Ku Ya Tirha eSwihlaleni Swa Pacific!
A KU RI ni nyanyuko lowukulu ekamareni ro rindzela eka rona etimbaleni letikulu ta swihaha-mpfhuka ta Brisbane na Sydney, eAustralia, laha a ku ri ni vanhu lava endzelaka ematikweni man’wana. Ntlawa wa vanhu va 46 a wu teka riendzo ro ya etikweni ro hisa ngopfu ra Samoa leswaku wu ta hlangana ni van’wana va 39 lava humaka eNew Zealand, Hawaii na le United States. Mindzhwalo ya vona a yi nga tolovelekanga—a yi katsa switirho swo kota tihamele, tisaha ni michini ya ku boxa mimbhovo—a yi nga ri swilo leswi hi ntolovelo munhu a swi tekaka loko a teka riendzo ro ya exihlaleni xo xonga xa Pacific. Kambe, a swi fanerile hikuva xikongomelo xa riendzo ra vona a xi hlawulekile.
Va tihakelele riendzo rero leswaku va ya heta mavhiki mambirhi va tirha ntirho wa ku tirhandzela eka tsima ro aka leri kongomisiwaka hi Hofisi ya Vunjhiniyara ya Xifundzha, leyi nga ehofisini ya rhavi ra Timbhoni ta Yehovha eAustralia. Tsima rero, leri hakeleriwaka hi minyikelo ya ku tirhandzela ri katsa ku akiwa ka Tiholo ta Mfumo, Tiholo ta Tinhlengeletano, makaya ya varhumiwa ni marhavi kumbe miako leyi ku hundzuluxeriwaka eka yona, swi akeriwa mavandlha lama kulaka hi ku hatlisa ya Timbhoni ta Yehovha eswihlaleni swa Pacific. A hi tivaneni ni van’wana va vatirhi lava, lava hlanganyeleke ematsimeni ya ku aka Tiholo ta Mfumo ematikweni ya rikwavo.
Max, la nga mufuleri wa tindlu u huma eCowra le New South Wales, eAustralia. U tekile naswona u ni ntlhanu wa vana. Arnold u huma eHawaii. Yena ni nkatakwe va ni vana vambirhi naswona yena i phayona kumbe mutirheli wa nkarhi hinkwawo. Ku fana na Max, Arnold i nkulu evandlheni ra ka vona. Swi le rivaleni leswaku vavanuna lava—ku fana ni vo tala etsimeni leri—a hi vatirheli va ku tirhandzela hi leswi va pfumalaka xo xi endla. Ematshan’weni ya sweswo, vona ni mindyangu ya vona va swi xiya leswaku ku ni xilaveko kutani va lava ku endla hinkwaswo leswi nga emandleni ya vona leswaku va pfuna.
Vatirhi Va Tinxaka To Hambana-hambana Va Endla Ntirho Wa Nkoka
Laha vutshila ni swandla swa vona a swi laveka kona a ku ri eTuvalu, ndhawu ya le Pacific leyi nga ni vanhu va kwalomu ka 10 500, leyi kumekaka entlaweni wa swihlala swa kaye swa tikorale leswi nga ekusuhi na equator ni n’walungu-vupela-dyambu bya Samoa. Xihlala ha xin’we xa tikorale xi aname kwalomu ka tikhilomitara timbirhi na hafu hi matlhelo hinkwawo. Hi 1994, Timbhoni ta 61 ta kwalaho a ti ri ni xilaveko xa xihatla xa Holo ya Mfumo leyintshwa ni hofisi leyikulunyana ya ku hundzuluxela eka yona.
