Tsakela Rito Ra Xikwembu

WA TSAKA munhu la “tsakela[ka] nawu wa Yehovha.” Munhu wo tano u hlaya Rito ra Xikwembu “hi rito ra le hansi vusiku ni nhlikanhi.” (Ps. 1:1, 2) Xana u na wona ntsako wolowo? Xana u nga wu engetela njhani ntsako lowu Rito ra Xikwembu ri ku nyikaka wona?

Yingisa Loko Yehovha A Vulavula

U nga hlayi marito ntsena. Ringeta ku vona swiyimo leswi u hlayaka ha swona hi mahlo ya mianakanyo. Twana mpfumawulo wa marito ya lava ku vulavuriwaka ha vona. Loko u ri karhi u hlaya tindzima to sungula ta Bibele, twana Yehovha a ri karhi a paluxa leswi swi endliwaka leswaku misava yi fanela vanhu, hi ku tlhandlamana ka swona. Yingisa loko a ri karhi a byela N’wana wakwe, Mutirhi wa Vutshila, leswaku se i nkarhi wa ku vumba vanhu vo sungula. Anakanya hi xivono lexi: Adamu na Evha va xandzuka, Xikwembu xa va avanyisa naswona endzhaku xa va hlongola eParadeyisini. (Genesa, tindz. 1-3) Twana ku chavisa loku veke kona loko u hlaya leswaku rito ro huma ematilweni ri vule leswaku Yesu Kreste i N’wana wa Xikwembu, la rhandzekaka, loyi Xikwembu xi n’wi rhumeke leswaku a ta fela vanhu. (Mat. 3:16, 17) Ringeta ku vona ndlela leyi muapostola Yohane a titweke ha yona loko a twa Yehovha a ku: “Waswivo, ndzi endla swilo hinkwaswo swi va leswintshwa.” (Nhlav. 21:5) Ina, ku hlaya Rito ra Xikwembu hi ndlela leyi i nchumu lowu tsakisaka swinene!

Yana emahlweni u hlaya matsalwa lama huhuteriweke, kutani u ta kuma leswaku Yehovha i munhu la chavisekaka ni la xiximekaka. U ta n’wi rhandza swinene Yena loyi a hi rhandzaka, la hi kombisaka tintswalo, la hi pfunaka loko hi ringeta ku endla ku rhandza ka yena hi ku titsongahata, ni la hi kombaka ndlela yo humelela eka hinkwaswo leswi hi swi endlaka.—Yox. 1:8; Ps. 8:1; Esa. 41:10.

Loko u ya u heta nkarhi wo tala u hlaya Bibele, u ta ya u eneriseka swinene, u ta va ni vutivi lebyi engetelekeke bya leswi Xikwembu xi swi languteleke eka wena. Kambe ntsako a wu nge heleli kwalaho ntsena. Loko ku hlaya ka wena ku ku pfuna leswaku u kota ku langutana ni swiphiqo hi ndlela ya vutlhari, u ta titwa ku fana ni mupisalema loyi a nga te: “Switsundzuxo swa wena swa hlamarisa. Hi yona mhaka leyi moya-xiviri wa mina wu swi hlayiseke.” (Ps. 119:129) Na wena u ta tsaka, loko eMatsalweni, u kuma misinya ya milawu leyi ololoxaka mianakanyo ya wena ni ku navela ka wena, leswaku swi fambisana ni ku rhandza ka Xikwembu.—Esa. 55:8, 9.

Bibele yi hi nyika nkongomiso wa mahanyelo, lowu hi sirhelelaka leswaku hi nga vaviseki ni lowu hi kombaka ndlela leyi nga yona. Loko hi yi hlaya, hi kota ku vona leswaku Yehovha i Tatana la tivaka swiphiqo leswi swi nga vaka kona loko hi pfumela ku lawuriwa hi ku navela ka nyama leyi nga hetisekangiki. A nga lavi leswaku hi langutana ni vuyelo lebyi vavaka, lebyi vaka kona loko munhu a bakanya mimpimanyeto ya yena leyi tlakukeke ya mahanyelo. Wa hi khathalela naswona u lava leswaku hi hanya hi ndlela yo antswa swinene. Ku hlaya ka hina Rito rakwe swi hi pfuna leswaku hi wu vona kahle nkateko lowu hi nga na wona wa ku va ni Xikwembu tlhelo Tatana, ematilweni.

