Xikwembu Xi Tiyimisele Ku Kutsula Vanhu

Xikwembu xi tshembise Abrahama leswaku “mbewu” leyi ku profetiweke ha yona yi ta huma eka vatukulu vakwe. Vanhu va “tinxaka hinkwato” a va ta katekisiwa hikwalaho ka yona. (Genesa 22:18) Endzhakunyana, ntukulu wa Abrahama, ku nga Yakobe, u rhurhele aEgipta laha ndyangu wakwe wu andzeke kukondza wu va tiko ra Israyele ra khale.

Endzhakunyana, aEgipta, Faro loyi a nga na tihanyi u endle Vaisrayele mahlonga ku fikela loko Xikwembu xi rhuma muprofeta Muxe, loyi a va humeseke etikweni hi ku tirhisa singita leri aveke mati ya Lwandle ro Tshwuka. Endzhaku ka sweswo, Xikwembu xi nyike Vaisrayele milawu, ku katsa ni Milawu ya Khume leswaku yi va kongomisa ni ku va sirhelela. Milawu yoleyo a yi katsa ni magandzelo ya ku rivaleriwa swidyoho. Hi ku huhuteriwa hi Xikwembu, Muxe u byele Vaisrayele leswaku Xikwembu a xi ta va rhumela muprofeta un’wana. Muprofeta yoloye a ta va “mbewu” leyi tshembisiweke.

Endzhaku ka malembe yo tlula 400, Xikwembu xi tshembise Hosi Davhida leswaku loyi a taka, “mbewu” leyi ku profetiweke ha yona aEdeni, a ta fuma eka mfumo lowu a wu ta tshama hilaha ku nga heriki. Yoloye a ku ta va Mesiya, Muponisi loyi a hlawuriweke hi Xikwembu leswaku a ponisa vanhu ni ku vuyetela Paradeyisi laha misaveni.

Hi ku tirhisa Davhida ni vaprofeta van’wana, Xikwembu xi hambete xi hlavutela leswi engetelekeke malunghana na Mesiya. Va profete leswaku u ta va loyi a titsongahataka ni ku va ni musa ni leswaku loko a ri karhi a fuma, ku nge he vi na ndlala, madzolonga ni tinyimpi. Vanhu hinkwavo va ta hanyisana hi ku rhula ni swiharhi. Vuvabyi, ku xaniseka ni rifu—leswi a swi nga ri xona xikongomelo xa Xikwembu xo sungula—a swi nge he vi kona naswona vanhu lava feke va ta pfuxeriwa emisaveni.

Hi ku tirhisa muprofeta Mikiya, Xikwembu xi vule ka ha ri emahlweni leswaku Mesiya a a ta velekeriwa eBetlehema naswona hi ku tirhisa muprofeta Daniyele, xi vule leswaku a a ta dlayiwa hi ku famba ka nkarhi. Kambe Xikwembu a xi ta pfuxa Mesiya eka lava feke kutani xi n’wi veka tanihi Hosi etilweni. Nakambe Daniyele u vone xivono xa leswaku eku heteleleni Mfumo wa Mesiya wu ta yi herisela makumu mimfumo leyin’wana hinkwayo. Xana hakunene Mesiya u tile hilaha ku profetiweke hakona?

​—Byi sekeriwe eka Genesa tindzima 22-50, Eksoda, Deteronoma, 2 Samuwele, Tipisalema, Esaya, Daniyele, Mikiya na Zakariya 9:9.