Ku Vuyeriwa Hi Ku Hlaya Bibele Siku Na Siku

“Ku katekile munhu . . . [la] tiṭakela[ka] e nawini wa Yehova, a wu anakanya nhlekanhi ni v̌usiku.”—PISALEMA 1:1, 2.

1. (a) Xana i mfungho wihi lowu xiyekaka lowu vonakaka etlhelo ka muako wa fektri ya yindlu-nkulu ya misava hinkwayo ya Sosayiti ya Watch Tower? (b) Xana hi ta pfuneka njhani loko hina hi hexe hi tekela xitsundzuxo lexi enhlokweni?

“HLAYA RITO RA XIKWEMBU BIBELE YO KWETSIMA SIKU NA SIKU.” Marito lawa ma vonaka hi tinhlanga letikulu emuakweni wa le Brooklyn, eNew York, wa laha Tibibele ni tibuku ta Bibele ti kandziyisiwaka kona hi Watchtower Bible and Tract Society. Xitsundzuxo lexi a xi vekeriwanga ntsena vanhu va misava lava vonaka mfungho lowu. Timbhoni ta Yehovha ta swi xiya leswaku na tona ti fanele ti swi tekela enhlokweni. Lava va hlayaka Bibele nkarhi na nkarhi ivi hi munhu hi xiyexe va tirhisa leswi va swi hlayaka va vuyeriwa hi dyondzo, ndzayo, ndzulamiso ni ku tolovela leswo lulama leswi yi swi nyikelaka.—2 Timotiya 3:16, 17.

2. Xana Makwerhu Russell u wu kandziyise njhani nkoka wo hlaya Bibele?

² Timbhoni ta Yehovha ti swi tlangela ngopfu swipfuneto swa tona swa ku dyondza Bibele, ku katsa ni Xihondzo xo Rindza, naswona ti swi tirhisa nkarhi na nkarhi. Kambe ta swi tiva leswaku ku hava ni xin’we xa swona lexi sivaka Bibele hi yoxe. Le ndzhaku hi 1909, Charles Taze Russell, muungameri wo sungula wa Watch Tower Bible and Tract Society, u tsalele vahlayi va magazini wa Watch Tower a ku: “Mi nga tshuki mi rivala leswaku Bibele i Mpimanyeto wa hina ni leswaku ku nga khathariseki leswaku swipfuneto leswi humaka eka Xikwembu swi njhani, ko va ‘swipfuneto’ ntsena, hayi swisivi swa Bibele.”

3. (a) Xana “rito ra Xikwembu” ri va khumbe njhani lava ri kumeke? (b) Xana Vaberiya a va ma hlaya ni ku ma dyondza kangani Matsalwa?

³ Matsalwa lama huhuteriweke ma ni ntikelo ni matimba lawa ku nga hava buku yin’wana leyi nga na wona. “Rito ra Xikwembu ra hanya, naswona ra tirha, ri kariha ku tlula tlhari rin’wana ni rin’wana leri lotiweke matlhelo mambirhi, ri tlhava ku ya fika emahlanganeni ya hika ni moya, ni ya marhambu ni mongo, ri kota ku hlaya mianakanyo ni makungu ya mbilu.” (Vaheveru 4:12) Mudyondzisiwa Luka u bumabumele vanhu va le Beriya hi rirhandzu, a va vitana lava ‘nga ni mafundza.’ A va amukelanga rito hi ku hiseka ntsena tanihi leri chumayeriwaka hi muapostola Pawulo ni munghana wakwe Silasi, kambe va tlhele va “kambisisa Matsalwa masiku hinkwawo” ku kuma xisekelo xa Matsalwa xa leswi a swi dyondzisiwa.—Mintirho 17:11.

