U Nga Ku Yini Eka Munhu La Nge Xikwembu A Xi Kona?
1 Profesa un’wana la humaka ePoland u byele murhumiwa wa laha Afrika a ku: “Ndzi munhu la nga pfumeliki leswaku Xikwembu xi kona.” Hambiswiritano, makwerhu loyi wa xisati u burisane ni wansati loyi ivi a n’wi nyika buku leyi nge Life—How Did It Get Here? By Evolution or by Creation? Loko murhumiwa a tlhelela vhiki leri landzeleke, profesa u te: “A ndza ha ri yena munhu la nga pfumeliki leswaku Xikwembu a xi kona!” A a hlaye buku leyi nge Creation a yi heta, naswona hi nkarhi wolowo a lava dyondzo ya Bibele. Xana u nga endla yini leswaku u kota ku nyikela vumbhoni hi ndlela leyi humelelaka eka lava nge Xikwembu a xi kona? Xo sungula, anakanyisisa hi swivangelo swo hambana-hambana leswi endlaka vanhu va vula leswaku a xi kona.
2 Swivangelo Leswi Endlaka Va Nga Pfumeli: A hi hinkwavo vanhu lava nge Xikwembu a xi kona lava kurisiweke tano. Van’wana a va ri swirho swa vukhongeri naswona va tshame va va ni ripfumelo eka Xikwembu. Hambiswiritano, ku khomiwa hi vuvabyi lebyikulu kumbe ku va ni swiphiqo swa ndyangu kumbe vuhomboloki byin’wana lebyi va tshameke va endleriwa byona, swi tsanise ripfumelo ra vona. Kasi van’wana tidyondzo leti va ti kumeke eswikolweni swa le henhla ti va dyondzise langutelo ro biha mayelana ni Xikwembu. Xiya swikombiso leswi landzelaka swa vanhu lava a va nga pfumeli leswaku Xikwembu xi kona lava eku heteleleni va hlakuleleke ripfumelo leri tiyeke eka Yehovha Xikwembu naswona va hundzukeke Timbhoni takwe.
3 Wansati un’wana wa le Paris u velekiwe a ri ni vuvabyi bya marhambu lebyi hetaka matimba. Hambileswi a ri Mukhatoliki la khuvuriweke, a a vula leswaku a nga pfumeli leswaku Xikwembu xi kona. Loko a vutise tinani leswaku ha yini Xikwembu xi pfumelele leswaku a velekiwa a ri ni vuvabyi byo tano, ti hlamule ti ku: “Hikuva xa ku rhandza.” A yi n’wi tsakisanga nhlamulo leyi yo phyama. Nakambe, anakanya hi jaha rin’wana ra le Finland leri a ri ri ni vuvabyi bya misiha lebyi nga tshungulekiki naswona a ri boheka ku famba hi xitulu xa swigulana. Mana wa rona u ri yise eka Mupentekosta loyi a a vula leswaku u hanyisa vanhu lava vabyaka. Hambiswiritano, jaha leri a ri hanyisiwanga hi singita. Hikwalaho, ri sungule ku venga Xikwembu ivi ri sungula ku nga pfumeli leswaku Xikwembu xi kona.
4 Wanuna un’wana wa le Honduras, u kule a ri Mukhatoliki naswona u sungule ku dyondza filosofi ya Ntshamisano ni dyondzo leyi lwisanaka ni vukona bya Xikwembu. Hikwalaho ka leswi a khorwisiweke hi dyondzo ya le yunivhesiti leyi dyondzisaka leswaku vanhu va ve kona hikwalaho ka hundzuluko, u tshike ku pfumela eka Xikwembu. Hilaha ku fanaka, wansati un’wana wa le United States u kule a nghena kereke ya Methodist. Loko a ri ekholichi u dyondze tikhoso ta ntivo-miehleketo. Xana ripfumelo rakwe ri khumbheke njhani? U te: “Hi lembe rin’we ntsena tikhoso leti, ti minye ripfumelo leri a ndzi ri na rona mayelana ni vukhongeri.”
