Xana Ha Wu Lava Mpfuno Wa Xikwembu?

“Xana u un’wana wa lava nga pfumeriki eka Xikwembu? Vanhu va timiliyoni a va pfumeli.” Kutani hlaya marungula lawa eka tibodo ta sweswinyana to navetisa swilo leti hakeriweke hi ntlawa wa vanhu lava vulaka leswaku Xikwembu a xi kona. Entiyisweni va vona onge a va na xilaveko xo lava Xikwembu.

Hi hala tlhelo, vo tala lava vulaka leswaku va pfumela eka Xikwembu va endla swiboho onge hiloko xi nga ri kona. Salvatore Fisichella, bixopo-nkulu wa Khatoliki u vule leswi malunghana ni kereke yakwe: “Loko hi tilanguta ku hava ni un’we loyi a nga vulaka leswaku hi Vakreste namuntlha hikuva mahanyelo ya hina a ma hambananga ni ya lava nga riki vapfumeri.”

Van’wana va khomeke ngopfu lerova a va na mhaka na Xikwembu. Va vona onge xi le kule, a xi nge swi koti ku va pfuna evuton’wini bya vona. Hakanyingi vanhu vo tano va khongela eka Xikwembu ntsena loko va ri emaxangwini kumbe loko va lava swin’wana—onge hiloko xi ri nandza wa vona loyi a lunghekeleke ku endla xin’wana ni xin’wana lexi va xi lavaka.

Van’wana a va swi endli leswi vukhongeri bya vona byi swi dyondzisaka kumbexana hileswi va anakanyaka leswaku a swi nge va pfuni nchumu. Hi xikombiso, vanhu lava endlaka 76 wa tiphesente va kereke ya Khatoliki eJarimani va tshemba leswaku swa amukeleka leswaku wanuna ni wansati va tshama swin’we va nga tekananga—ku nga dyondzo leyi dyondzisiwaka ekerekeni ya vona leyi lwisanaka na Bibele. (1 Vakorinto 6:18; Vaheveru 13:4) Vanhu va vukhongeri byo hambana-hambana va swi xiya leswaku hambileswi vanhu vo tala va vulaka leswaku va nghena kereke, a va swi endli leswi va pfumelaka eka swona. Ndlela leyi vanhu lava nghenaka kereke va hanyaka ha yona ya fana ni ya lava nga pfumeriki leswaku Xikwembu xi kona.

Swikombiso leswi swi pfuxa xivutiso lexi landzelaka: Xana hakunene ha wu lava mpfuno wa Xikwembu? Mhaka leyi a hi yintshwa. Ku vulavuriwe ha yona eka matluka yo sungula ya Bibele. Leswaku hi kuma nhlamulo ya xivutiso lexi, a hi kambisiseni timhaka to hlayanyana leti nga ebukwini ya Bibele ya Genesa.