Ha Yini Vanhu Va Vula Leswaku Xikwembu Xi Ni Tihanyi?

XANA xivutiso lexi nga eka xifunengeto xa magazini lowu xi ku khomisa rhumbyana? Van’wana va anakanya leswaku xi khomisa rhumbyana kambe vo tala va tivutisa loko ku ri leswaku Xikwembu xi ni tihanyi—kumbe va ehleketa leswaku xi na tona. Ha yini?

Van’wana lava poneke makhombo ya ntumbuluko va vutisa va ku: “Ha yini Xikwembu xi pfumelela swilo leswi leswaku swi humelela? Xana a xi khathali? Kumbe xi ni tihanyi?”

Van’wana na vona va tivutisa xivutiso lexi fanaka loko va ri karhi va hlaya Bibele. Va hlaya hi marungula yo tanihi ya Nowa ni Ndhambi kutani va tivutisa va ku, ‘Ha yini Xikwembu xa rirhandzu xi dlaye vanhu lava hinkwavo? Xana xi ni tihanyi?’

Xana na wena u tivutisa swivutiso swo fana ni leswi minkarhi yin’wana? Kumbe, xana u tikuma u nga swi tivi leswaku u ta va hlamula u ku yini lava vutisaka xivutiso xa leswaku Xikwembu xi ni tihanyi? Eka swilo leswi haswimbirhi, xiya xivutiso xin’wana lexi nga pfunaka.

HA YINI HI VENGA TIHANYI?

Hi ku komisa, hi venga tihanyi hileswi hi kotaka ku hambanisa leswinene ni leswo biha. Hi hambane swinene ni swiharhi loko swi ta emhakeni leyi. Muvumbi wa hina u hi endle “hi xifaniso” xakwe. (Genesa 1:27) Xana sweswo swi vula yini? U hi endle hi ri ni vuswikoti byo kombisa timfanelo leti a nga na tona ni milawu ya mahanyelo, ku hambanisa leswinene ni leswo biha. Xiya mhaka leyi: Loko hi kota ku hambanisa leswinene ni leswo biha hikwalaho ka leswi Xikwembu xi hi endleke tano, xana sweswo a swi kombisi leswaku Xikwembu na xona xi venga tihanyi?

Bibele yi tiyisisa mhaka yoleyo hikuva eka yona, Xikwembu xi ri: “Tindlela ta mina ti tlakukile ku tlula tindlela ta n’wina, ni miehleketo ya mina ku tlula miehleketo ya n’wina.” (Esaya 55:9) Hambiswiritano, loko hi ku Xikwembu xi ni tihanyi, hi kaneta mhaka yoleyo—hi marito man’wana hi vula leswaku tindlela ta hina ti tlakuke ku tlula ta xona. Ku ta va ku ri vutlhari ku kuma rungula leri engetelekeke hi nga si yima ni mhaka yoleyo. Kumbexana hi nga tivutisa leswaku ha yini swiendlo swin’wana swa Xikwembu swi endla xi vonaka onge xi ni tihanyi ku nga ri ku vutisa leswaku ha yini xi ri ni tihanyi. A hi voneni leswi “tihanyi” ti vulaka swona hakunene leswaku swi ta hi pfuna.

Loko hi vula leswaku munhu wo karhi u ni tihanyi, hi vula leswaku u ni swikongomelo swo biha. Munhu loyi a nga ni tihanyi hi loyi a tsakaka loko van’wana va xaniseka kumbe loyi a nga khathariki hi maxangu ya van’wana. Xisweswo, tatana loyi a tshinyaka n’wana wakwe hileswi a tsakisiwaka hi ku vavisa matitwelo yakwe u ni tihanyi. Kambe tatana loyi a n’wi tshinyaka leswaku a n’wi letela kumbe ku n’wi sirhelela hi lonene. Leswi hi nga swi tiviki leswi endlaka leswaku vanhu vo karhi va endla swilo hi ndlela yo karhi, swa olova ku nga swi twisisi kahle swikongomelo swa van’wana.

A hi xiyeni swivangelo swimbirhi leswi endlaka leswaku van’wana va anakanya leswaku Xikwembu xi ni tihanyi—makhombo ya ntumbuluko lama hi ma vonaka namuntlha ni marungula ya le Bibeleni. Xana hakunene timhaka leti ti kombisa leswaku Xikwembu xi ni tihanyi?