Mfumo Wa Xikwembu—Xana Wa Wu Twisisa?

“Kambe mbewu leyi haxiweke emisaveni leyinene, swi fana ni loko munhu a twa Rito a ri twisisa.”—MATEWU 13:23.

1. Hi swihi swin’wana leswi pfumeriwaka hi laha ku tolovelekeke malunghana ni ‘mfumo wa matilo’?

XANA u swi ‘twisisile’ leswi Mfumo wa Xikwembu wu nga swona? Dyondzo ya ‘mfumo wa matilo’ yi hlamuseriwe hi tindlela to hambana ngopfu hi malembe-xidzana. Ripfumelo leri tolovelekeke exikarhi ka swirho swa tikereke tin’wana namuntlha hi leswaku Mfumo i nchumu lowu Xikwembu xi wu nghenisaka embilwini ya munhu loko a hundzuka. Van’wana va ehleketa leswaku i ndhawu leyi vanhu lavanene va yaka eka yona endzhaku ka rifu leswaku va tiphina hi ntsako lowu nga heriki. Hambi swi ri tano, van’wana va vula leswaku Xikwembu xi swi tshikele evanhwini ku tisa Mfumo emisaveni hi endlelo ra vona ro nghenisa tidyondzo ni mikhuva ya Vukreste etimhakeni ta ntshamisano ni ta hulumendhe.

2. Xana Bibele yi wu hlamusela njhani Mfumo wa Xikwembu, naswona i yini leswi wu nga ta swi endla?

² Hambi swi ri tano, Bibele yi swi kombisa kahle leswaku Mfumo wa Xikwembu a wu nge vumbiwi laha misaveni. A hi xiyimo xa mbilu kumbe ku endla vanhu va va Vakreste. Entiyisweni, ku twisisa lokunene ka leswi Mfumo lowu wu nga swona ku endla lava va pfumelaka eka wona va byi cinca ngopfu vutomi bya vona. Kambe Mfumo hi woxe wu vumbiwe hi hulumendhe ya Xikwembu ya le tilweni leyi tisaka ku rhandza ka Xikwembu, yi herisa vuyelo hinkwabyo bya xidyoho ni rifu ivi yi vuyetela swiyimo swo lulama emisaveni. Ana se Mfumo lowu wa fuma ematilweni, naswona ku nga ri khale wu “ta seletela ni ku herisa ku fuma kuloku [ka vanhu] hikwako, kambe [wona wu] ta v̌a kona hi laha ku nga riki na makumu.”—Daniyele 2:44; Nhlavutelo 11:15; 12:10.

3. Loko Yesu a sungule vutirheli bya yena, i yini lexi pfuleriweke vanhu?

³ N’wamatimu H. G. Wells u tsarile a ku: “Dyondzo leyi ya Mfumo wa Tilo, leyi a ku ri dyondzo-nkulu ya Yesu, ni leyi nga ni xiphemu xitsongo swinene eka tidyondzo ta nkoka ta Vukreste, i yin’wana ya tidyondzo-nkulu leyi tshameke yi susumeta ni ku cinca mianakanyo ya vanhu.” Ku sukela eku sunguleni, nhloko-mhaka ya vutirheli bya Yesu a yi ku: “Hundzukani, hikuva Mfumo wa matilo wu le kusuhi.” (Matewu 4:17) A a ri emisaveni tanihi Hosi leyi totiweke, naswona lexi tsakisaka swinene hi lexi, vanhu a va pfulekeriwe hi ndlela yo hlanganyela eka mikateko ya Mfumo wolowo ni ku tlhela va va vafumi-kulobye ni vaprista na Yesu eMfun’weni wolowo!—Luka 22:28-30; Nhlavutelo 1:6; 5:10.

4. Eka lembe-xidzana ro sungula, xana mintshungu yi angule njhani eka “Evhangeli ya Mfumo,” leswi endleke leswaku va avanyisiwa njhani?

⁴ Hambi leswi vunyingi byi tweke “Evhangeli ya Mfumo” leyi tsakisaka, kambe a hi vangani lava pfumeleke. Swin’wana leswi a swi vangela leswi, hi leswi varhangeri va vukhongeri a va “alela vanhu ku nghena eMfun’weni wa matilo.” Va “[khome] xilotlelo xa vutivi” hi tidyondzo ta vona ta mavunwa. Hikwalaho ka leswi vanhu vo tala va aleke Yesu tanihi Mesiya ni Hosi leyi totiweke ya Mfumo wa Xikwembu, Yesu u vule leswi eka vona: “Mi ta tekeriwa Mfumo wa Xikwembu; kutani wu ta nyikiwa tiko rin’wana leri nga ta veka mihandzu ya wona.”—Matewu 4:23; 21:43; 23:13; Luka 11:52.

