NHLOKO-MHAKA YA XIFUNENGETO | MFUMO WA XIKWEMBU—I YINI LEXI NGA ENDLAKA WU VA WA NKOKA EKA WENA?

Mfumo Wa Xikwembu—Xana Wu Ta Ku Vuyerisa Hi Ndlela Yihi?

Swi nga ha endleka leswaku u swi twisisile eka swihloko leswi hundzeke leswaku Mfumo wa Xikwembu i wa nkoka swinene eka Timbhoni ta Yehovha. Kumbexana u tsakisiwe hi yin’wana ya mikateko ya le nkarhini lowu taka ya Mfumo wa Xikwembu leyi ku buriweke ha yona. Hilaha ku fanaka, u nga ha tivutisa loko switshembiso swo tano swi ri ntiyiso.

Ku ta va ku ri vutlhari ku va ni vuxiyaxiya ematshan’weni yo tshemba nchumu wun’wana ni wun’wana lowu u wu twaka. (Swivuriso 14:15) Hi marito man’wana, vuxiyaxiya bya wena byi nga ha fanisiwa ni lebyi Vaberiya va khale a va ri na byona.a Loko va byeriwa ro sungula malunghana ni mahungu lamanene ya Mfumo, Vaberiya va amukele leswi va swi tweke, ku nga ri hileswaku a va lava leswaku swi va ntiyiso. Ematshan’weni ya sweswo, va kambisise Matsalwa hi vukheta “ku vona loko swilo leswi swi ri tano.” (Mintirho 17:11) Hi marito man’wana, Vaberiya va ringanise mahungu lamanene lawa va ma tweke ni leswi Matsalwa ma swi vulaka. Hi ku famba ka nkarhi, va khorwisekile leswaku hakunene mahungu lamanene a ma sekeriwe eRitweni ra Xikwembu.

Timbhoni ta Yehovha ta ku rhamba leswaku u endla hilaha ku fanaka. Hi ku tirhisa nongonoko wa dyondzo ya hina ya mahala ya le kaya ya Bibele, hi ku nyika nkarhi wo ringanisa leswi Timbhoni ta Yehovha ti pfumelaka eka swona malunghana ni Mfumo wa Xikwembu ni leswi Bibele yi swi dyondzisaka.

Ku engetela eka ku dyondza hi Mfumo wa Xikwembu, ku dyondza ka wena Bibele swi nga ku pfuna leswaku u kuma tinhlamulo ta swivutiso swin’wana swa nkoka evuton’wini.

Hi huma kwihi?
Hi xihi xikongomelo xa vutomi?
Ha yini Xikwembu xi pfumelela leswaku ku va ni ku xaniseka?
Ku endleka yini loko hi fa?
Xana misava yi ta herisiwa?
I yini lexi endlaka leswaku ku va ni ntsako endyangwini?

Phela, ku dyondza Bibele swi ta ku pfuna leswaku u ‘tshinela eka Xikwembu.’ (Yakobo 4:8) Ku tlula kwalaho, loko u ya u tshinela eka Xikwembu, u ta ya u vona ndlela leyi Mfumo wa Xikwembu wu nga wa nkoka ha yona eka wena—ku nga ri sweswi ntsena kambe ni hilaha ku nga heriki. Loko Yesu a khongela eka Tata wakwe u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Timbhoni ta Yehovha ti nga tirhisa nkandziyiso lowu ku dyondza na wena Bibele.

Leswaku u kombela dyondzo ya mahala ya Bibele, kombela Mbhoni yin’wana ni yin’wana ya Yehovha kumbe u tata fomo leyi nga eka www.jw.org/ts (Nghena eka nhloko-mhaka leyi nge KOMBELA DYONDZO YA BIBELE eka tluka-nkulu)

a Beriya a ku ri muti wa le Makedoniya wa khale.

Lexi Endlaka Leswaku Mfumo Wa Xikwembu Wu Va Wa Nkoka Eka Yena

Sweswinyana, xinhwanyetana lexi nga ni malembe ya khume lexi vito ra xona ku nga Folake exikolweni xi byeriwe leswaku xi tsala xitsalwana hi nhloko-mhaka leyi nge “Leswi Ndzi Swi Rhandzaka Swinene eMisaveni Leyi.” Folake u hlawule ku tsala xivangelo lexi n’wi endlaka a rhandza ku byela van’wana hi Mfumo wa Xikwembu.

Folake u te: “Mfumo wa Xikwembu i hulumendhe ya xiviri. Kambe a wu vonaki, kutani a wu nge wu voni—hambiloko wo ambala manghilazi!”

Folake u ye emahlweni a tsala hi mikateko ya Mfumo leyi a yi languteleke hi mahlo-ngati. Loko a boxa swin’wana swa swiphiqo leswi Mfumo wu nga ta swi tlhantlha, u tsale a ku: “Ndzi va ni gome loko ndzi vona vanhu lava nga riki na makaya va tshama eswitarateni” ni loko “vana va dlayiwa hi ndlala eswiphen’wini hinkwaswo swo hambana-hambana swa misava.” U engetele a ku: “Ndzi va ni ntsako loko ndzi hlaya Esaya 65:21.” Malunghana ni vanhu lava nga ta fumiwa hi Mfumo wa Xikwembu, ndzimana yoleyo yi tshembisa yi ku: “Va ta aka tindlu va tshama eka tona, kunene va ta rima masimu ya vhinya va dya mihandzu ya wona.”

Folake u vule leswaku na yena u wu langutele hi mahlo-ngati nkarhi lowu Xikwembu, hi ku tirhisa Mfumo wa xona, xi nga ta herisa vuvabyi hinkwabyo. Eka xitsalwana xakwe, u tshahe Nhlavutelo 21:4 leyi vulaka leswaku Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” U gimete hi ku tlhela a vula marito ya leswaku ku vulavula hi Yehovha ni Mfumo wakwe hi swona leswi a swi rhandzaka swinene emisaveni. Swi le rivaleni leswaku Mfumo wa Xikwembu i wa nkoka swinene eka xinhwanyetana lexi!