Kahle-kahle I Mani Yesu Kreste?

HA YINI ku fika ka Yesu Krestea eYerusalema hi ximun’wana xa 33 C.E. swi endle leswaku vanhu va yimayimeka? Vanhu vo tala emutini wolowo a va twile hi ta Yesu ni hi swilo leswi a swi endleke leswi nga tolovelekangiki. Va ye emahlweni va byela van’wana malunghana na yena. (Yohane 12:17-19) Mintshungu a yi nga swi tivi leswaku leswi a swi ta endliwa hi wanuna loyi a a ri exikarhi ka yona a swi ta khumba misava hinkwayo naswona a swi ta fika ni le nkarhini wa hina!

Xiya swikombiso swin’wana swa ndlela leyi vutomi bya Yesu byi va khumbeke ha yona vanhu.

• Khalendara leyi hi ntolovelo a yi tirhisiwa eswiphen’wini swo tala swa misava a yi sungula hi lembe leri ku ehleketiwaka leswaku Yesu u velekiwe ha rona.

• Vanhu va kwalomu ka tibiliyoni timbirhi—ku nga vaaki va kwalomu ka tiphesente ta 30 emisaveni hinkwayo—va tivitana Vakreste.

• Mamoslem lama nga ni swirho swo tlula biliyoni emisaveni hinkwayo, ma dyondzisa leswaku Yesu i “muprofeta lonkulu eka Abrahama, Nowa na Muxe.”

• Swo tala swa leswi Yesu a swi vuleke, vanhu va swi tirhisa evuton’wini bya vona bya siku ni siku loko va vulavula. Hi leswi swin’wana swa swona:

  ‘Hundzuluxela rhama lerin’wana eka yena.’—MATEWU 5:39.

  ‘Gongondzani kutani mi ta pfuleriwa.’—MATEWU 7:7.

  “Ku hava loyi a nga vaka hlonga ra tihosi timbirhi.”—MATEWU 6:24.

  “Mi nga nyiki timbyana leswi kwetsimaka.”—MATEWU 7:6.

  “Swilo hinkwaswo leswi mi lavaka vanhu va swi endla eka n’wina, na n’wina mi fanele mi swi endla eka vona.”—MATEWU 7:12.

  “Hlayela ntsengo.”—LUKA 14:28.

Swi le rivaleni leswaku vutomi bya Yesu byi va khumbe swinene vanhu. Kambe vanhu va ha ri ni mavonelo yo hambana-hambana malunghana na yena. Hikwalaho, u nga ha tivutisa leswaku ‘Kahle-kahle i mani Yesu Kreste?’ I Bibele ntsena leyi hi byelaka laha Yesu a humaka kona, ndlela leyi a hanyeke ha yona ni xivangelo xo va a file. Ku tiva timhaka teto malunghana na yena swi nga byi khumba swinene vutomi bya wena—sweswi ni le nkarhini lowu taka.