5. Xana vo tala va lava tweke swifaniso swa Yesu va swi kombise njhani leswaku a va nga yingisi hi ku twisisa?

⁵ Eka khamba rin’wana loko Yesu a dyondzisa ntshungu lowukulu, hi ku ya hi ntolovelo wa yena, u tirhise ndzandzelano wa swifaniso ku kambela ntshungu ni ku hambanisa lava ehandle a va vonaka onge va wu tsakela Mfumo. Xifaniso xo sungula i xa mubyari la byaleke emisaveni ya mixaka ya mune. Mixaka yinharhu yo sungula a yi nga ri yinene lerova swimilana swi nga kula eka yona, kambe wo hetelela a wu ri “[misava] leyinene” leyi humeseke mihandzu leyinene. Xifaniso lexi xo koma xi hetelele hi xikhongotelo lexi nge: “La nga ni tindleve, a a yingise!” (Matewu 13:1-9) Vo tala va lava a va ri kona va n’wi twile, kambe a va “yingis[anga].” A va nga susumeteleki, a va nga ri na ku tsakela ka xiviri ko tiva ndlela leyi mbewu leyi byariweke ehansi ka swiyimo leswi hambanaka a yi fana ni Mfumo wa matilo ha yona. Va tlhelele emakaya eka vutomi bya vona bya siku na siku, handle ko kanakana va ri karhi va ehleketa leswaku swifaniso swa Yesu a swi ri switori leswinene leswi nga ni tinhloko-mhaka ta mahanyelo ntsena. Wa nga vona ku fuwa ka ku tiva ni malunghelo lamakulu ni minkarhi leyi va lahlekeriweke hi yona hikwalaho ka leswi timbilu ta vona a ti nga yingisi!

6. Hikwalaho ka yini ku twisisa “swihundla swa Mfumo wa matilo” ku nyikiwe vadyondzisiwa va Yesu ntsena?

⁶ Yesu u byele vadyondzisiwa va yena a ku: “Hileswaku n’wina, mi nyikiwile ku tiva swihundla swa Mfumo wa matilo, kambe vona a va nyikiwanga.” Loko a tshaha Esaya, u engeterile: “‘Timbilu ta vanhu lava ti tlanyarile, va tipfale tindleve ni mahlo, leswaku va nga ha voni, ni ku twa va nga ha twi, hambi ku ri ku twisisa va nga ha twisisi, ni leswaku va nga hundzuki, na mina ndzi nga va hanyisi.’ Kambe ma katekile mahlo ya n’wina, hikuva ma vona, ni tindleve ta n’wina, hikuva ta twa.” (Xiitaliki i xerhu.)—Matewu 13:10-16; Marka 4:11-13.

Ku “Twisisa” Mfumo

7. Hikwalaho ka yini swi ri swa nkoka ku “twisisa” Mfumo?

⁷ Yesu u kombetele eka xiphiqo xa kona. A xi fambisana ni ku “twisisa” rungula ra Mfumo. U byele vadyondzisiwa va yena exihundleni a ku: “Loko mi ri n’wina, yingisani ta xifaniso xa muhaxi mi xi twisisa: Un’wana ni un’wana la twaka Rito ra Mfumo wa Xikwembu, kambe a nga ri twisisi, . . . Lowo biha a ta, a n’wi tekela leswi haxiweke embilwini ya yena.” (Xiitaliki i xerhu.) U ye emahlweni a hlamusela leswaku mixaka ya mune ya misava yi fanekisela swiyimo swo hambana-hambana swa timbilu leti “Rito ra Mfumo wa Xikwembu” ri byariwaka eka tona.—Matewu 13:18-23; Luka 8:9-15.

