Ku Nga Ri Khale Xikwembu Xi Ta Herisa Ku Xaniseka Hinkwako

“Oho Yehovha, xana ndzi ta kombela ku pfuniwa ku fikela rini, kambe u nga yingisi? Xana ndzi ta kombela leswaku u ndzi pfuna emadzolongeni ku fikela rini, kambe u nga ndzi ponisi?” (Habakuku 1:2, 3) Lawa i marito ya Habakuku, wanuna lonene loyi a ri ni vuxaka lebyinene na Xikwembu. Xana xikombelo xa yena xi kombisa leswaku a nga ri na ripfumelo? Nikatsongo! Xikwembu xi tiyisekise Habakuku leswaku xi ta herisa ku xaniseka hinkwako hi nkarhi lowu xi wu vekeke.—Habakuku 2:2, 3.

Loko wena kumbe munhu loyi u n’wi rhandzaka a xaniseka, swa olova ku gimeta hi leswaku Xikwembu xa hlwela ku teka goza naswona a xi fanele se xi nghenelerile leswaku xi hi ponisa. Kambe Bibele yi hi tiyisekisa yi ku: “Yehovha a nga nonoki malunghana ni xitshembiso xa yena, hilaha vanhu van’wana va ehleketaka hakona leswaku i ku nonoka, kambe u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.”—2 Petro 3:9.

XANA XIKWEMBU XI TA KU HERISA RINI KU XANISEKA?

Ku nga ri khale! Yesu u vule leswaku xitukulwana xo karhi a xi ta vona swiyimo leswi kombisaka leswaku hi le “makumu ya mafambiselo ya swilo.” (Matewu 24:3-42) Ku endleka ka leswi Yesu a swi profeteke enkarhini wa hina, swi kombisa leswaku nkarhi wa leswaku Xikwembu xi herisa ku xaniseka hinkwako wu le kusuhi.a

Kambe, xana Xikwembu xi ta ku herisa njhani ku xaniseka hinkwako? Loko Yesu a ri laha misaveni, u kombise matimba ya Xikwembu yo herisa ku xaniseka ka vanhu. Xiya swikombiso swin’wana leswi landzelaka.

Timhangu Ta Ntumbuluko: Loko Yesu ni vaapostola vakwe va ri exikepeni eLwandle ra Galeliya, xidzedze xa matimba a xi lava ku mbombomerisa xikepe. Kambe Yesu u kombise leswaku yena ni Tata wakwe va swi kota ku lawula ntumbuluko. (Vakolosa 1:15, 16) Yesu u te: “Miyela! U ku whii!” Kutani ku endleke yini? “Mheho yi hunguteka, hiloko ku va ni ku rhula lokukulu.”—Marka 4:35-39.

Mavabyi: Yesu a a tiveka hi vuswikoti byakwe byo horisa lava nga voniki ni lava khwitaka ku katsa ni lava a va ri ni vuvabyi bya switshetshela, nhlokonho ni mavabyi man’wana. ‘U hanyise hinkwavo lava a va nga pfukanga kahle.’—Matewu 4:23, 24; 8:16; 11:2-5.

Ku Kayivela Ka Swakudya: Yesu u tirhise matimba lawa a ma kumeke eka Tata wakwe ku andzisa swakudya leswaku a phamela mintshungu. Bibele yi vula leswaku loko Yesu a ri laha misaveni, u phamele vanhu va magidi kambirhi.—Matewu 14:14-21; 15:32-38.

Rifu: Leswaku Yehovha u na matimba yo pfuxa vanhu eku feni, swi kombisiwe eka rungula leri vulavulaka hi vanhu vanharhu lava Yesu a va pfuxeke. Un’wana eka lava pfuxiweke a ri ni masiku ya mune a file.—Marka 5:35-42; Luka 7:11-16; Yohane 11:3-44.