Hlaya Bibele Siku Ni Siku

Loko a vulavula hi munhu la hlayaka Rito ra Xikwembu siku ni siku mupisalema u te: “Hinkwaswo leswi a swi endlaka swi ta humelela.” (Ps. 1:3) Ina, hambileswi hi nga hetisekangiki, hambileswi hi hanyaka emafambiselweni ya swilo, yo biha, ya Sathana, naswona ku nga khathariseki leswaku Diyavulosi u endla yini na yini leswaku a hi bvanyangeta, ku hlaya Rito ra Xikwembu nkarhi na nkarhi ni ku tirhisa leswi ri swi tameleke, swi ta hi pfuna leswaku hi humelela eka hinkwaswo leswi katsaka vuxaka bya hina na Yehovha.

Leswi hi tshikileriwaka hi mafambiselo lawa ya khale, ku nghenisa mianakanyo ya Muvumbi hambi ku ri swa xinkarhana siku ni siku, swi nga hi nyika matimba. Van’wana lava a va khotsiwile hikwalaho ka ripfumelo ra vona a va hlaya tindzimana ti nga ri tingani leti a va tshuka va tikuma eka swihloko leswi nga eka maphepha-hungu. A va tsema tindzimana leti, va tinhlokohata, kutani va anakanyisisa ha tona. Yehovha u ma katekisile matshalatshala ya vona hikuva va endle leswi a swi koteka leswaku va nghenisa vutivi byo huma eRitweni ra Xikwembu. (Mat. 5:3) Kambe, vunyingi bya hina hi ni ntshunxeko wukulu ku tlula wa vona. Hi nga tshuki hi anakanya leswaku ku hlaya ndzimana yo karhi ya Bibele hi ku hatlisa, kan’we hi siku, swi ta endla singita ro karhi eka hina. Kambe, hi ta kuma mikateko loko ho lulamisa xiyimiso xa hina leswaku hi kuma nkarhi wo hlaya xiyenge xo karhi xa Bibele siku ni siku, hi anakanyisisa ha xona ni ku xi tirhisa evuton’wini bya hina.

Xiyimiso xa hina lexinene xi nga ha kavanyeteka. Loko sweswo swi endleka, hi fanele hi rhangisa swilo leswi hakunene swi nga swa nkoka. Hi xikombiso, a hi nge heti siku rin’we kumbe mambirhi hi nga nwanga mati, hi vomu. Kutani ke, ku nga khathariseki leswaku ku humelela yini evuton’wini bya hina bya siku ni siku, hi fanele hi tinyika nkarhi wo tiphyuphyisa hi mati ya ntiyiso.—Mint. 17:11.

Ri Hlaye Hinkwaro Rito Ra Xikwembu

Xana wena hi wexe se u yi hlaye hinkwayo Bibele? Van’wana va hela matimba loko va anakanya hi ku hlaya ku sukela eka Genesa ku ya fika eka Nhlavutelo. Hikwalaho, vo tala lava a va lava ku hlaya Bibele hinkwayo, va sungule hi ku hlaya Matsalwa ya Vukreste ya Xigriki. Hikwalaho ka yini? Kumbexana hi leswi a swi va olovela ku hatla va vona ndlela leyi tibuku leti ta Bibele ti tirhaka ha yona eka vona tanihi vanhu lava lavaka ku famba eminkondzweni ya Kreste. Kumbexana hi leswi Matsalwa ya Vukreste ya Xigriki ma vonakaka onge a ma lehanga ngopfu—yo hundzanyana kotara ya Bibele. Kambe endzhaku ko heta tibuku leti ta 27, va sungule ku hlaya tibuku ta 39 ta Matsalwa ya Xiheveru naswona va ti tsakerile swinene. Loko va heta ku hlaya Matsalwa ya Xiheveru, ku hlaya Bibele nkarhi na nkarhi ku va se ku va nghene engatini, kutani va ye emahlweni, va hlaya Matsalwa ya Vukreste ya Xigriki ra vumbirhi naswona a va ha tlhelanga va tshika ku hlaya. Onge na wena u nga fana na vona, u endla ku hlaya Rito ra Xikwembu siku ni siku ku va mukhuva evuton’wini bya wena hinkwabyo.

Xana endyangwini wa ka n’wina kumbe evandlheni ra ka n’wina ku ni loyi a nga swi kotiki ku hlaya? Ha yini u nga kombeli ku n’wi hlayela Bibele nkarhi na nkarhi? Ku ta vuyeriwa wena na yena u ta vuyeriwa loko a ri karhi a anakanyisisa hi leswi a swi twaka kutani a swi tirhisa evuton’wini byakwe.—Nhlav. 1:3.