8. I yini lexi siveleke ‘mbewu’ leyi byariweke eka misava ya mixaka yinharhu yo sungula leswaku yi humesa mihandzu?

⁸ “Mbewu” yin’wana ni yin’wana a yi ri kahle, kambe mihandzu a yi titshege hi xiyimo xa misava. Loko misava ya mbilu yi fana ni ndlela leyi teleke hi swilo, yi tsindziyerisiwa hi mintirho yo tala leyi nga riki ya moya, a swi ta n’wi olovela loyi a twaka rungula ra Mfumo leswaku a titsetselela, a vula leswaku a ku nga ri na nkarhi wa Mfumo. Mbewu leyi honisiweke yi nga tekiwa hi ku olova yi nga si va ni rimitsu. Kambe ku vuriwa yini hi loko mbewu a yi lo byariwa embilwini leyi fanekiselaka misava leyi nga ni maribye? Mbewu yi nga ha mila, kambe swi nga yi nonon’hwela ku dzima timitsu ta yona ehansi leswaku yi kuma swakudya ni matimba. Ntshembo wo va nandza la yingisaka wa Xikwembu, ngopfu-ngopfu eku xanisiweni lokukulu, wu nga vanga mphikamakaneta lowukulu naswona munhu a nga hambuka. Nakambe, loko misava ya mbilu yi tele hi mivilelo leyi fanaka ni mitwa kumbe ku navela rifuwo, ximilana lexi tsaneke xa Mfumo xi ta kamanyetiwa. Eka swiyimo leswi swinharhu swa vutomi swo fanekisela, ku hava mihandzu ya Mfumo leyi nga ta humesiwa.

9. Hikwalaho ka yini mbewu leyi byariweke emisaveni leyinene yi swi kotile ku veka mihandzu leyinene?

⁹ Hambiswiritano, ku vuriwa yini hi mbewu ya Mfumo leyi byariweke emisaveni leyinene? Yesu wa hlamula: “Kambe mbewu leyi haxiweke emisaveni leyinene, swi fana ni loko munhu a twa Rito a ri twisisa; hi yena loyi a vekaka mihandzu hakunene, yin’wana ka 100, yin’wana ka 60, yin’wana ka 30.” (Matewu 13:23, xiitaliki i xerhu.) Leswaku va “twisisa” Mfumo, va fanele va humesa mihandzu leyinene hi ku ya hi swiyimo swa vona swa munhu hi xiyexe.

Vutihlamuleri Byi Fambisana Ni Ku Twisisa

10. (a) Xana Yesu u swi kombise njhani leswaku ku “twisisa” Mfumo swi tisa mikateko ni vutihlamuleri? (b) Xana xileriso xa Yesu xo famba va endla vadyondzisiwa xi tirha eka vadyondzisiwa va lembe-xidzana ro sungula ntsena?

¹⁰ Endzhaku ko nyikela swifaniso swa tsevu leswi engetelekeke loko a hlamusela swiyimo swo hambana-hambana swa Mfumo, Yesu u vutise vadyondzisiwa va yena a ku: “Xana ma ti twisisa timhaka leti hinkwato ke?” (Xiitaliki i xerhu.) Loko va hlamule va ku “ina,” u te: “Hi laha ndzi nge: Mutsari un’wana ni un’wana la dyondzisiweke hi ta Mfumo wa matilo, ú fana ni n’wini wa yindlu la humesaka evukosini bya yena swilo leswintshwa ni leswa khale.” Tidyondzo ni vuleteri leswi nyikeriwaka hi Yesu a swi ta aka vadyondzisiwa va yena leswaku va va Vakreste lava vupfeke lava nga kotaka ku humesa swakudya swa moya leswi fuweke leswi nga riki na makumu ‘endlwini ya vuhlayiselo’ ya vona. Swo tala swa leswi a swi fambisana ni Mfumo wa Xikwembu. Yesu u swi veke erivaleni leswaku ku “twisisa” Mfumo a swi nge tisi mikateko ntsena kambe swi ta tisa ni vutihlamuleri. U lerisile: “Hikokwalaho, yanani eka vamatiko hinkwavo, mi va endla vadyondzisiwa va mina, . . . mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.”—Matewu 13:51, 52; 28:19, 20.

