Ntiyiso Hi Mfumo Wa Xikwembu
Yesu u dyondzise valandzeri vakwe ku khongela va ku: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) I yini Mfumo wa Xikwembu? I yini leswi wu swi endlaka? Hikwalaho ka yini hi fanele hi wu khongelela?
Yesu I Hosi Ya Mfumo Wa Xikwembu.
Luka 1:31-33: “Vito ra yena u ta n’wi thya Yesu. Yena u ta va lonkulu naswona u ta vuriwa N’wana wa La nge Henhla-henhla; Yehovha Xikwembu u ta n’wi nyika xiluvelo xa Davhida tata wakwe, naswona u ta va hosi ehenhla ka yindlu ya Yakobe hi masiku, mfumo wakwe a wu nge vi na makumu.”
Yesu a a chumayela ngopfu hi Mfumo wa Xikwembu.
Matewu 9:35: “Kutani Yesu a teka pfhumba ra ku famba hi miti ni swimitana hinkwaswo, a dyondzisa emasinagogeni ya vona ni ku chumayela mahungu lamanene ya mfumo ni ku horisa swifo swa mixaka hinkwayo ni vulema bya mixaka hinkwayo.”
Yesu u nyike vadyondzisiwa vakwe swikombiso leswi a swi ta va pfuna ku vona loko Mfumo wa Xikwembu wu tshinela.
Matewu 24:7: “Hikuva tiko ri ta pfukela tiko rin’wana ni mfumo wu ta pfukela mfumo wun’wana, kutani ku ta va ni ku kayivela ka swakudya ni ku tsekatseka ka misava ku suka endhawini yin’wana ku ya eka yin’wanyana.”
Sweswi vadyondzisiwa va Yesu va chumayela hi Mfumo emisaveni hinkwayo.
Matewu 24:14: “Naswona mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”