Endhawini leyi yi hisaka ya Pacific, miako yi fanele yi pulaniwa ni ku akiwa leswaku yi nga hahluriwi hi swidzedze ni swihuhuri swa matimba, leswi nga tshamelo maxelo endhawini leyi. Kambe swihlala leswi a swi na nhundzu yo tala yo aka, leyi nga kotaka ku aka miako yo tano. Xi tlhantlhiwe njhani xiphiqo xexo? Nhundzu hinkwayo—ku sukela eka swo fulela, timhandzi ta lwangu ku ya eka nhundzu ya le ndzeni ni makhetenisi, timbita ta swihambukelo ni tixawara, hambi ku ri swikurufu ni swipikiri—yi rhumeriwe hi mabokisi ku suka eAustralia.
Loko nhundzu leyi yi nga si fika, ntlawa wa vanhu va nga ri vangani, wu rhangile wu ya lunghiselela laha ku nga ta akiwa kona wu tlhela wu endla masungulo ya miako. Hiloko vatirhi va matiko hinkwavo va fika va aka miako yoleyo, va yi penda ni ku hoxa nhundzu ya yona.
Ntirho lowu hinkwawo wa le Tuvalu wu tlhontlhe rivengo ra mufundhisi wa kwalaho loyi a tiviseke eka xiya-ni-moya leswaku Timbhoni ti aka “Xihondzo xa Babele”! Kambe, ntiyiso a wu ri wihi? Graeme, mutirhi wa ku tirhandzela u ri: “Loko vaaki va Xihondzo xa Babele va vona leswaku a va ha twanani hikwalaho ka leswi Xikwembu xi pfulunganyeke ririmi ra vona, va boheke ku tshika ku aka kutani va siya xihondzo xexo xi nga helanga.” (Genesa 11:1-9) “A swi tano loko u tirhela Yehovha Xikwembu. Hambileswi hi nga vulavuliki ririmi rin’we naswona hi ri va mindhavuko yo hambana-hambana, minkarhi hinkwayo miako ya hetiwa.” Swi ve tano ni hi lowu—wu hetiwe hi mavhiki mambirhi ntsena. Kunene, vanhu va 163 ku katsa ni nsati wa holobye-nkulu, va ve kona loko wu nyiketeriwa.
Loko Doug, mulanguteri wa ntirho lowu, a anakanya hi leswi endlekeke, u ri: “A swi tsakisa ku tirha ni vatirhi va ku tirhandzela lava humaka ematikweni man’wana. Hi endla swilo hi tindlela to hambana-hambana, mavulavulelo ya hina a ma fani ni tindlela leti hi pimaka swilo ha yona ti hambanile, kambe ku hava ni xin’we xa swilo leswi lexi vangeke swiphiqo.” Leswi sweswi se a hlanganyeleke eku akiweni ka miako yo tano yo hambana-hambana, u engetela a ku: “Leswi swi kandziyisa emianakanyweni ya mina leswaku hi mpfuno wa Yehovha, vanhu vakwe va nga aka muako kun’wana ni kun’wana emisaveni leyi, ku nga khathariseki leswaku ndhawu yoleyo yi kumeka kwihi kumbe yi nonon’hwa njhani. I ntiyiso leswaku hi ni vavanuna vo tala lava nga ni vutshila, kambe i moya wa Yehovha lowu endlaka leswaku hi humelela.”
Moya wa Xikwembu wu tlhele wu susumeta mindyangu ya Timbhoni exihlaleni lexi leswaku yi phamela vatirhi ni ku va nyika ndhawu yo tshama, hambileswi a swi nga olovi eka yin’wana. Kutani swi tlangeriwe ngopfu hi lava va kombiweke moya wolowo wa ku amukela vaendzi. Ken, la humaka eMelbourne, le Australia, u tshame a tirha emuakweni lowu fanaka ni lowu exihlaleni xa French Polynesia. U ri: “Hi te hi ri vatirhi kambe hi khomiwe ku fana ni tihosi.” Laha swi kotekaka kona, Timbhoni ta kwalaho a ti pfuneta entirhweni wo aka. Le Solomon Islands, vavasati a va pfuva khonkhiriti—hi mavoko. Vavanuna ni vavasati va 100 va khandziye tintshava to tsakama va ya landza timhandzi to tlula 40 wa tithani. Vantshwa na vona va hoxe xandla. Mutirhi un’wana wa le New Zealand u ri: “Ndza ha tsundzuka makwerhu la ha riki muntshwa wa le xihlaleni, la rhwaleke masaka mambirhi kumbe manharhu ya semendhe hi nkarhi wun’we. Nakambe a a tlhava foxolo siku hinkwaro hambi ku hisa kumbe ku na mpfula.”