Hi ku famba ka nkarhi u nga ha navela ku endla leswi engetelekeke malunghana ni ku hlaya ka wena Bibele. Swin’wana swa swona swi nga kurisa ku tlangela ka wena ndlela leyi swiyenge swo hambana-hambana swa Bibele swi yelanaka ha yona. Loko Bibele ya wena yi ri ni swikombo, swikombo leswi swi nga ku yisa etimhakeni ta matimu ni tindzimana leti yelanaka. Swi nga ha ku pfuna leswaku u twisisa swiyimo leswi vangeke leswaku ku tsariwa tipisalema to hambana-hambana swin’we ni mapapila lama tsariweke hi vaapostola va Yesu Kreste. Buku leyi nge Insight on the Scriptures yi tamele rungula ro tala leri engetelekeke malunghana ni vanhu, tindhawu ni timfanelo leti boxiweke eBibeleni. Tichati ti kombisa ku hetiseka ka vuprofeta bya Bibele, ti kombisa tihosi ni vaprofeta lava hanyeke hi nkarhi wolowo, ni ku ringanyeta nkarhi lowu swiendlakalo swa Bibele swi nga ha vaka swi humelele ha wona.

Loko u ri karhi u anakanyisisa hi leswi u swi dyondzaka, u ta kota ku twisisa leswaku ha yini ku va ni swiyimo swo karhi exikarhi ka vanhu va Xikwembu. U ta tlhela u kuma ni leswaku ha yini Yehovha a khome vanhu vakwe hi ndlela leyi a endleke ha yona. U ta swi vona leswaku Yehovha u yi languta njhani mintirho ya tihulumendhe, ya vanhu ni ya munhu ha un’we. Leswi swi ta ku pfuna leswaku u yi twisisa swinene ndlela leyi a anakanyaka ha yona.

Matimu ya Bibele ma ta sungula ku ku tsakisa loko hi mahlo ya mianakanyo u ringeta ku vona ndhawu leyi swiendlakalo swi humeleleke eka yona. Mimepe ya tindhawu ta minkarhi ya Bibele, yi kombisa mbango ni mpfhuka lowu nga kona exikarhi ka tindhawu ta kona. Hi xikombiso, xana Vaisrayele va nga va va ri tsemakanye hi kwihi Lwandle ro Tshwuka? Tiko leri Tshembisiweke a ri ri mpimo wo tanihi kwihi? Xana Yesu u fambe ku fikela kwihi loko a ri karhi a hetisisa vutirheli byakwe bya laha misaveni? Xana muapostola Pawulo u vone yini eka maendzo yakwe ya vurhumiwa? Mimepe ni tinhlamuselo ta tindhawu swi ta ku nyika vuxokoxoko lebyi nga ta endla ku hlaya ka wena ku tsakisa. U nga yi kuma kwihi mimepe ya tindhawu ta le Bibeleni? Yin’wana yi kona eka Vuhundzuluxeri Bya Misava Leyintshwa Bya Matsalwa Yo Kwetsima. Tivholumo ta Insight ti ni mimepe ya kwalomu ka 70, naswona ku ni xikombo xa mimepe emakumu ka vholumo yo sungula. Tirhisa Watch Tower Publications Index leswaku u kuma laha mimepe yin’wana yi nga kona. Loko u nga ri na tona tibuku leti, tirhisa mimepe leyi humesiwaka eka Xihondzo xo Rindza leswaku yi ku pfuna loko u hlaya Bibele.

EMatsalweni ya Xiheveru, Hosi Davhida, u dzunise Yehovha a ku: “Miehleketo ya wena i ya risima swinene eka mina! Oho Xikwembu, hinkwaswo ka swona swi tele swinene!” (Ps. 139:17) EMatsalweni ya Vukreste ya Xigriki, muapostola Pawulo u dzunise Yehovha hikuva U “voninge timbilu ta hina leswaku [a] ti voningela hi vutivi lebyi vangamaka malunghana ni Xikwembu, hi xikandza xa Kreste.” (2 Kor. 4:6) Davhida na Pawulo a va hanyanga hi nkarhi wun’we; kambe, havambirhi a va ri tsakela Rito ra Xikwembu. Na wena u nga ri tsakela loko wo tinyika nkarhi wa ku hlaya hinkwaswo leswi Yehovha a ku nyikeke swona hi ku tirhisa Rito rakwe leri huhuteriweke.