Ku Yi Hlaya Siku Na Siku

4. Xana Matsalwa ma kombisa njhani malunghana ni leswaku hi fanele hi yi hlaya kangani Bibele?

⁴ Bibele a yi vuli hi ku kongoma leswaku hi fanele hi yi hlaya kangani. Hambi swi ri tano, yi rhekhode xitsundzuxo xa Yehovha eka Yoxuwa xo ‘hlaya buku ya nawu nhlekanhi ni vusiku’ leswaku a ta endla hi vutlhari naswona a humelela eku hetisiseni ka xiavelo xakwe lexi a xi nyikiweke hi Xikwembu. (Yoxuwa 1:8) Yi hi byela leswaku mani na mani la tshameke a fuma tanihi hosi eIsrayele wa khale a a fanele ku hlaya Matsalwa “masiku hikwawo ya ku hanya ka yena.” (Deteronoma 17:19) Yi tlhela yi ku: “Ku katekile munhu l’a nga fambiki hi ku letela ka la’v̌o homboloka . . . Kambe a tiṭakela e nawini wa Yehova, a wu anakanya nhlekanhi ni v̌usiku.” (Pisalema 1:1, 2) Nakambe, Evhangeli leyi rhekhodiweke hi Matewu yi hi byela leswaku loko Yesu Kreste a bakanye matshalatshala ya Sathana yo N’wi ringa, U tshahe eMatsalweni ya Xiheveru lama huhuteriweke, a ku: “Ku tsariwile leswi: ‘Munhu a nga ka a nga hanyi hi vuswa ntsena, kambe u ta hanya hi marito hinkwawo lama humaka enon’weni wa Xikwembu.’” (Matewu 4:4) Xana swakudya swa nyama hi swi lava kangani? Masiku hinkwawo! Ku dya swakudya swa moya siku na siku na swona i swa nkoka swinene hikuva swi khumba ku langutela ka hina vutomi lebyi nga heriki.—Deteronoma 8:3; Yohane 17:3.

5. Xana ku hlaya ka Bibele ka siku na siku ku nga hi pfuna njhani leswaku hi “hanya vutomi lebyi fanekelaka emahlweni ka Hosi” loko ripfumelo ra hina ri ringiwa?

⁵ Un’wana ni un’wana wa hina u lava ku tiyisiwa hi Rito ra Xikwembu siku na siku. Masiku hinkwawo—ekaya, entirhweni, exikolweni, eswitarateni, loko hi ri eku xaveni, evutirhelini bya hina—ripfumelo ra hina ra tlhontlhiwa. Xana hi nga langutana njhani ni leswi? Xana swileriso ni misinya ya milawu ya Bibele swi ta ta hi ku olova emiehleketweni ya hina? Ematshan’weni yo khutaza ku tiba xifuva, Bibele ya tsundzuxa: “Loyi a anakanyaka leswaku wa ha yimile, a a tivonele leswaku a nga wi.” (1 Vakorinto 10:12) Ku hlaya Bibele siku na siku ku ta hi pfuna ku “hanya vutomi lebyi fanekelaka emahlweni ka Hosi, [h]i yi tsakisa etimhakeni hinkwato,” ematshan’weni yo pfumelela misava yi hi hundzula hi fana na yona.—Vakolosa 1:9, 10; Varhoma 12:2.

Xilaveko Xo Hlaya Bibele Hi Ku Phindha-phindha

6. Ha yini swi pfuna ku hlaya Bibele hi ku phindha-phindha?

⁶ Ku hlaya Bibele swi hambane ngopfu ni ku hlaya buku ya ntsheketo. Tibuku to tala ta ntsheketo ti endleriwe ku hlayiwa kan’we ntsena; loko munhu a tiva mhaka ya kona ni leswaku yi hele njhani, u hetile hi yona. Ku hambana ni sweswo, ku nga khathariseki leswaku Bibele se hi yi hlaye ko tala ku fikela kwihi, ha pfuneka swinene loko hi yi hlaya nakambe. (Swivuriso 9:9) Eka munhu la nga ni vuxiya-xiya, Matsalwa ma tshama ma ri lamantshwa. Vuprofeta lebyi vulavulaka hi masiku ya makumu byi ya byi twisiseka eka yena hi ku ya hi leswi se a swi voneke, leswi a swi tweke ni leswi a swi tokoteke etin’hwetini ta sweswinyana. (Daniyele 12:4) Loko a ya a ndlandlamuxa ntokoto wakwe evuton’wini ni ku langutana ni swiphiqo, muhlayi wa Bibele la xiyisisaka u xi tlangela hi xitalo swinene xitsundzuxo lexi eku sunguleni a xi hlayeke hi xiwelo. (Swivuriso 4:18) Loko a hlaseriwa hi vuvabyi lebyikulu, switshembiso swa Bibele malunghana ni ku susiwa ka switlhavi ni ku kondleteriwa ka rihanyo swi sungula ku twisiseka kahle ku tlula eku sunguleni. Loko vanghana lavakulu ni swirho swa ndyangu swi fa, ntshembo wa ku pfuxiwa ka vafi wu va wa risima swinene.