11. Loko 1914 yi fika, i swiendlakalo swihi leswi yelanaka ni Mfumo leswi humeleleke?

¹¹ Hi laha a tshembiseke ha kona, Yesu u ye emahlweni a va ni vadyondzisiwa va yena va ntiyiso ku sukela emalembeni ya madzana lama hundzeke ku fikela namuntlha. Emasikwini lawa ya makumu, u va nyike ku twisisa hi laha ku yaka emahlweni, naswona u tlhele a va endla va va ni vutihlamuleri eku tirhiseni ka ku vonakala ka ntiyiso loku engetelekaka. (Luka 19:11-15, 26) Hi 1914, swiendlakalo swa Mfumo swi sungule ku paluxiwa hi ku hatlisa ni hi laha ku hlamarisaka. Hi lembe rolero, a ku humelelanga ku “velek[iwa]” ka Mfumo lowu a wu naveriwa hi nkarhi wo leha ntsena kambe ku sungule ni ‘makumu ya mafambiselo lawa ya swilo.’ (Nhlavutelo 11:15; 12:5, 10; Daniyele 7:13, 14, 27) Vakreste va ntiyiso, lava twisisaka nhlamuselo ya swiendlakalo swa sweswi, va nghenele tsima lerikulu ra ku chumayeriwa ka Mfumo ni ku dyondzisa ematin’wini. Yesu u vhumbhe leswi, a ku: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:14.

12. (a) Xana byi ve byihi vuyelo bya ku veka vumbhoni bya Mfumo hi laha ku engetelekeke manguva lawa? (b) Emisaveni leyi leyi kanakanaka, hi rihi khombo leri Vakreste va langutaneke na rona?

¹² Vumbhoni lebyi lebyikulu bya Mfumo byi fikelele ematikweni yo tlula 230. Ana se vadyondzisiwa va ntiyiso vo tlula ntlhanu wa timiliyoni va hlanganyela entirhweni lowu, naswona van’wana va ha hlengeletiwa. Kambe loko hi ringanisa nhlayo ya vadyondzisiwa ni vaaki va misava va 5 600 wa timiliyoni, swi le rivaleni leswaku ku fana ni le sikwini ra Yesu, vunyingi lebyikulu bya vanhu a byi nga wu “twisis[i]” Mfumo. Vo tala, hi laha ku vhumbhiweke ha kona, va hlekula va ku: “Swi helele kwihi, swa loyi ku nga tshembisiwa leswaku ú ta ta, xana?” (2 Petro 3:3, 4) Khombo leri hina Vakreste hi langutaneke na rona hi leswaku ku eneriseka ka vona, ku kanakana, langutelo ra vona ra swilo leswi vonakaka swi nga ha khumba ndlela leyi hi langutaka ha yona malunghelo ya hina ya Mfumo hakatsongo-tsongo. Tanihi leswi hi rhendzeriweke hi vanhu va misava leyi, hi nga ha sungula ku tekelela man’wana ya malangutelo ni mikhuva ya vona hi ku olova. Wa nga vona ndlela leyi swi nga swa nkoka ha yona leswaku hi “twisisa” Mfumo wa Xikwembu ni ku khomelela hi laha ku tiyeke eka wona!

Ku Tikambisisa Hi Hexe Mayelana Ni Mfumo

13. Eka xileriso xo chumayela mahungu lamanene ya Mfumo, xana hi nga tikambela njhani ku vona loko ha ha ya emahlweni hi ‘twa’ hi ndlela yo twisisa?

¹³ Yesu u vule leswi hi nkarhi wa ntshovelo lowu hi hanyaka eka wona: “N’wana-wa-Munhu ú ta rhuma tintsumi ta yena, ti ta humesela ehandle ka Mfumo wa yena vakhunguvanyisi hinkwavo ni lava endlaka leswo biha . . . Enkarhini wolowo, lavo lulama va ta hatima kukotisa dyambu, eMfun’weni wa Tata wa vona. La nga ni tindleve, a a yingise!” (Matewu 13:41, 43) Xana u ya emahlweni u ‘yingisela’ hi ku rhiya ndleve u yingisa xileriso xo chumayela Mfumo ni ku endla vadyondzisiwa? Tsundzuka, “[loyi a] haxiweke emisaveni leyinene” ‘u twe rito ni ku ri twisisa’ kutani a humesa mihandzu leyinene.—Matewu 13:23.