Ku pfuneta ka Timbhoni ta laha ku akiwaka kona, swa vuyerisa hi tlhelo rin’wana. Rhavi ra Sosayiti ya Watch Tower eSamoa ra vika: “Vamakwerhu va la xihlaleni va dyondze mintirho leyi va nga yi tirhisaka loko va aka Tiholo ta Mfumo ni loko va lunghisa miako leyi hahluriweke hi xihuhuri. Swi nga tlhela swi va pfuna ku kuma mali ya ku tihanyisa etikweni leri, laha vo tala swi va tikelaka ku endla tano.”
Tsima Ra Ku Aka Ri Nyikela Vumbhoni Lebyinene
Colin a a ri eHoniara naswona u vone loko ku ri karhi ku akiwa Holo ya Tinhlengeletano ya le Solomon Islands. Hikwalaho ka ku nyanyuka, u tsalele rhavi ra kwalaho ra Sosayiti ya Watch Tower hi Xinghezi xa le Solomon Islands a ku: “Hinkwavo va ni vun’we, a nga kona la hlundzukeke naswona i ndyangu wun’we.” Hi ku hatlisa endzhaku ka loko a tlhelele eximutanini lexi a humaka eka xona xa Aruligo, lexi nga mpfhuka wa tikhilomitara ta 40, yena ni ndyangu wakwe va tiakele Holo ya vona ya Mfumo. Hiloko va tlhela va tsalela hofisi ya rhavi va ku: “Holo ya hina ya Mfumo, ku katsa ni xiteji se swi herile, xana minhlangano yi nga khomeriwa laha?” A ka ha yima-yimiwanga kutani vanhu vo tlula 60 va va kona minkarhi hinkwayo.
Mutsundzuxi wa Nhlangano wa le Yuropa u vone muako lowu akiweke eTuvalu. U byele un’wana wa vatirhi a ku: “Ndza tshemba leswaku un’wana ni un’wana se u mi byerile leswaku leri i singita, na mina ndzi ri tano!” Wansati la tirhaka ku hundzisa tinqingho u vutise un’wana wa vatirhi va ku tirhandzela a ku: “Swi tisa ku yini leswaku hinkwenu mi va lava tsakeke swonghasi? Phela ka hisa laha!” A va si tshama va vona Vukreste byi tirhisiwa hi ndlela leyi ya xiviri ni ya ku tinyiketela ku pfuna van’wana.
Ku Tinyiketela Handle Ko Tisola
Eka 2 Vakorinto 9:6, Bibele yi ri: “Loyi a byalaka hi xitalo, u ta tlhela a tshovela hi xitalo.” Hi ku pfuna Timbhoni-kulobye ta le Pacific, vatirhi lava, mindyangu ya vona ni mavandlha lawa va humaka eka wona va hambeta va byala hi xitalo. Ross, la nga nkulu eKincumber, ekusuhi na le Sydney u ri: “Vandlha leri ndzi hlanganyelaka eka rona ri nyikele hi mali leyi a yi ta pfuna swinene eku hakeleleni ka riendzo ra mina ra xihaha-mpfhuka, kasi sivara, loyi na yena a fambeke na hina, u engetele hi $500 [R1 900].” Un’wana wa vatirhi u hakelele riendzo rakwe hi ku xavisa movha wakwe. Kasi un’wana u xavise xiphemu xa nsimu yakwe. Kevin a a kayivela hi R3 500, kutani u endle xiboho xa ku xavisa matuva yakwe ya 16, lama nga ni malembe mambirhi hi vukhale. Hi ku pfuniwa hi munghana wakwe, u swi kotile ku kuma loyi a ma xaveke hi R3 500 leyi a yi laveka!