7. I yini lexi nga hi pfunaka loko hi sungula vutihlamuleri lebyintshwa evuton’wini, naswona ha yini?

⁷ Swi nga endleka u tshame u hlaya Bibele hi wexe ivi u tirhisa switsundzuxo swa yona malembe yo tala. Kambe swi nga ha endleka leswaku sweswi u va ni vutihlamuleri lebyintshwa evuton’wini. Xana u kunguhata ku nghenela vukati? Xana u ta va mutswari? Xana u byarhisiwe vutihlamuleri evandlheni tanihi nkulu kumbe nandza wa vutirheli? Xana u tshama u va muevangeli wa nkarhi hinkwawo, ni ku va ni malunghelo lama engetelekeke yo chumayela ni ku dyondzisa? Vona ndlela leyi swi nga ta ku pfuna ha yona ku tlhela u hlaya Bibele hinkwayo u ri ni vutihlamuleri byebyo lebyintshwa emiehleketweni!—Vaefesa 5:24, 25; 6:4; 2 Timotiya 4:1, 2.

8. Xana ku cinca ka swiyimo ku nga xi kombisa njhani xilaveko xo dyondza swo tala leswi hi ehleketaka leswaku se ha swi tiva?

⁸ Enkarhini lowu hundzeke u nga ha va u endle kahle eku kombiseni ka mihandzu ya moya. (Vagalatiya 5:22, 23) Kambe ku cinca ka swiyimo swi nga ha endla leswaku u langutana ni xilaveko xo dyondza swo tala malunghana ni timfanelo teto ta Xikwembu. (Ringanisa Vaheveru 5:8.) Khale ka mulanguteri la famba-fambaka loyi a voneke swi ri swa nkoka ku tshika ntirho wa yena wo hlawuleka leswaku a ta khathalela vatswari vakwe lava dyuhaleke u te: “A ndzi tala ku ehleketa leswaku ndzi yi kombisa kahle mihandzu ya moya. Sweswi ndzi vona onge ndzi sungula ehansi nakambe.” Hi ku fanana, vavanuna ni vavasati lava vanghana va vona va vukati va xanisekaka ngopfu hi vuvabyi bya miri kumbe bya mintlhaveko va nga kuma leswaku hi ku va khathalela, minkarhi yin’wana ntshikilelo wu vanga leswaku va endla swilo leswi swi va hetaka matimba. Ku hlaya Bibele nkarhi na nkarhi i xihlovo xa nchavelelo lowukulu ni mpfuno.

Nkarhi Lowu Ku Hlaya Bibele Ku Nga Endliwaka Ha Wona

9. (a) I yini lexi nga pfunaka munhu la khomekeke swinene ku kuma nkarhi wo hlaya Bibele siku na siku? (b) Ha yini ku hlaya Rito ra Xikwembu swi ri swa nkoka ngopfu-ngopfu eka vakulu?

⁹ Kavula, eka vanhu lava ana se va khomekeke ngopfu, i ntlhontlho ku kuma nkarhi wo endla leswi engetelekeke evuton’wini bya siku na siku. Hambi swi ri tano, hi nga pfuneka exikombisweni xa Yehovha. Bibele yi boxa leswaku u endla swilo hi ‘minkarhi leyi vekiweke.’ (Genesa 21:2; Eksoda 9:5; Luka 21:24; Vagalatiya 4:4) Ku tlangela nkoka wa ku hlaya Rito ra Xikwembu nkarhi na nkarhi ku nga hi pfuna ku hlawula nkarhi wa kona exiyimisweni xa hina xa siku na siku. (Vaefesa 5:15-17) Ngopfu-ngopfu vakulu va fanele va wu vekela etlhelo nkarhi wa ku hlaya Bibele siku na siku ku endlela leswaku ndzayo leyi va yi nyikelaka yi va yi sekeriwe emisinyeni ya milawu ya Bibele hi ku pakanisa ni leswaku moya lowu va wu kombisaka wu ta komba “vutlhari byo ta hi le henhla.”—Yakobo 3:17; Tito 1:9.

