Xiyenge 7

Leswi Xikwembu Xi Swi Tshembiseke Hi Ku Tirhisa Vaprofeta

VAPROFETA va khale a va ri ni ripfumelo eka Xikwembu. Ndlela leyi a va hanya ha yona a yi kombisa leswaku va swi tshemba switshembiso swa xona. Xana switshembiso sweswo a swi katsa yini?

Endzhakunyana loko Adamu na Evha va xandzukile aEdeni, Xikwembu xi tshembise leswaku xi ta rhumela la nga ta pfotlosa nhloko ya “nyoka” leyi yimelaka “dragona leyikulu . . . , nyoka ya khale, leyi vuriwaka Diyavulosi na Sathana,” a yi herisela makumu. (Genesa 3:14, 15; Nhlavutelo 12:9, 12) Xana Loyi a Taka i mani?

Endzhaku ka malembe ya kwalomu ka 2 000 loko Yehovha a nyikele vuprofeta byebyo byo sungula, u tshembise muprofeta Abrahama leswaku Loyi a Taka u ta huma eka rixaka rakwe. Xikwembu xi byele Abrahama xi ku: “Tinxaka hinkwato ta misava ti ta tikatekisa hi mbewu ya wena hikwalaho ka leswi u yingiseke rito ra mina.”—Genesa 22:18.

Hi 1473 B.C.E., Xikwembu xi nyike muprofeta Muxe vuxokoxoko lebyi engetelekeke hi “mbewu” yoleyo. Muxe u byele vana va Israyele a ku: “Yehovha Xikwembu xa wena u ta ku yimisela muprofeta a huma exikarhi ka wena, a huma eka vamakwenu, ku fana na mina—yena mi fanele mi n’wi yingisa.” (Deteronoma 18:15) Xisweswo muprofeta yoloye wo fana na Muxe a a ta huma eka vana va Abrahama.

Nakambe muprofeta yoloye a a ta va ntukulu wa Hosi Davhida naswona a a ta va hosi leyikulu. Xikwembu xi tshembise Hosi Davhida xi ku: “Ndzi ta yimisa mbewu ya wena endzhaku ka wena [naswona] ndzi ta simeka xiluvelo xa mfumo wa yona xi tiya hilaha ku nga riki na makumu.” (2 Samuwele 7:12, 13) Nakambe Xikwembu xi paluxe leswaku ntukulu yoloye wa Davhida a a ta vuriwa “Hosana Ya Ku Rhula” xi tlhela xi ku: “Ku tala ka ku fuma ka vuhosana ni ku rhula a swi nge vi na makumu, exiluvelweni xa Davhida ni le mfun’weni wa yena leswaku a wu simeka wu tiya ni ku wu seketela hi vululami ni hi ku tshembeka, ku sukela sweswi ku ya enkarhini lowu nga riki na makumu.” (Esaya 9:6, 7) Murhangeri yoloye wo lulama u ta tisa ku rhula ni vululami emisaveni hinkwayo. Kambe a a ta fika rini?

Endzhaku ka nkarhi ntsumi Gabriyele yi byele Daniyele muprofeta wa Xikwembu yi ku: “U fanele u tiva, u twisisa leswaku ku sukela eku humeni ka rito ro vuyisela ni ku pfuxa Yerusalema ku fika eka Mesiya lowa Murhangeri, ku ta va ni mavhiki ya nkombo, ni mavhiki ya 62.” (Daniyele 9:25) Mavhiki wolawo ya 69 a ma yimela malembe, laha vhiki ha rin’we a ri yimela malembe ya nkombo kutani malembe wolawo hinkwawo a ma ri 483. A ma sukela eka lembe ra 455 B.C.E. ku ya eka 29 C.E.a

Xana Mesiya, muprofeta la fanaka na Muxe ku nga “mbewu” leyi a ku ri khale yi rindzeriwile a yi ta humelela hi 29 C.E.? A hi voneni.

[Nhlamuselo ya le hansi]

U Nga Hlamula Njhani?

• I yini leswi “mbewu” ya Abrahama leyi tshembisiweke yi nga ta n’wi endla swona Sathana?

• I yini leswi Xikwembu xi swi tshembiseke hi ku tirhisa Muxe?

• I yini leswi Davhida a swi dyondzeke hi “mbewu”?

• I yini leswi ntsumi Gabriyele yi swi byeleke Daniyele?

[Swifaniso leswi nga eka tluka 18, 19]

“Mbewu” leyi tshembisiweke a yi ta . . . 

huma eka Abrahama

va muprofeta ku fana na Muxe

huma eka rixaka ra Davhida

humelela hi 29 C.E.

pfotlosa nyoka ku nga Sathana