hofisi leyinene ya ku hundzuluxela ni kaya ra vatirhi va nkarhi hinkwawo va ku tirhandzela yi sungule ku tirha entsindza wa laha, ku nga Windhoek. Karen Deppisch, loyi a tirheke ni nuna wakwe entirhweni wa nkarhi hinkwawo wa ku vula evhangeli etindhawini to hambana-hambana ta Namibia, u ri: “Vanhu vo tala va hlamala loko hi va nyika tibuku hi ririmi ra ka vona, ngopfu-ngopfu leswi tibuku ta muxaka wun’wana ti kalaka hi ririmi rolero.”

Ku Kovotla Maribye Lawa Ya Nkoka

Tin’wana ta tindzalama ta xiviri ta le Namibia ti kovotliwe hi magandlati lama famba-fambaka ni sava eka magidi ya malembe lama hundzeke. Kambe endlelo ro tano a ri ti humesi tindzalama leti hanyaka. Swi lava matshalatshala leswaku vanhu lava nga hetisekangiki va “cukumeta vumunhu bya khale” kutani va ambala vumunhu lebyintshwa lebyi fanaka ni bya Kreste. (Vaefesa 4:20-24) Hi xikombiso, ku gandzela vakokwana lava feke i ndhavuko lowu tolovelekeke swinene eka tinxaka to tala ta le Namibia. Hakanyingi lava va nga hlanganyeliki evugandzerini bya vakokwana va xanisiwa hi swirho swa ndyangu ni vaakelani. Loko vanhu va dyondza eBibeleni leswaku vafi “a v̌a tiv̌i ntšhumu,” va langutana ni ndzingo. (Eklesiasta 9:5) Hi ndlela yihi?

Mbhoni leyi nga Muherero yi ri: “A ku ri ntlhontlho lowukulu ku yingisela ntiyiso. Ndzi pfumele ku va ni dyondzo ya Bibele ni Timbhoni ta Yehovha, kambe swi ndzi teke nkarhi leswaku ndzi tirhisa swilo leswi a ndzi swi dyondza. Xo sungula, a ndzi fanele ndzi tiyiseka leswaku a ndzi nge ngheni ekhombyeni loko ndzi tshika ku tirhisa tidyondzo ta ndhavuko. Hi xikombiso, a ndzi hundza hi movha etindhawini to karhi eNamibia ndzi nga yimi ndzi veka ribye esirheni kumbe ndzi nga xi susi xihuku xa mina ndzi losa vafi. Hakatsongo-tsongo ndzi khorwisekile leswaku a ku na nchumu lowu nga ta ndzi humelelela loko ndzi nga va gandzeli vakokwana. Ndzi tsaka swinene leswi Yehovha a katekiseke matshalatshala ya mina ya ku pfuna ndyangu wa mina ni vanhu van’wana lava tsakelaka leswaku va dyondza ntiyiso!”

Xilaveko Xa Vatirhi Va Le Mugodini Wa Moya

Loko varhumiwa va nga si fika hi 1950, a ku ri ni muhuweleri un’we ntsena wa mahungu lamanene eNamibia. Nhlayo yoleyo yi andzile hakatsongo-tsongo yi fika eka 995. Kambe, ntirho wa ha ri wukulu. Entiyisweni, tindhawu tin’wana a ti si fikeleriwa nikatsongo. Xana u nga swi kota ku tirha laha ku nga ni xilaveko lexikulu xa vahuweleri lava hisekaka va Mfumo? Loko swi ri tano, hi kombela leswaku u pelela eNamibia kutani u hi pfuna ku kuma ni ku kovotla maribye ya nkoka ya moya lama engetelekeke.—Ringanisa Mintirho 16:9.

[Mepe/Swifaniso leswi nga eka tluka 26]

(Leswaku u vona rungula leri hleriweke hi ku helela, vona nkandziyiso wa kona)

AFRIKA

NAMIBIA

[Swifaniso]

Namibia i tiko ra maribye ya nkoka yo saseka

[Swihlovo Swa Kona]

[Swifaniso leswi nga eka tluka 26]

Mahungu lamanene ya chumayeriwa etinxakeni hinkwato ta tiko ra Namibia

[Xifaniso lexi nga eka tluka 28]

Xana u nga tirha laha ku nga ni xilaveko lexikulu xa vahuweleri va Mfumo?