10. Xana vahlayi va Bibele va siku na siku va wu kuma rini nkarhi wo yi hlaya?

¹⁰ Vo tala lava humeleleke exiyimisweni xa ku hlaya Bibele ka munhu hi xiyexe va hlaya ni mixo swinene va nga si sungula mintirho ya siku. Van’wana va kuma leswaku va kota ku swi endla nkarhi na nkarhi hi nkarhi wun’wana. Tikhasete leti rhekhodiweke ta Bibele (laha ti kumekaka kona) ti pfuna vafambi ku wu tirhisa kahle nkarhi wo famba, naswona Timbhoni tin’wana ti tiyingisela loko ti ri karhi ti endla mintirho yin’wana ya le kaya. Swiyimiso leswi tirheke eka Timbhoni to hambana-hambana eYuropa, Afrika, Amerika N’walungu, Amerika Dzonga ni le Vuxeni swi kombisiwe eka matluka 20, na 21, exihlokweni lexi nge “Nkarhi Lowu Va Yi Hlayaka Ha Wona Ni Ndlela Leyi Va Pfunekaka Ha Yona.”

11. Xana ku hlaya ka Bibele ka siku na siku ku nga endliwa njhani hambi loko nkarhi lowu nga kona wu ri wutsongo swinene?

¹¹ Lexi nga xa nkoka ngopfu a hi nkarhi lowu u wu hetaka u hlaya Bibele, kambe i ndlela leyi u phikelelaka ha yona. U nga ha swi kuma swi pfuna ku hlaya awara yin’we kumbe ku tlula hi nkarhi wun’we, u endla vulavisisi lebyi engetelekeke ni ku yisa nyingiso wa wena hi ku helela emhakeni ya kona. Kambe xana xiyimiso xa wena xa swi pfumelela sweswo nkarhi na nkarhi? Ematshan’weni yo tshika masiku ma hundza u nga si hlaya Bibele hi ku helela, xana a swi nga ta antswa ku yi hlaya siku na siku ku ringana 15 wa timinete hambi ko va 5 wa timinete ntsena? Swi endle xiboho xa wena ku hlaya Bibele siku na siku. Kutani endla ku hlaya koloko ni vulavisisi lebyi enteke loko swi koteka.

Tindlela To Hambana-hambana To Hlaya Bibele

12. Hi xihi xiyimiso xo hlaya Bibele lexi swirho leswintshwa swa ndyangu wa Bethele ni swichudeni swa Gilead swi nga na xona?

¹² Ku ni tindlela to tala leti ku hlaya Bibele ku nga endliwaka ha tona. Swa pfuna ku yi hlaya ku suka eka Genesa ku ya eka Nhlavutelo. Swirho hinkwaswo swa ndyangu wa Bethele leswi tirhaka eyindlu-nkulu ya misava hinkwayo kumbe eka rin’wana ra marhavi ya Sosayiti swi languteriwa ku hlaya Bibele hinkwayo elembeni ra swona ro sungula ra ntirho wa le Bethele. (Hakanyingi sweswo swi lava ku hlaya tindzima tinharhu ku ya eka ntlhanu, swi ya hi ku leha ka tona, kumbe matluka ya mune ku ya eka ntlhanu hi siku.) Swichudeni swa le Xikolweni xa Bibele xa Gilead xa Watchtower na swona swi fanele ku hlaya Bibele hinkwayo swi nga si thwasa. Ku tshembiwa leswaku leswi swi ta va pfuna ku endla ku hlaya Bibele siku na siku ku va xiphemu xa vutomi bya vona.