Danny na Cheryl va vutisiwile: “Xana a swi fanerile ku lahlekeriwa hi mali ya xihaha-mpfhuka ni mali yin’wana, leyi hinkwayo a yi ringana $6,000 [R23- 000]?” Va hlamule va ku: “Ina! Hambiloko a hi yi hakele kambirhi mali yoleyo, a swi ta va swi fanerile swinene.” Alan, la humaka eNelson, le New Zealand, u engete a ku: “Mali leyi ndzi yeke eTuvalu ha yona, a ndzi ta ya eYuropa yi tlhela yi sala. Kambe, xana a ndzi ta yi kuma mikateko leyi ndzi yi kumeke, kumbe xana a ndzi ta va kuma vanghana vo tala swonghasi va mindhavuko yo hambana-hambana, kumbe xana a ndzi ta swi kota ku endlela van’wana swilo ematshan’weni ya ku tikhorisa mina n’wini? Doo! Nilokoswiritano, leswi ndzi swi nyikeke vamakwerhu va le xihlaleni, a swi ringanisiwi ni leswi va ndzi nyikeke swona, va ndzi tlherisele swo tala.”
Xin’wana lexi endleke leswaku tsima leri ri humelela i ku seketeriwa hi swirho swa ndyangu. Hambileswi vavasati van’wana va swi kotaka ku famba ni vanuna va vona naswona va pfuna emuakweni, van’wana va ni vana lava nghenaka xikolo kumbe va ni swilo swin’wana swa ndyangu leswi va faneleke va swi khathalela. Clay u ri: “Ku tiyimisela ka nkatanga ku sala a khathalela vana ni kaya loko ndza ha fambile, a ku ri ku tinyikela loku tlulaka loku ndzi ku endleke.” Kunene, vavanuna hinkwavo lava nga swi kotangiki ku famba ni vasati va vona, va nga ku “Amen” hi mbilu hinkwayo eka marito wolawo!
Ku sukela loko ku hetiwe miako ya le Tuvalu, vatirhi va ku tirhandzela va ake Tiholo ta Mfumo, Tiholo ta Tinhlengeletano, makaya ya varhumiwa ni tihofisi ta ku hundzuluxela eka tona eFiji, eTonga, ePapua New Guinea, eNew Caledonia ni le tindhawini tin’wana. Ka ha kunguhatiwa miako yo tala ku katsa ni leyi ka ha faneleke ku kumiwa ndhawu yo yi aka eDzonga-vuxa bya Asiya. Xana ku ta kumeka vatirhi lava ringaneke?
Handle ko kanakana, xexo a xi nge vi xiphiqo. Hofisi ya rhavi ya le Hawaii ya tsala: “Un’wana ni un’wana laha la hlanganyeleke etsimeni ra ku aka ra misava hinkwayo u kombela ku rhambiwa enkarhini lowu taka loko ku endliwa malunghiselelo man’wana yo aka. Loko va fika ekaya, va sungula ku vekela mali etlhelo leyi va nga ta yi tirhisela sweswo.” I yini lexi nga endlaka leswaku tsima leri ri nga humeleli loko u anakanya hi mikateko leyi fuweke leyi Yehovha a yi chululelaka lava tinyiketeleke hi mbilu hinkwayo hi ndlela leyi?
[Xifaniso lexi nga eka tluka 9]
Nhundzu yo aka ha yona
[Swifaniso leswi nga eka tluka 9]
Ntlawa wa vatirhi emuakweni
[Swifaniso leswi nga eka tluka 10]
Loko miako yi hela, hi tsakisiwe hi leswi moya wa Xikwembu wu koteke ku swi endla