Mahungu Lamanene Ya Ku Rhula Ma Fika eTintshaveni Ta Chiapas

“Eka ku khavangeriwa ka nsele loku un’wana ni un’wana a nga ku tsundzukaka loku humeleleke le mutini wa Chiapas, swisiwana swa 45 leswi nga kotiki ku tilwela, ku katsa ni tincece ta 13 va yayarheriwe hi ntlawa wa vavanuna . . . lava hlomeke.” Ku vike phepha-hungu ra “El Universal” malunghana ni leswi endlekeke eActeal, le Xifundzeni xa Chiapas, hi December 22, 1997.

CHIAPAS i ndhawu ya le xifundzeni xa le dzongeni wa tiko ra Mexico, yi vandzamane na Guatemala. Endzhaku ka malembe yo tala ya vusweti ni ku pfumala, ntlawa wa Maindiya ya Vamaya wu sungule dzolonga hi January 1994, wu tivitana Ejército Zapatista de Liberación Nacional (EZLN, National Liberation Zapatista Army). Mbulavurisano wo tisa ku rhula a wu nonoka. Ku hlaseriwa hi vaxandzuki ni masocha ya mfumo ku vangele leswaku ku halaka ngati ku tlhela ku fiwa. Mpfilumpfilu lowu wu vange leswaku swisiwana swo tala swi balekela laha swi nga ta sirheleleka kona.

Eka xiyimo lexi lexi nga twisisekiki, ku ni ntlawa wun’we wa varhandzi va ku rhula lowu a wu nga hoxi xandla eka tinyimpi ta tipolitiki. Hi khinkhi, wu languta eka Mfumo wa Xikwembu tanihi ntshembo lowu nga wona ntsena wo lulamisa swiphiqo swa vanhu, swa tiko ra rikwavo ni swa misava hinkwayo. (Daniyele 2:44) Xana i vamani? I Timbhoni ta Yehovha. Hi ku yingisa xileriso xa Yesu va tikarhatela ku hangalasa mahungu lamanene ya Mfumo wa Xikwembu ku ya fika etindhawini leti nga le tlhelo swinene etintshaveni ta Chiapas. (Matewu 24:14) Xana a swi ri njhani ku chumayela ehansi ka swiyimo swo tano, naswona vuyelo byi ve byihi?

“Ndzi Mbhoni Ya Yehovha”

Adolfo, jaha leri ra ha ku vaka muhuweleri wa Mfumo, siku rin’wana a ri tirha exitichini xa xiya-ni-moya eOcosingo. Hi xitshuketa ku twakale ku gongondza hi matimba erivantini. Ntlawa wa vavanuna lava tipfaleke swikandza wu tihoxe endzeni kutani wu n’wi kombetela nhloko hi swibalesa. Wu tsutsumele eka lexi xi fambisaka rungula ra xiya-ni-moya wu sindzisa ku xi tirhisa kutani wu tivisa eka xiya-ni-moya leswaku wona wu vula leswaku wu lava ku lwa ni mfumo.

Hiloko vavanuna lava hlomeke va hundzulukela eka Adolfo va n’wi lerisa leswaku a joyina ntlawa wa vona. Hambileswi a a nga si khuvuriwa, Adolfo u hlamule a ku: “Ndzi Mbhoni ya Yehovha.” U hlamusele leswaku ntshembo lowu hi nga na wona wo tisa ku rhula i Mfumo wa Xikwembu naswona hi xivindzi u ale ku teka yunifomo ni xibalesa lexi a va n’wi nyike xona. Hi ku vona ku tiyimisela ka yena va n’wi tshike a tifambela. Loko a rungula xiendlakalo lexi, Adolfo u ri: “Xiendlakalo xexo xi tiyise ripfumelo ra mina hakunene.”

Eku heteleleni xiyimo xi antswile, kambe ndhawu yoleyo a ya ha lawuriwa hi masocha. Nilokoswiritano, Adolfo hi ntsako u amukele xirhambo xa vakulu va vandlha ra kwalaho xo tirha ni ntlawa wa Vakreste lava nga voxe endhawini yoleyo. Laha masocha a ma kambela vanhu kona, laha a a fanele a hundza kona, a ya n’wi xixima loko a vula leswaku i Mbhoni ya Yehovha. Hi ku famba ka nkarhi u khuvuriwile naswona u enerisiwe hi ku pfuna ntlawa lowu a wu ri woxe leswaku wu va vandlha ra Timbhoni ta Yehovha. Adolfo u te: “Leswi sweswi se ndzi nga khuvuriwa, ndzi nga vula hi ku tiyiseka lokukulu leswaku ndzi Mbhoni ya Yehovha!”

“Yehovha Wa Hi Tiyisa”

Endzhakunyana ka ku va EZLN yi tivise eka xiya-ni-moya leswaku yi lava ku lwa ni mfumo, vanhu va ndhawu yoleyo va hlanule swirhendze. Francisco, mutirheli wa nkarhi hinkwawo kumbe phayona, u hlamusele ndlela leyi Yehovha a n’wi tiyiseke ha yona ni nsati wa yena eka swiyimo leswi a va langutana na swona.