13. Hi yihi pakani leyi Timbhoni leta ha ku khuvuriwaka ti khutaziwaka ku yi endla?

¹³ Swa pfuna ni le ka Timbhoni leti ta ha ku khuvuriwaka leswaku ti tiendlela pakani yo hlaya Bibele hinkwayo. Hi 1975, loko jaha rin’wana ra le Furwa ri lunghiselela ku ya eku khuvuriweni, nkulu u ri vutisile loko ri ri ni xiyimiso lexi tiyeke xo hlaya Bibele. Ku sukela hi nkarhi wolowo, ri hlaye Bibele hinkwayo lembe na lembe, hi ntolovelo ri yi hlaya ni mixo ri nga si ya entirhweni. Malunghana ni vuyelo bya kona u ri: “Ndzi tive Yehovha ku antswa. Sweswi ndzi vona swilo hinkwaswo leswi a swi endlaka swi fambisana ni xikongomelo xakwe ni ndlela leyi a angulaka ha yona loko ku va ni swihinga. Ndza swi vona leswaku Yehovha u lulamile naswona tindlela takwe hinkwato i tinene.”

14. (a) I yini lexi nga xa nkoka leswaku u ta sungula xiyimiso lexi nga ta ya emahlweni xa ku hlaya Bibele hi wexe? (b) I yini lexi nga hi pfunaka ku tsundzuka mhaka ya buku yin’wana ni yin’wana ya Bibele loko hi ri karhi hi yi hlaya?

¹⁴ Xana u yi hlayile Bibele hinkwayo? Loko swi nga ri tano, lowu i nkarhi lowunene wo yi sungula. Endla xiyimiso lexi tiyeke, kutani u xi namarhela. Tipimeli leswaku i matluka mangani kumbe i tindzima tingani leti u nga ta ti hlaya siku ha rin’we, kumbe ku kunguhata leswaku i nkarhi wo tanihi kwihi lowu u nga ta wu tirhisela ku endla tano. A hi hinkwavo lava nga ta heta Bibele hi lembe, kambe nchumu wa nkoka i ku hlaya Rito ra Xikwembu nkarhi na nkarhi, u swi endla siku na siku loko swi koteka. Loko u ri karhi u hlaya Bibele, u nga ha kuma leswaku ku tirhisa tibuku tin’wana ta tinhlamuselo swi nga ha va mpfuno eku dzikiseni ka mhaka emianakanyweni ya wena. Loko buku leyi nge Insight on the Scriptures yi kumeka hi ririmi ra wena, kutani u nga si sungula ku hlaya buku yo karhi ya Bibele, pfuxeta mhaka yo koma ya tinhla-nkulu leti nyikeriweke eka Insight.a Ngopfu-ngopfu xiya tinhloko-mhaka leti tsariweke hi marito yo dzwihala emhakeni ya kona. Kumbe u tirhisa nkatsakanyo lowu engeteriweke lowu kumekaka ebukwini leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna.”b

15. (a) Hi swihi swiringanyeto leswi nyikeriweke eka matluka 16 na 17 leswi nga ku pfunaka ku tlangela ku hlaya ka wena Bibele? (b) Ematshan’weni yo hlaya nhlayo yo karhi ya matluka ku hetisisa nawu ntsena, hi yihi mhaka ya nkoka leyi hi faneleke ku yisa nyingiso lowukulu eka yona?

¹⁵ Ku hlaya Bibele hi ku landzelelana swa pfuna, kambe u nga hlayeli ku hetisisa nawu ntsena. U nga hlayi matluka yo karhi siku na siku ku endlela ntsena leswaku u ta kota ku vula leswaku u hlaye Bibele hinkwayo lembe rin’wana ni rin’wana. Hi laha swi kombisiweke ha kona ebokisini leri nge “Swiringanyeto Swo Antswisa Ku Hlaya Ka Wena Bibele,” (matluka 16 na 17) ku ni tindlela to tala leti u nga hlayaka Bibele ha tona ni ku yi tsakela. Ku nga khathariseki ndlela leyi u yi tirhisaka, tiyiseka leswaku u wundla mianakanyo ni mbilu ya wena.

