Xiviko Xa Vahuweleri Va Mfumo

“Ndzo Sungula Ku Twa Ha Yona!”

DOROTA, mutirheli wa nkarhi hinkwawo la nga Mbhoni ya Yehovha ePoland, u helekete n’wana wa yena wa jaha wa malembe ya 14 hi vukhale etliliniki ya le xikolweni, hilaha a a tolovele ku endla hakona. Janina,a ku nga dokodela la kambelaka jaha ra yena, u vutise Dorota malunghana ni leswi jaha ra yena ri swi tirhaka ekaya.

Dorota u te: “Loko ndzi tsandzeka ku lunghiselela swakudya swo lalela swa ndyangu lowu nga ni vanhu va tsevu, jaha ra mina ra swi lunghiselela. Naswona ra pfuneta eku basiseni ka yindlu ni ku lunghisa swilo swo karhi ekaya. Ri rhandza ku hlaya. I xichudeni lexinene.”

Janina u te: “Leswi swa hlamarisa. Ndzi ni malembe ya 12 ndzi ri karhi ndzi tirha laha naswona a ndzi si tshama ndzi twa nchumu wo fana ni lowu.”

Loko a vona leswaku u pfulekeriwe hi nkarhi wo nyikela vumbhoni, Dorota u te: “Namuntlha, vatswari vo tala va tsandzeka ku letela vana va vona hi ndlela leyinene. Leswi hi swona swi endlaka vana va tala ku titekela ehansi.”

Janina u vutisile a ku: “Xana swi tise ku yini leswaku u tiva swilo leswi? Vatswari vo tala a va yi tivi mhaka leyi.”

Dorota u te: “Mhaka leyi ya risima yi kumeka eBibeleni. Hi xikombiso, hi ku ya hi Deteronoma 6:6-9, leswaku hi kota ku dyondzisa vana va hina, hi fanele hi rhanga hi tidyondzisa hina vini. Xana a hi fanelanga hi rhanga hi tata timbilu ni mianakanyo ya hina hi milawu leyi hi lavaka ku yi dyondzisa vana va hina?”

Janina u te: “Leswi swa hlamarisa hakunene.” Kutani a vutisa Dorota leswaku Bibele yi n’wi pfune njhani eku kuriseni ni le ku dyondziseni ka vana va yena.

Dorota u n’wi hlamuserile a ku: “Vhiki ni vhiki hi dyondza Bibele ni vana va hina. Hi tirhisa buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka.”b Hiloko a ya emahlweni a hlamusela buku leyi a tlhela a boxa tin’wana ta tinhloko-mhaka leti kumekaka eka yona.

Janina u te: “Ndzo sungula ku twa ha yona! Xana swi nga koteka leswaku ndzi yi vona buku ya kona?”

Endzhaku ka awara, Dorota u tise buku leyi.

Loko Janina a ri karhi a kambisisa buku leyi u vutisile a ku: “Xana u nghena kereke yihi?”

“Ndzi un’wana wa Timbhoni ta Yehovha.”

“Xana Timbhoni ta Yehovha ti va khoma njhani vanhu va vukhongeri byin’wana?”

“Hi ndlela leyi ndzi ku khomaka ha yona—hi xichavo,” ku hlamula Dorota a tlhela a engetela a ku: “Nakambe hi navela onge na vona va nga tiva ntiyiso wa Bibele.”

“Ndzi titwa ku antswa swinene sweswi,” ku vula Janina.

Loko se a famba, Dorota u khutaze Janina leswaku a hlaya Bibele. “Yi ta endla leswaku vutomi bya wena byi va ni xikongomelo ni ku ku pfuna entirhweni wa wena.”

“Xikhutazo xa wena xi ndzi endla ndzi titwa ndzi navela ku yi hlaya,” ku vula Janina.

Hi ku va ni vuxiya-xiya ni ku tiyimisela, Dorota u endle riendzo ra yena ra nkarhi na nkarhi ro ya eka dokodela, ri va nkarhi lowunene wo nyikela vumbhoni.—1 Petro 3:15.

[Tinhlamuselo ta le hansi]