14. Loko ku nyikeriwa ndzayo, xana hi swi kombisa njhani leswaku hi “twisisa” ndzayo leyi nyikeriweke?

¹⁴ Loko hi endla dyondzo ya munhu hi xiyexe ni ku hlanganyela minhlangano ya Vukreste, hi fanele hi ‘dzikisa timbilu ta hina eku twisiseni.’ (Swivuriso 2:1-4) Loko ku nyikeriwa xitsundzuxo malunghana ni mahanyelo, maambalelo, vuyimbeleri ni ku titsakisa, hi fanele hi xi pfumelela xi dzika etimbilwini ta hina xi tlhela xi hi susumetela ku lunghisa laha swi faneleke. U nga tshuki u xi tekela ehansi, u titsetselela kumbe u sihalala. Loko Mfumo wu ri wa xiviri evuton’wini bya hina, hi ta hanya hi ku ya hi mimpimanyeto ya wona hi tlhela hi wu twarisa eka van’wana hi ku hiseka. Yesu u te: “A hi hinkwavo lava nge ka mina: ‘Hosi, Hosi’ lava nga ta nghena eMfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:21-23.

15. Ha yini swi ri swa nkoka ku ‘rhangisa mfumo ni ku lulama ka Xikwembu’?

¹⁵ Vanhu va tolovele ku vilela hi swakudya leswi lavekaka, swiambalo ni vutshamo, kambe Yesu u te: “Rhangani mi tilavela Mfumo wa [xona] ni ku lulama ka [xo]na [Xikwembu], kutani sweswo hinkwaswo mi ta engeteleriwa swona.” (Matewu 6:33, 34) Loko u hlela swilo leswi taka ku sungula, rhangisa Mfumo evuton’wini bya wena. Endla vutomi bya wena byi olova, u eneriseka hi leswi lavekaka. Ku ta va ku ri vuphukuphuku ku tata vutomi bya hina hi mintirho leyi nga riki ya nkoka ni leswi hi nga tikumelaka swona, kumbexana hi sasa hi ku vula leswaku ku endlisa xisweswo swa amukeleka, tanihi leswi swilo leswi swi nga bihangiki hi swoxe. Sweswo swi nga ha va swi ri ntiyiso, kambe xana ku kuma ni ku tirhisa swilo swoleswo swi nga riki swa nkoka swi ta xi khumba njhani xiyimiso xa hina xa dyondzo ya munhu hi xiyexe, ku hlanganyela minhlangano ya Vukreste ni ku hlanganyela entirhweni wo chumayela? Yesu u vule leswaku Mfumo wu fana ni n’wamabindzu loyi a kumeke “dayimani yin’wana ya nxavo lowukulu, [ivi] a ya xavisa swilo swa yena hinkwaswo, a tixavela yona.” (Matewu 13:45, 46) Leyi hi yona ndlela leyi hi faneleke hi titwa ha yona mayelana ni Mfumo wa Xikwembu. Hi fanele hi tekelela Pawulo hayi Demasi, loyi a tshikeke vutirheli “hikwalaho ko rhandza fambiselo leri ra swilo.”—2 Timotiya 4:10, 18, NW; Matewu 19:23, 24; Vafilipiya 3:7, 8, 13, 14; 1 Timotiya 6:9, 10, 17-19.

“Lavo Homboloka Va Nga Ka Va Nga Dyi Ndzhaka Ya Mfumo Wa Xikwembu”

16. Xana ku “twisisa” Mfumo wa Xikwembu ku ta hi pfunisa ku yini ku papalata ku tikhoma loko biha?

¹⁶ Loko vandlha ra le Korinto ri pfumelele mahanyelo layo biha, Pawulo hi ku kongoma u te: “Xana a mi tivi leswaku lavo homboloka va nga ka va nga dyi ndzhaka ya Mfumo wa Xikwembu, xana? Mi nga tshuki mi tikanganyisa: Loko ti ri timbhisa, ni lava gandzelaka swikwembu swa hava, ni vaoswi, ni vavanuna lava endlaka swa tingana ni vavanuna-kulobye, ni vayivi, ni va makwanga, ni swidakwa, ni varhukani, ni vaxisi, va nga ka va nga dyi ndzhaka ya Mfumo wa Xikwembu.” (1 Vakorinto 6:9, 10) Loko hi “twisisa” Mfumo wa Xikwembu, a hi nge tixisi hi ku ehleketa leswaku Yehovha u ta tiyiselela ndlela yo karhi ya mahanyelo layo biha ntsendze loko a hi vona hi khomekile entirhweni wa Vukreste. A hi fanelanga hi vulavula hi manyala exikarhi ka hina. (Vaefesa 5:3-5) Xana u xiya mianakanyo yin’wana leyi thyakeke ya misava leyi kumbe mikhuva leyi sungulaka ku ngungumela yi nghena hakatsongo-tsongo evuton’wini bya wena? Yi suse hi ku hatlisa evuton’wini bya wena! Mfumo i wa risima swinene, wu nga ku lahlekeli hikwalaho ka swilo sweswo.—Marka 9:47.