Kuma Mongo Wa Leswi U Swi Hlayaka

16. Ha yini swi ri swa nkoka ku tirhisa nkarhi wo tala hi anakanyisisa hi leswi hi swi hlayaka?

¹⁶ Loko Yesu a dyondzisa vadyondzisiwa vakwe, u kandziyise nkoka wa leswaku va twisisa leswi a a swi vula. Vutlhari bya ku twisisa leswi a swi vulaka a byi nga ri bya nkoka, kambe xa nkoka a ku ri ku kuma “mongo wa swona etimbilwini ta vona” leswaku va ta swi tirhisa evuton’wini bya vona. (Matewu 13:14, 15, 19, 23, NW) Leswi nga swa nkoka emahlweni ka Xikwembu hi leswi munhu a nga xiswona endzeni, naswona leswi swi yimeriwa hi mbilu. (1 Samuwele 16:7; Swivuriso 4:23) Xisweswo, ku engetela eku tiyisekeni ka hina ka leswaku ha swi twisisa leswi tindzimana ta Bibele ti swi vulaka, hi fanele hi anakanyisisa ha tona, hi vona ni ndlela leyi swi tirhaka ha yona evuton’wini bya hina.—Pisalema 48:9; 1 Timotiya 4:15.

17. Hi tihi tindlela tin’wana leti ha tona hi nga ha anakanyisisaka hi leswi hi swi hlayaka eMatsalweni?

¹⁷ Tikarhatele ku twisisa tinhla-nkulu ta misinya ya milawu etimhakeni ta Bibele leswaku u ta ti tirhisa eswiyin’weni leswi u langutanaka na swona. (Ringanisa Matewu 9:13; 19:3-6.) Loko u ri karhi u hlaya ni ku anakanyisisa hi timfanelo leti hlamarisaka ta Yehovha, tirhisa nkarhi wolowo ku tiyisa vuxaka bya wena na yena, ku tiakela endzeni ka wena langutelo leri tiyeke ra ku tinyiketela eka Xikwembu. Loko u hlaya timhaka ta xikongomelo xa Yehovha, ehleketa hi leswi u nga swi endlaka leswaku u endla hi ku pfumelelana na swona. Loko u hlaya xitsundzuxo lexi kongomeke, ematshan’weni yo tibyela ntsena leswaku, ‘sweswo ndza swi tiva,’ tivutise u ku, ‘Xana ndzi endla leswi xi swi vulaka?’ Loko swi ri tano, tivutise, ‘xana ndzi nga swi endlisa ku yini “hi laha ku engetelekeke?”’ (1 Vatesalonika 4:1, NW) Loko u ri karhi u dyondza swilaveko swa Xikwembu, nakambe xiya swikombiso swa xiviri swa le Bibeleni swa lava va hanyeke hi ku landza swilaveko leswi ni lava va nga swi landzelangiki. Kambisisa xivangelo xa ku va va landzele ndlela yoleyo ni mimbuyelo ya kona. (Varhoma 15:4; 1 Vakorinto 10:11) Loko u hlaya hi ta vutomi bya Yesu Kreste, tsundzuka leswaku Yesu hi yena loyi Yehovha a n’wi nyikeke vuhosi ehenhla ka misava hinkwayo; tirhisa nkarhi wolowo ku tiyisa ku navela ka wena misava leyintshwa ya Xikwembu. Nakambe, kambisisa ndlela leyi u nga tekelelaka N’wana wa Xikwembu hi xitalo ha yona.—1 Petro 2:21.

18. Xana hi nga ku ringanisela njhani ku hlaya ka Bibele ni ku hlaya rungula leri nyikeriwaka hi ku tirhisa “nandza lowo tshembeka, wa vutlharhi”?

¹⁸ Kavula, ku hlaya Bibele a ku fanelanga ku siva ku tirhisa ka wena rungula lerinene ngopfu leri lunghiseleriweke hi ku tirhisa “nandza la tshembekaka, wo tlhariha.” Sweswo na swona i xiphemu xa lunghiselelo ra Yehovha—ra risima swinene. (Matewu 24:45-47) Tiyiseka leswaku ku hlaya Rito ra Xikwembu nkarhi na nkarhi hi roxe i ka nkoka evuton’wini bya wena. Loko swi koteka, “HLAYA RITO RA XIKWEMBU BIBELE YO KWETSIMA SIKU NA SIKU.”

[Tinhlamuselo ta le hansi]

Xana U Nga Hlamula Njhani?

◻ Ha yini swi pfuna ku hlaya Bibele siku na siku?