5 Ku Fikelela Timbilu Ta Lava Rhandzaka Leswinene: Vanhu vo tala lava vulaka leswaku a va pfumeli eka Xikwembu va nga swi tsakela ku tiva loko xi ri kona lexi nga ta herisa mavabyi, timholovo ta mindyangu, vuhomboloki ni swiphiqo swin’wana. Kunene va nga swi tsakela ngopfu ku tiva tinhlamulo ta swivutiso swo tanihi leswi: ‘Ha yini ku ri ni vuhomboloki?’ ‘Ha yini vanhu vo lulama va humeleriwa hi swilo swo biha?’ ni lexi nge ‘Hi xihi xikongomelo xa vutomi?’
6 Nuna na nsati lava tshamaka eSwitzerland, ha vambirhi ku sukela evutsongwanini bya vona a va dyondzisiwe leswaku Xikwembu a xi kona. Loko va twa ntiyiso ro sungula, a va wu tsakelanga. Hambiswiritano, a va ri ni swiphiqo leswikulu swa ndyangu naswona a va anakanya ku dlaya vukati. Loko Mbhoni yi wu endzela nakambe, yi kombe mpatswa lowu ndlela leyi wu nga herisaka ha yona swiphiqo swa wona hi ku tirhisa Bibele. Mpatswa lowu wu hlamarisiwe hi ndzayo leyinene leyi nga eMatsalweni, naswona wu pfumerile ku dyondzisiwa Bibele. Vukati bya wona byi tlhele byi dzima timitsu, wu endle nhluvuko hi tlhelo ra moya ivi wu khuvuriwa.
7 Leswi U Nga Swi Vulaka Eka Loyi A Nge Xikwembu A Xi Kona: Loko munhu un’wana a ku, Xikwembu a xi kona, ringeta ku kumisisa leswaku ha yini a vula tano. Xana ku nga va ku ri hikwalaho ka leswi a swi dyondzeke exikolweni, swiphiqo leswi a langutaneke na swona kumbe hikwalaho ka tidyondzo ta mavunwa ni vukanganyisi bya vukhongeri lebyi a byi voneke? U nga ha n’wi vutisa xivutiso lexi: “Xana nkarhi hinkwawo a wu ri ni langutelo leri?” kumbe lexi nge “Ha yini u anakanya tano?” Nhlamulo yakwe yi ta ku pfuna ku anakanya leswi u nga ta swi vula. Laha swi lavaka leswaku mi nghena hi vuenti ebulwini, buku leyi nge Is There a Creator Who Cares About You? yi nga pfuna ngopfu.
8 U nga burisana ni munhu la nge Xikwembu a xi kona hi ku vutisa swivutiso leswi:
◼ “Xana u tshama u tivutisa xivutiso lexi: ‘Loko Xikwembu xi ri kona, ha yini ku ri ni maxangu ni vuhomboloki byonghasi emisaveni?’ [Yimela nhlamulo.] Xana u nga ndzi pfumelela ndzi ku kombisa leswi Bibele yi swi vulaka malunghana ni mhaka leyi?” Hlaya Yeremiya 10:23. Endzhaku ka loko u yi hlayile, n’wi vutise leswaku u anakanya yini hi ndzimana leyi. Kutani u n’wi komba matluka 16 na 17 eka broxara leyi nge Will There Ever Be a World Without War? Kumbexana u nga ha tirhisa ndzima 10 ya buku leyi nge Creator. N’wi khutaze ku teka buku a yi hlaya.—Leswaku u kuma swiringanyeto leswi engetelekeke, vona buku leyi nge Ku Hlamulana, tluka 414.
9 Ina, a hi hinkwavo lava alaka vukona bya Xikwembu lava nga ta amukela ntiyiso. Hambiswiritano, vo tala va swi tsakela ku twa mavonelo ya van’wana. Andlala rungula ra wena hi ndlela leyi twisisekaka, leyi khorwisaka, kambe lexi nga xa risima swinene i ku tirhisa matimba ya Rito ra Xikwembu leswaku u va pfuna va vona ntiyiso.—Mint. 28:23, 24; Hev. 4:12.