Xilalelo Xo Hetelela—Xana I Yini?

XANA u anakanya yini loko u twa marito lama nge “xilalelo xo hetelela”? Vanhu vo tala va anakanya hi xifaniso lexi rhandziwaka ngopfu xa le Milan, le Italiya, lexi mpfampfarhutiweke hi Leonardo da Vinci (1452-1519). Mhaka ya xiheri hileswaku eka malembe-xidzana lama hundzeke Xilalelo xo Hetelela xi ve xiendlakalo lexi rhandzekaka eka vampfampfarhuti, vatsari ni swiyimbeleri.

Kambe, i yini Xilalelo xo Hetelela naswona xi vula yini eka vanhu lava hanyaka eka lembe-xidzana ra vu-21? Tinsonga-vutivi ni tidikixinari ti ta ku byela leswaku Xilalelo xo Hetelela, lexi nakambe xi vuriwaka Xilalelo xa Hosi, i swakudya leswi Yesu Kreste a swi dyeke ni vaapostola va yena eka vusiku byo hetelela a nga si nyiketela vutomi bya yena byi va xitlhavelo. Tanihi leswi a ku ri swakudya swo hetelela leswi Yesu a swi dyeke ni valandzeri vakwe vo tshembeka, van’wana va swi vitana Xilalelo xo Hetelela. Naswona leswi xi simekiweke hi Hosi Yesu Kreste hi yexe, swi fanerile leswaku xi vitaniwa Xilalelo xa Hosi.

Eka malembe-xidzana lama hundzeke, vanhu vo tala va tinyiketele ku fela swilo leswi a va swi teka swi ri swa nkoka. Ku tinyiketela ka van’wana va vona ku vuyerise vanhu vo karhi swa xinkarhana. Kambe ku tinyiketela koloko hinkwako, hambileswi vanhu va tibaka xifuva hi kona, a hi ka nkoka nikatsongo loko ku pimanisiwa ni rifu ra Yesu Kreste. Tlhandlakambirhi, ematin’wini ya vanhu lama taleriweke hi swiphiqo, a nga kona munhu ni un’we loyi ku fa ka yena ku nga swi kotaka ku khumba vanhu va matiko hinkwawo. Ha yini?

Leswaku u kuma nhlamulo ya xivutiso xexo nileswaku u kuma leswi Xilalelo xa Hosi xi vulaka swona eka wena, hi kombela leswaku u hlaya xihloko lexi landzelaka.