◻ Ha yini hi fanele ku hlaya Bibele hi ku phindha-phindha?

◻ Hi wihi nkarhi lowunene wo hlaya Bibele siku na siku exiyimisweni xa wena?

◻ I yini lexi nga engetelaka swo karhi exiyimisweni xa wena loko u ri karhi u hlaya Bibele hi ku phindha-phindha?

◻ Ha yini swi ri swa nkoka ku anakanyisisa hi leswi u swi hlayaka?

[Bokisi leri nga eka tluka 16, 17]

Swiringanyeto Swo Antswisa Ku Hlaya Ka Wena Bibele

(1) Vanhu vo tala va hlaya tibuku ta Bibele hi ku ya hi nxaxamelo lowu hi ntolovelo ti kandziyisiweke ha wona, ku suka eka Genesa ku ya eka Nhlavutelo. Nakambe u nga ha ti hlaya hi ku ya hi nxaxamelo lowu a a ti tsariwe ha wona eku sunguleni. Tsundzuka leswaku Bibele i nhlengeleto wa tibuku leti huhuteriweke ta 66, i layiburari ya Xikwembu. Loko u lava ku cinca-cinca, u nga sungula u hlaya tibuku leti vulavulaka hi matimu ti ri toxe, ivi u ta eka leti vulavulaka swinene hi vuprofeta, kutani ku landzela leti ti nga mapapila ya ndzayo, ematshan’weni yo landzelela nxaxamelo wa matluka. Hlayisa leswi u swi hlayeke, u tiyiseka leswaku u hlaya Bibele hinkwayo.

(2) Endzhaku ko hlaya xiphemu xo karhi xa Matsalwa, tivutise leswaku xi ku byela yini mayelana na Yehovha, xikongomelo xakwe, ndlela yakwe yo endla swilo; ndlela leyi swi faneleke swi khumba vutomi bya wena ha yona; ni leswaku u nga xi tirhisa njhani ku pfuna munhu un’wana.

(3) Hi ku kongomisiwa hi chati leyi nge “Swiendlakalo Leswikulu Swa Vutomi Bya Yesu Bya Le Misaveni,” leyi yi humesiweke ehansi ka xihloko lexi nge “Yesu Kreste” eka buku leyi nge Insight on the Scriptures (ni le ka buku leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna”), hlaya swiendlakalo leswi fambisanaka ni xiphemu xin’wana ni xin’wana xa Tievhangheli leti, hi ku landzelelana ka swona. Engetela sweswo hi ku tlhela u kamba swiphemu leswi fanaka ebukwini leyi nge Nghwazi Leyi Tshameke Yi Hanya.

(4) Loko u hlaya mhaka ya vutomi ni vutirheli bya Pawulo eka Mintirho ya Vaapostola, tlhela u hlaya mapapila lama huhuteriweke lama fambisanaka ni sweswo. Xisweswo, loko ku boxiwa miti ni tindhawu to hambana-hambana leti Pawulo a chumayeleke eka tona, yimanyana, kutani u hlaya mapapila lawa a ma tsaleleke Vakreste-kulobye etindhawini teto. Nakambe swa pfuna ku landzelerisa laha Pawulo a fambeke kona emepeni, tanihi lowu wu kumekaka endzeni ka xifunengeto xa le ndzhaku xa New World Translation.

(5) Loko u ri karhi u hlaya Eksoda ku ya eka Deteronoma, hlaya papila leri yaka eka Vaheveru ku kuma tinhlamuselo leti engetelekeke ta mintila ya vuprofeta. Ehansi ka rito “Nawu” eka Insight on the Scriptures, vona chati leyi nge “Swivumbeko Swin’wana Swa Ntwanano Wa Nawu.”

(6) Loko u ri karhi u hlaya tibuku ta vuprofeta, tinyike nkarhi wo pfuxeta swiendlakalo swa matimu leswi yelanaka eBibeleni. Hi xikombiso, loko u hlaya buku ya Esaya, kambisisa leswi swi vuriweke kun’wana mayelana na tihosi Uziya, Yonatani, Akazi na Hezekiya, lava boxiwaka eka Esaya 1:1. (2 Tihosi, tindzima 15-20; 2 Tikronika, tindzima 26-32) Kumbe loko u hlaya Hagayi na Zakariya, tinyike nkarhi wo kambisisa leswi kumekaka eka buku ya Ezra.

