Swivutiso Swa Vahlayi

Xana Davhida, wanuna la amukelekaka embilwini ya Xikwembu, u khome makhumbi ya yena hi tihanyi letikulu, hilaha van’wana va anakanyaka hakona hi ku ya hi marito lama kumekaka eka 2 Samuwele 12:31 na 1 Tikronika 20:3?

Doo! Davhida u lo nyika makhumbi ya Vaamone ntirho wa nsindziso. Swiendlo swa Davhida swi twisisiwe hi ndlela leyi hoxeke hikwalaho ka ndlela leyi vuhundzuluxeri byin’wana bya Bibele byi ti hundzuluxelaka ha yona tindzimana leti.

Loko byi hlamusela ndlela leyi Vaamone va xupuriweke ha yona, vuhundzuluxeri bya Tibibele toleto byi hlamusela Davhida tanihi munhu wa tihanyi letikulu. Hi xikombiso, 2 Samuwele 12:31 eka King James Version yi hlayeka hi ndlela leyi: “U tise vanhu lava a va ri kwalaho, kutani a va veka ehansi ka tisaha, ni le hansi ka tihariki ta nsimbi, ni le hansi ka swihloka swa nsimbi, kutani a va hundzisa exitikweni xa switina: kutani a endlisa sweswo eka vanhu va miti hinkwayo ya vana va Amone.” Rungula leri nga eka 1 Tikronika 20:3 na rona ri hundzuluxeriwe hi ndlela leyi fanaka.

Hambiswiritano, hilaha swi xiyiweke hakona hi xidyondzi xa Bibele Samuel Rolles Driver, tihanyi “a ti fambisani ni hinkwaswo leswi hi swi tivaka hi vumunhu ni mboyamelo wa Davhida.” Hikwalaho nhlamuselo leyi nga eka The Anchor Bible yi ri: “Davhida u hlawule mintlawa ya makhumbi leyi a ku ta nghenisiwa mali hi yona, leswi handle ko kanakana ku nga mukhuva lowu a wu tolovelekile eka tihosi leti hluleke.” Adam Clarke u hlamusele mianakanyo leyi fanaka: “Hikwalaho nhlamuselo ya kona hileswaku, U endle vanhu va va mahlonga, kutani a va nyika ntirho wo saha, wo endla tihariki ta nsimbi, kumbe wa ku cela migodi, . . . ni wa ku tsema timhandze ni wa ku endla switina. Ndzimana leyi a yi vuli ku pulukanyisa ni ku khavangela vanhu, tanihi leswi Davhida a a nga ta va khoma hi ndlela yoleyo Vaamone.”

Loko byi kombisa ku twisisa loku ku pakanisaka, vuhundzuluxeri byo hambana-hambana bya manguva lawa byi swi veka erivaleni leswaku Davhida a nga fanelanga a hehliwa hi tihanyi to tano.a Xiya ndlela leyi New English Translation (2003) yi hundzuluxelaka ha yona: “U suse vanhu lava a va ri eka wona kutani a va nyika ntirho wo tika wo tirha hi tisaha, tiforoko ta nsimbi ni swihloka swa nsimbi, a va tirhisa exitikweni xa switina. Rolero a ku ri endlelo rakwe emitini hinkwayo ya Vaamone.” (2 Samuwele 12:31) “U teke vaaki va muti kutani a va nyika ntirho wo tirha hi tisaha, tiforoko ta nsimbi ni swihloka. Davhida u endle leswi emitini hinkwayo ya Vaamone.” (1 Tikronika 20:3) Mahundzuluxelelo ya Vuhundzuluxeri Bya Misava Leyintshwa na wona ma pfumelelana ni swidyondzi swa manguva lawa: “Vanhu lava a va ri eka wona, u va humesile leswaku a va veka va saha maribye ni ku tirha hi switirho leswi karihaka swa nsimbi ni le ka swihloka swa nsimbi, u va tirhise ku endla switina.” (2 Samuwele 12:31) “Vanhu lava a va ri eka wona, u va humesile, a va veka va saha maribye ni ku tirha hi switirho leswi karihaka swa nsimbi ni swihloka; hi yona ndlela leyi Davhida a endleke ha yona emitini hinkwayo ya vana va Amone.”—1 Tikronika 20:3.

Davhida a nga xanisanga Vaamone lava hluriweke hi ndlela ya tihanyi kumbe ku va yayarhela hi ndlela yo chavisa. A a nga tekelelanga mikhuva ya tihanyi ya le nyimpini ya le sikwini ra yena.

[Nhlamuselo ya le hansi]