Xana Bibele Yi Nga Hi Pfuna Namuntlha?

“EBIBELENI hinkwayo, xiyenge lexi fanelaka ku hlayiwa hi lexi endlaka kwalomu ka phesente yin’we, kambe swiyenge leswin’wana hinkwaswo a hi swa nkoka naswona swi hundzeriwe hi nkarhi.” Marito wolawo ma vuriwe hi jaha rin’wana. Vanhu vo tala va nga pfumelelana na rona. Hambileswi Bibele yi hambetaka yi xaviwa swinene emisaveni hinkwayo, vanhu va timiliyoni va yi nyika nyingiso wutsongo naswona a va ti tolovelanga tidyondzo ta yona.

Nkandziyiso wa phepha-hungu ra le Jarimani leri vitaniwaka Süddeutsche Zeitung, ra Khisimusi ya 1996, wu vule leswaku Bibele “se yi hlayiwa hi vanhu vatsongo swinene. Enkarhini lowu wa sayense ni wa ku engeteleka ka vanhu lava rhandzaka swilo swa misava, eka vo tala timhaka ta Bibele ti vonaka ti nga tolovelekanga naswona swa tika ku ti twisisa.” Minkambisiso yi pfumelelana ni xiviko lexi. Minkambisiso yin’wana yi paluxa leswaku vana vo tala a va swi tivi kahle ni leswaku Yesu i mani. Eka nkambisiso wun’wana, a ko va vanhu lava nga ehansi ka hafu ya lava ku vulavurisaniweke na vona, lava koteke ku hlamusela timhaka ta le Bibeleni ta n’wana wa vusopfa ni Musamariya wa muakelani.

Buku ya Kereke ya Swiss Evangelical leyi vitaniwaka Reformiertes Forum yi vula leswaku le Switzerland, Bibele a ya ha laviwi ku fana ni le ku sunguleni. Hambi ku ri lava va nga na yona Bibele, hakanyingi yi titshamela evuhirini yi tala hi ritshuri. Le Britain na kona ku ni xiyimo lexi fanaka. Hi ku ya hi nkambisiso wun’wana, hambileswi vanhu vo tala va nga na yona Bibele, vunyingi bya vona a va yi hlayi.

Hi hala tlhelo, timiliyoni ta vanhu emisaveni hinkwayo ti ni langutelo leri hambaneke hi Bibele. Va yi languta yi ri Rito ra Xikwembu ni ku yi teka yi ri ya nkoka naswona yi vuyerisa. Hikwalaho, va yi hlaya nkarhi na nkarhi. Nhwana un’wana u tsarile a ku: “Ndzi ringeta ku hlaya ndzima yin’we kumbe timbirhi ta Bibele hi siku. Ndzi swi tsakela swinene ku ti hlaya.” Vanhu vo tano va swi tekela enhlokweni leswi Bibele yi swi dyondzisaka, naswona va ringeta ku tirhisa ndzayo ya yona evuton’wini bya vona. Va pfumela leswaku Bibele yi nga va pfuna emisaveni ya namuntlha leyi nga ni swiphiqo.

Hi rihi vonelo ra wena emhakeni leyi? Xana Bibele yi hundzeriwe hi nkarhi? Kumbe xana i ya nkoka naswona ya vuyerisa ke? Xana Bibele yi nga hi pfuna namuntlha?