(7) Hlawula buku ya Bibele, u hlaya xiyenge xo karhi xa yona (kumbe ndzima yin’we), kutani u endla vulavisisi, hi ku tirhisa Watch Tower Publications Index kumbe Watchtower Library leyi nga hoxiwa eka khompyutara, loko yi kumeka hi ririmi ra wena. Tirhisa rungula leri evuton’wini bya wena. Ri tirhise etinkulumeni ni le vutirhelini bya nsimu. Kutani hundzela eka xiyenge xin’wana.

(8) Loko ku ri ni nkandziyiso wun’wana wa Watch Tower lowu nyikelaka nhlamuselo ya buku yo karhi ya Bibele kumbe exiyengeni xo karhi xa yona, hamba u yi kamba loko u ri karhi u hlaya xiphemu xexo xa Bibele. (Hi xikombiso: eka Risimu ra Tinsimu, The Watchtower ya December 1, 1957, matluka 720-34; malunghana na Ezekiyele, “The Nations Shall Know That I Am Jehovah”—How?; malunghana na Daniyele, “Your Will Be Done on Earth” kumbe Our Incoming World Government—God’s Kingdom; malunghana na Hagayi na Zakariya, Paradise Restored to Mankind—By Theocracy!; malunghana na Nhlavutelo, Nhlavutelo—Ku Chaputa Ka Yona Loku Hlamarisaka Ku Tshinele!)

(9) Loko u ri karhi u hlaya, pfula ni matsalwa man’wana lama kombisiweke etlhelo. Xiya tindzimana ta 320 leti humaka eMatsalweni ya Xiheveru, leti tshahiweke hi ku kongoma ti huma eka Matsalwa ya Vukreste ya Xigriki ni tindzimana to tala leti ku kombeteriwaka eka tona, swin’we ni ndlela leyi ti tirhaka ha yona. Matsalwa lama kombisiweke etlhelo, ma kombetela eka ndlela leyi vuprofeta lebyi rhekodiweke eBibeleni byi hetisekeke ha yona, ma nyikela vuxokoxoko bya matimu ya vanhu ni bya ntivo-mbango ni ku fananisa mhaka leswi nga ku endlaka u twisisa marito lawa kumbexana u ma kumaka ma tika ku ma twisisa.

(10) Hi ku tirhisa Nkandziyiso lowu nga ni Tinhlamuselo wa New World Translation, loko wu kumeka hi ririmi ra wena, languta tinhlamuselo ta le hansi ni swihloko swa swikombo leswi yelanaka ni leswi u swi hlayaka. Leswi swi kombisa swivangelo swa vuhundzuluxeri lebyi tirhisiweke ni tindlela tin’wana leti marito ya nkoka ma nga hundzuluxeriwaka ha tona. Nkarhi wun’wana u nga lava ku fananisa vuhundzuluxeri bya tindzimana tin’wana eka vuhundzuluxeri byin’wana bya Bibele.

(11) Endzhaku ko hlaya ndzima yin’wana na yin’wana, tsala rungula ro koma swinene ra dyondzo-nkulu ya ndzima yoleyo. Yi tirhise tanihi xisekelo xa mpfuxeto endzhakunyana ni xo anakanyisisa ha xona.

(12) Loko u ri karhi u hlaya Bibele, fungha matsalwa lama u ma hlawuleke lawa u lavaka ku ma tsundzuka swinene, kumbe u ma tsala emakhadini, u ma veka laha u nga ta ma vona masiku hinkwawo. Ma nhlokohate; u anakanyisisa ha wona; u ma tirhisa. U nga ringeti ku nhlokohata yo tala hi nkarhi wun’we, nkarhi wun’wana u nga ha nhlokohata rin’we ntsena kumbe mambirhi vhiki rin’wana na rin’wana; kutani u hlawula yo tala loko u tlhela u hlaya eBibeleni.

[Swifaniso leswi nga eka tluka 15]

Xana wa yi hlaya Bibele kumbe ku yingisa tikhasete ta yona siku na siku?