17. Xana ku twisisa Mfumo wa Xikwembu ku ta tisa ku titsongahata ni ku susa swivangelo swo khunguvanyisa hi tindlela tihi?

¹⁷ Vadyondzisiwa va Yesu va vutisile: “Lonkulu eMfun’weni wa matilo i mani xana?” Yesu u hlamule hi ku veka n’wana exikarhi ka vona a ku: “Ndzi tiyisile ndzi ri ka n’wina, loko mi nga hundzuki mi fana ni vana, a mi nga ngheni eMfun’weni wa matilo. Hikokwalaho ke, loyi a titsongahataka kukotisa n’wana loyi, hi yena la nga lonkulu eMfun’weni wa matilo.” (Matewu 18:1-6) Vanhu lava tikukumuxaka, lava sindzisaka, lava nga riki na mhaka ni lava kalaka nawu a va nge vi kona eMfun’weni wa Xikwembu, hambi ku ri ku va vafumiwa va Mfumo wolowo. Xana rirhandzu ra wena ro rhandza vamakwenu, ku titsongahata ka wena, ku chava Xikwembu ka wena, swi ku susumetela ku papalata ku khunguvanyisa van’wana hi mahanyelo ya wena? Kumbe wa phikelela eka ‘timfanelo ta wena’ ku nga khathariseki ndlela leyi langutelo leri ni hanyelo leri swi nga ha va khumbaka ha yona van’wana?—Varhoma 14:13, 17.

18. Xana ku ta humelela yini eka vanhu lava yingisaka loko Mfumo wa Xikwembu wu endla leswaku ku rhandza ka xona ku endleka “emisaveni, tanihi loko ku endliwa tilweni”?

¹⁸ Tata wa hina wa le tilweni, Yehovha, ku nga ri khale u ta xi hlamula hi vutalo xikhongelo lexi khongeriwaka hi ku tiyimisela lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” Ku nga ri khale Hosi leyi fumaka, Yesu Kreste, yi ta ta hi langutelo ro tshama exiluvelweni xa yona leswaku yi avanyisa, yi hambanisa “tinyimpfu” eka “timbuti.” Hi nkarhi wolowo lowu vekiweke, “hi laha Hosi yi nga ta byela lava nge vokweni ra yona ra xinene yi ku: ‘Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.’” Timbuti ti “ta ya eku biweni loku nga heriki, kambe lavo lulama va ta ya evuton’wini lebyi nga heriki.” (Matewu 6:10; 25:31-34, 46) “Nhlomulo lowukulu” wu ta herisa fambiselo ra khale ni hinkwavo lava alaka ku “twisisa” Mfumo. Kambe timiliyoni ta lava poneke “nhlomulo lowukulu” ni magidi ya timiliyoni ta lava nga ta va va pfuxiwile ti ta kuma mikateko ya Mfumo leyi nga heriki emisaveni ya Paradeyisi leyi pfuxetiweke. (Nhlavutelo 7:14, NW) Mfumo i hulumendhe leyintshwa ya misava, leyi fumaka yi huma etilweni. Wu ta hetisisa xikongomelo xa Yehovha hi misava ni vanhu, ni ku kwetsimisa vito ra yena ro kwetsima swinene. Xana yoleyo a hi yona ndzhaka leyi faneleke leswaku hi nga yi tirhela, hi titsona swo karhi hikwalaho ka yona, hi yi yimela? Leswi hi leswi ku “twisisa” Mfumo swi faneleke swi vula swona eka hina!

A Wu Ta Hlamurisa Ku Yini?

◻ Mfumo wa Xikwembu i yini?

◻ Hikwalaho ka yini vo tala va vayingiseri va Yesu va nga wu “twisisa[nga]” Mfumo?

◻ Xana ku “twisisa” Mfumo swi tisa mikateko ni vutihlamuleri hi ndlela yihi?

◻ Malunghana ni ku chumayela, i yini lexi kombisaka leswaku hi ‘twisise’ Mfumo?

◻ Xana hi swi kombisa njhani hi mahanyelo ya hina leswaku hi ‘twisise’ ndzayo leyi nyikeriweke?

[Swifaniso leswi nga eka tluka 17]

Vadyondzisiwa va Yesu va ‘twisise’ Mfumo kutani va humesa mihandzu leyinene