“Hi hlawule ku ya kuma vutumbelo endhawini leyi u fambaka tiawara tinharhu hi milenge. A ku ri ni vandlha kwalaho, kutani a hi ta va hi tshama ni vamakwerhu. Ku nga ri khale a ku ta khomiwa nhlengeletano ya xifundzha ePalenque. Mina ni nkatanga a hi nga lavi ku hundziwa hi nhlangano wo hlawuleka wa maphayona, kambe hi twe leswaku ndlela leyi yaka laha ku nga ta khomeriwa nhlengeletano kona a yi pfariwile hi EZLN. Hi endle xiboho xo famba hi le khwatini, laha hi heteke tiawara ta kaye. Hi fike hi nkarhi enhlanganweni wa maphayona, lowu hi wu tsakeleke swinene ku katsa ni xiyimiso xa nhlengeletano hinkwayo.

“Loko hi tlhelela ekaya hi kume leswaku muti wa hina wu hisiwile ni swifuwo swa hina swi yiviwile. Leswi a swi sele a ku ri nkwama lowutsongo wa swiambalo. A hi ri ni gome hikwalaho ka ku lahlekeriwa loku, kambe vamakwerhu eOcosingo va hi amukele hi malwandla emakaya ya vona. Va tlhele va hi dyondzisa ku endla mintirho leyi a hi nga si tshama hi yi endla tanihi varimi. Makwerhu un’wana u ndzi dyondzise ku teka swifaniso, kasi un’wanyana u ndzi dyondzise ku rhunga tintangu. Hi yona ndlela leyi mina ni nkatanga hi tihanyiseke ha yona ku fikela sweswi, handle ko tshika vuphayona. Loko hi anakanya hi leswi humeleleke, ha swi vona leswaku hambileswi a swi nga hi oloveli ku tiyisela, Yehovha u hi tiyisile.”

Mihandzu Ya Ntirho Wo Chumayela

Timbhoni ta le Xifundzeni xa Chiapas a ti pfumelelanga maxangu ni makhombo swi ti sivela ku endla matshalatshala yo hlawuleka yo yisa mahungu lamanene evanhwini va ndhawu yoleyo. Hi xikombiso, hi April na May 1995, va hlanganyele ni Vakreste-kulobye emisaveni hinkwayo etsimeni ro hangalasa Kingdom News No. 34, leyi a yi ri ni xihloko lexi faneleke lexi nge Ha Yini Ku Ri Ni Swiphiqo Swo Tala Swonghasi eVuton’wini?

Hi nkarhi wa tsima rero, phayona ra nkarhi hinkwawo leri vitaniwaka Ciro ri kume ndyangu lowu a wu tsakela—endhawini leyi vitaniwaka Pueblo Nuevo. Loko ri tlhelela endzhaku ka masiku manharhu, ri kote ku sungula dyondzo ya Bibele na vona. Kambe loko Ciro ni munghana wakwe va tlhelela leswaku va ya emahlweni va dyondza ni ndyangu lowu, tata wa muti a nga ri kona ekaya. Ematshan’weni ya sweswo, ntlawa wa vavanuna lava tipfaleke swikandza a wu n’wi rindzile leswaku wu ta n’wi komba xa ncila wa bulubulu. Va vutise Ciro ni munghana wa yena leswaku a va lava yini kutani va va xungeta hileswaku va ta va dlaya. Endzhaku ko khongela hi mbilu eka Yehovha, Vakreste lava vambirhi hi xivindzi va hlamusele leswaku a va tele ku ta dyondzisa ndyangu lowu Bibele. Hikwalaho ka sweswo vavanuna lava va va tshike va tifambela. Hikwalaho ka swivangelo swo karhi wanuna wa muti a nga vuyanga ekaya siku rero.

Siku rin’wana endzhaku ka malembe manharhu, Ciro u hlamarile ku vona wanuna luya a nghena emutini wa yena. Ciro a a tsakile ku twa leswaku ndyangu hinkwawo a wu khuvuriwile naswona wu hlanganyela ni vandlha ra le Guatemala! Un’wana wa vana va vona wa xisati a a ri phayona ra nkarhi hinkwawo.

