Hlawula Ku Yima Ni Mfumo Wa Xikwembu Sweswi!
A hi nge ku ni xidzedze lexi nga ta hlasela ndhawu ya ka n’wina. Mfumo wu humesa switiviso swa xihatla leswi nge: “HUMANI! FAMBANI MI YA TUMBELA!” A wu ta endla yini? A swi kanakanisi leswaku a wu ta ya endhawini leyi sirhelelekeke.
Ku vula ntiyiso, hinkwerhu ka hina hi ta langutana ni khombo leri fanaka ni xidzedze xexo, leri Yesu a ri vuleke “nhlomulo lowukulu.” (Matewu 24:21) A hi nge ri papalati khombo leri. Kambe hi nga swi kota ku lava vutumbelo. Hi nga swi endla njhani?
EDyondzweni yakwe ya le Ntshaveni, Yesu Kreste u te: “Kutani, hambetani mi lava mfumo [wa Xikwembu] ni ku lulama ka [xona] ku sungula.” (Matewu 6:33) Hi swi endlisa ku yini sweswo?
Lava Mfumo wa Xikwembu ku sungula. Leswi swi vula leswaku hi fanele hi teka Mfumo wa Xikwembu wu ri wa nkoka ngopfu ku tlula swilo hinkwaswo. (Matewu 6:25, 32, 33) Hikwalaho ka yini hi fanele hi endla tano? Hikuva vanhu a va swi koti ku tlhantlha swiphiqo swa vanhu. I Mfumo wa Xikwembu ntsena lowu nga kotaka ku tlhantlha swiphiqo leswi karhataka vanhu.
Lava ku lulama ka xona. Hi fanele hi tikarhatela ku hanya hi milawu yo lulama ya Xikwembu. Hikwalaho ka yini? Hikuva loko hi tihlawulela leswi hi vonaka swi ri swinene kumbe swi bihile, vuyelo bya kona byi ta va byo biha. (Swivuriso 16:25) Hi hala tlhelo, loko hi hanya hi milawu ya Xikwembu, a swi nge tsakisi Xikwembu ntsena kambe swi ta vuyerisa na hina.—Esaya 48:17, 18.
Yana emahlweni u lava Mfumo wa Xikwembu ku sungula ni ku lulama ka xona. Yesu u lemukise leswaku van’wana a va ta kavanyeteka va ehleketa leswaku va ta sirheleleka loko va hlengeleta mali yo tala swinene. Van’wana va nga ha pfumelela ku vilela hi vutomi ku va tshikilela swinene lerova va nga ha vi na nkarhi wo lava Mfumo wa Xikwembu.—Matewu 6:19-21, 25-32.
Hambiswiritano, Yesu u tshembise leswaku lava yimaka ni Mfumo wa Xikwembu va ta kuma leswi va swi pfumalaka sweswi naswona enkarhini lowu taka va ta katekisiwa hilaha ku nga heriki.—Matewu 6:33.
Hambileswi vadyondzisiwa va Yesu enkarhini wa vona a va rhangisa Mfumo wa Xikwembu ni ku lulama ka xona, a va ku vonanga ku hela ka switlhavi hinkwaswo ni ku xaniseka enkarhini wa vona. Kambe a va sirheleriwile. Njhani?
A va hanya hi milawu ya Xikwembu naswona sweswo swi va sirhelerile eka swiphiqo leswi a swi wela vanhu lava a va honisa leswi Xikwembu xi swi vuleke. Ripfumelo ra vona leri tiyeke ra leswaku Mfumo wa Xikwembu wu ta ta ri va pfune ku tiyisela hambi ku ri swiphiqo swo tika swinene. Xikwembu xi va nyike “matimba lama tlulaka lama tolovelekeke” leswaku va kota ku tiyisela.—2 Vakorinto 4:7-9.
XANA U TA LAVA MFUMO KU SUNGULA?
Vakreste va le nkarhini wa vaapostola va yingise xileriso xa Yesu xo lava Mfumo ku sungula. Va chumayele mahungu lamanene ya Mfumo exiphen’wini xa misava lexi a va tshama eka xona. (Vakolosa 1:23) Xana va kona lava endlaka sweswo namuntlha?
Ina! Timbhoni ta Yehovha ta swi xiya leswaku ku nga ri khale Mfumo wa Xikwembu wu ta herisa misava leyi yo homboloka. Hikwalaho ti endla hinkwaswo leswi ti nga swi kotaka leswaku ti endla ntirho lowu Yesu a vulavuleke ha wona loko a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.
Xana u ta ma amukela mahungu lamanene? Onge u nga tekelela vaaki va le mutini wa Makedoniya lowu vuriwaka Beriya va le mikarhini ya vaapostola. Loko va twe mahungu lamanene ya Mfumo eka muapostola Pawulo, va amukele rungula rakwe “hi mapfundza lamakulu ya mianakanyo.” Endzhaku ka sweswo va ‘kambisise Matsalwa hi vukheta’ ku tiyisekisa leswaku leswi va swi tweke a swi ri ntiyiso kutani va hanya hi leswi va swi dyondzeke.—Mintirho 17:11, 12.
Na wena u nga endla leswi fanaka. Hi ku lava Mfumo wa Xikwembu ku sungula ni ku lulama ka xona, u ta kuma vutumbelo u tlhela u sirheleleka sweswi naswona u ta va ni ku rhula loku nga heriki ni ku sirheleleka enkarhini lowu taka.