Ku Tlangela Swakudya Swa Moya

Ku nga khathariseki leswi va ha vonaka maxangu le Chiapas, mulanguteri wa muganga u vike leswaku Timbhoni endhawini yoleyo ti swi teka swi ri swa nkoka ku hlangana ndhawu yin’we. (Vaheveru 10:24, 25) U rungula leswi swa ha ku endlekaka eka nhlengeletano ya siku ro hlawuleka, leyi a yi hleriwe ku sungula ni mpundzu swinene leswaku lava nga ta va kona va kota ku tlhelela emakaya ra ha vona. Hambiloko vo tala va vona va boheke ku famba nkarhi wo tlula tiawara tinharhu ekhwatini leswaku va ya enhlengeletanweni, loko ku ba 7:00 nimixo un’wana ni un’wana a a tshame ehansi. Exikarhi ka vayingiseri a ku ri ni tsevu wa swirho swa ntlawa wa EZLN, swi rhiye ndleve naswona swi ba mavoko, handle ko kanakana a swi tsakela nongonoko. Na swona swi fambe tiawara tinharhu swi ta enhlengeletanweni. Nakambe 20 wa swona swi tile eXitsundzuxweni xa rifu ra Kreste lexi a xi khomeriwe eHolweni ya Mfumo ya kwalaho.

Jaha rin’wana ra ntlawa lowu lwisanaka ni tiko a ri averiwe ku langutela rin’wana ra makhwati hi valawuri va rona. Loko ri ku gaa, emugangeni wun’wana ri kume leswaku vaaki hinkwavo, lava vo tala va vona a ku ri Timbhoni ta Yehovha, va tseme va ri vona. Hiloko ri tirhurhela eka rin’wana ra makaya lama siyiweke. Hi ku va ri nga ri na xo xi endla ri teke yin’wana ya tibuku leyi ri yi kumeke endlwini kutani ri sungula ku yi hlaya. Ri kume leswaku i yin’wana ya tibuku ta Watch Tower leyi siyiweke hi Timbhoni. Leswi a ri ri roxe, jaha leri a ri ri ni nkarhi wo anakanyisisa hi leswi a ri swi hlaya. Ri bohe leswaku ri fanele ri cinca vutomi bya rona naswona ri tshika ku va socha. Ku nga ri kungani ri kume Timbhoni kutani ri sungula ku dyondza Bibele. Ku nga si hela tin’hweti ta tsevu se a ri sungule ku byela van’wana mahungu lamanene. Rona swin’we ni swirho swin’wana swa ndyangu wa rona leswi a swi yima ni ntlawa lowu lwisanaka ni tiko, se i Vakreste lava khuvuriweke.

Ku Va Ni Langutelo Lerinene

Hambileswi hi cinisiweke gija, kambe entiyisweni hasahasa yi pfunile leswaku vanhu va va ni langutelo lerinene malunghana ni ntirho wo chumayela. Nkulu un’wana edorobeni leri nyimpi leyi yi tlhekekeke kona u ri: “Endzhaku ka ntlhanu wa masiku nyimpi yi sungurile, hi hlele ntirho wo chumayela endzeni ka doroba ni le handle ka rona. Vanhu a va tiyimiserile ku hi yingisela. Hi fambise tibuku to tala ta Bibele naswona hi sungule tidyondzo ta Bibele to tala. Endhawini yin’wana, vanhu vo tala a a va kaneta ntiyiso, kambe hikwalaho ka madzolonga sweswi va yingisa, va dyondza Bibele ni ku ya eminhlanganweni ni le tinhlengeletanweni.”

Vamakwerhu va tsakile leswi va koteke ku hambeta ni ntirho wa swa le tilweni ku nga khathariseki swiyimo swo biha ngopfu. Leswi se va tiviwaka hi masocha ya mfumo ni ntlawa wa EZLN, va hambeta va khoma tinhlengeletano ta vona leti va tiyisaka emoyeni. Maendzo ya valanguteri lava famba-fambaka na wona ma ve xikhutazo xa matimba leswaku va hambeta entirhweni wo chumayela. Lexi tsakisaka, ni masocha ma va khutaza, nkarhi na nkarhi ma khongotela Timbhoni ku hambeta entirhweni wa tona wo chumayela.

Hambileswi miringo ni maxangu lawa vanhu va le Chiapas va bohekeke ku ma tiyisela ma hungutekeke katsongo, a ma si hela. Hambiswiritano, ku ni nchumu wun’we lowu wu tiyeke—Timbhoni ta Yehovha ti tiyimisele ku ya emahlweni ti nga tshiki matshalatshala ya tona yo yisa mahungu lamanene ya ku rhula evanhwini lama humaka eRitweni ra Xikwembu ku nga Bibele. (Mintirho 10:34-36; Vaefesa 6:15) Va swi xiya, ku fana na muprofeta Yeremiya loyi a vuleke leswaku “ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) I Mfumo wa Xikwembu ntsena lowu ku nga ta va ku fuma N’wana wa xona, Yesu Kreste, lowu nga ta tisa ntlhantlho eka vuhomboloki ni vusweti leswi nga kona emisaveni.—Matewu 6:10.

[Nhlamuselo ya xifaniso leyi nga eka tluka 9]

Nsonga-nkulu wa Mexico

CHIAPAS

GUATEMALA

Lwandle ra Pacific

[Xihlovo Xa Kona]

Mountain High Maps® Copyright © 1997 Digital Wisdom, Inc.

[Xifaniso lexi nga eka tluka 09]

Timbhoni ti ya entirhweni wa nsimu etintshaveni ta Chiapas